Psalm 121
"I lift up my eyes to the hills.
From where does my help come?
My help comes from the Lord,
who made heaven and earth".
Research scholar khat in Manipur ah Drugs leh Substance abuse chungchang a zikna ka sim lai in ka lungthim ei khawi ma ma numei khat chanchin hiti hin a hung zik hi. A pawsal neina ah lawtinglo in a nunglam in (a pianna inn) ahung kile kitta. Ahinla a pianna innsung mite’n le ala lawp (welcome) ta puau ah; lunggim tak leh beidawng tak ah a um zing lai in khamthei bawl mite tawh ahung kithua kha tau ah, a ma ading in khawvel ah a lawi neisun ahi tau ahi. A lawite chu’n,"Bangma lungkham ding a um puai zia damdawi hi bawl lechin la lunggimna chu chawm khat a ding bek ah hemil ziang ding la hi" ati piak lai un, bawl ding ah a nopte lak ah pangkhalo maleh, a lungngaina henemtu ding dang a mu lo ziakin ahung bawlpanta. Hun hung chia zelin ama taksa (body) ngei sum hawlna'n ahung mang ta ahi. Amin diktak chu a zik pua ahinla a ma min ding ah ahung koina apat chun ei Thingtangmi ahi ti chu akihethei hi.
Khamthei bawl zosia a dinmun in a zillo ziak ah bawl ahiu tina vang ahi puai. Khenkhat innsung neizo tak lungkhamna ding a neilo na Pathian in a malsawmna, mang thiamlo ah khawvel nopchen ah hinkhua susia tamtak le um ding ahi. Ahinla zia numei khat chanchin I gen gual ahih panpitu ding a poimaw lai ah a mu zolo ziak ah ziagual dinmun tiang tun khawlaw tampi le um dingin ginchak a um hi. Khamthei bawlte’n a nei sunsun uh damdawi chang (tablet) khat ahem, khatvei kikapna ding ahem, a lawinu' a ding ah a piak phal nau leh a bawl thei sun uh a lunggim hun ah thamuantu ding a ngaitua piaknau hi ettawntak thei khat chu ahi. Numei innlam chia-kit, khamthei bawl, ahilo leh zu dawnte haw panpi malak ah ei hawn vang I kiang ua a um ding uh le I dawi sek puau. Innsung mite kingak theina hitalo, a kochuam mite chung ale kingakna ding mu zo diaklo. Zia gual mi chun khamthei bawlte bep chu kingak theina a mu sun ala hisek ahi.
Gam chuamchuam ah, missionary I sawl uh hile apha nai, I cha I nau khawksak lo ah gamdang mi va khawksak zawk ding le aphapen ahi na diam? Ka lungkham lai ah khawmthei bawl te lak in chia leng ka lungkhamna, ka beidawnna hih pha deu in ah ti ah ngaituana a neithei gual uhin ka kochuam pite lak in chia leng thamuanna, panpina mu ngei ingka ti ngaituana a nei theina ding ua kochuam hi mite ginchak leh thangai tâk ah a um a ngai hi. "Bangma lungkham ding a um puai, Pathian bangkim hithei a um nai, la Nu leh Pa, la suapite ka um uh hilam, la kochuamte ka um uh hilam..." ti ah thamuanna aw hi a um zing ah, lungngai leh beidawngte kingakna tak kochuam hithei leu hin Pathian dawilam hi ngei ding ahi.
Panpina chu Lalpa a kipat ahia. Hepina neilo leh Panpitu ah pang theilo innsung leh kochuam I hiu chun I lak ua Lalpa umlo hi kha ding ahi. Amen?
