Pathian i kihumbitna leh i hatna, mangbat lai a huh pahpahpa nai gige ahi. - Sam 46:1
Pathian theihpihna leh phalna ziak in COVID-19 natna hii kana kaaikha uh a ka kai khak hunsung un buaina leh haksatna tuamtuam tuak mahle ung, Toupa'n kim-le-pam ah panpihtu diing, thumna a hon phawk diing leh ka damna ding uh leng gelsa nei ahi ka chi uhi.
Hiai tulai natna i veikhak chiang in taksa tung ah noplouhna tuamtuam om hi, a hong kilat khiakdan chituamtuamte (Kou theihdan/ tuahdan akipan in):-
1. Khosik:
• Khosik kinei in, khosik in a hon phak chiang in chikham leh guh-le-taang na hi.
• Lup leh tut haksa kisa a himahleh ihmut kal chiang in a na veng/ pha thei zel hi.
2. Ankam limlou
• Ankam a lim lou a, i nek teng a kha (bitter) mah bang a, tui dawn leng lim lou in haksa hi.
3. Khuh
• Khuh pen a om gige hikei mahleh, khuh ngal chiang in a kizom in kikhuh den a huai in nak haksa sakna lianpi hontun hi.
4. Lu na
• Lu a nat chiang in na velvul hilou a, himahleh lu natna dan nuam lou in, gik belbul hi.
5. Sungkhoh
• Ankam limlou ahihziak in, i nek peuh kinawm valhsuk ahihman in sung hatlou ut a, huai in sung hoihlou sak ahi mai ding... daileeng zihzeh bel kihilou.
6. Gawlna
• Gawlna leng kinei a himahleh chii leh tuilum helkhawm a i dawn leh phattuam hi. Na den bel hilou.
Damdawi ka nek tangpi uh leh ka kikep dan uh..
Khosik in a hon phak chiang in
• Montair-LC Tablet (Ni 7 sung zingan leh nitakan nek zoh teng a 1 zel)
• Azithromycin Tablet (Ni 5 sung zingan leh nitakan nek zoh teng a 1 zel)
• Vitamin-C (Limcee) leh Bicosule - nitakan zek zoh teng in tang 1 zel tutan ka ne lai uhi.
Mimal a kikepdan:
• Bawngnawi leh Ai-eng suangkhawm in a lumlai a dawn zel
• Chituisa (hot) a gawl khuah
• Steamer la zelzel (Tuisahu kam leh naak ah diik lut)
• Theithuuk, Apple, Nahtang ne..
• Siing gawizan a suangsou in huai a lumlai mah a dawn leh gawl khuahna di’a zang ..
• Sekthuuk/ Nimbu/ Champara tui suuk in tuisa lak a a tui sung in dawn
- Tuailai thahat leh chidamte a diing in lauhuai lawmlawm lou a, himahleh midangte lawhsawntu a pan theih ahihziak in pilvan ngai hi.
- Teekte leh taksa hatloute ading in pilvanhuai diak hi: ankam limlou a, gil a kial zek chiang in amhai in, natna inleng hon zoudiak diing hi.
Immune system hatdan leh hatlouh dan ah leng kinga lian mahmah, Immune system hatna ding in Ihmut hoih leh nek hoih ngai hi.
Hiai natna kana veikhak hunsung uh innsung a kikhumbichilh ka hihman un a chang in ning kitelhuai leh thawmhauhuai hun omtham hi. Himahleh Toupa'n ahon ompih a kiim-le-pam a lawm-le-vual, saptuamte leh tanaute' hon kithuahpihna ziak in thawmhau manlou phial in ka om ua, hampha lua hi ung.
Ka kikhumbichilh hun sung un..
•Phone tungtawn in EBCC DELHI Pastorte (Pastor Thuamminlian leh Pastor Khankham) leh U Biaki (Delhi) te'n thumna hon neihsak ua lungmuan huai lua hi. Huaite banah U Lian (Mumbai) leh Nu Nem (Delhi) te'n nisim in ka tanchin uh honkan in thumna ah honna phawk uh chih ka theih un hon lung himawh luatna uh bang kisuanlahhuai lehlam bang mahleh amaute ziak in kingaihtuah vungvungna diing hun neiman lou ka hihman un hampha kisa lua ung! Kipak lua.
•Innkong kipawt theilou meh ding leh nek ding lei theihlouh hun in U Nem & innkuan (Kishangarh, Delhi), Juliana (Mashoodpur Delhi), leh U Mawi (Mahipalpur, Delhi) te'n meh ding hong puak zel ban uah, thumna a hon na phawk zel ziak un ka phulouh uh vualzawlna ahi, amaute ziak in mehlim taktak nek ding ka nei ua nek ding tasam lou in ka om uhi. Toupa'n aleh tamsem in vualzawl hen chih ka thumna uh ahi.
•Banah Nu-le-pate' hon hasotna leh thumpihnate manpha lua hi. A Tate uh hon itna uh chikmah in kidang ngeilou a, a’ tate un natna i thuak hun a leng a na thuakzaw gigete ahihman un Nu-le-pa itna theichian semsem ung!
•KhristianInnkuan WhatsApp Group 1 a member phattuamngai tamtakte, tanau-laina anai-agamla a omte, leh lawmvual tamtakte'n awlmawh ua thumna a hon phawk zelzel uh ahihdan zak in om sek a lungmuanhuai lua hi.
•Sum-le-pai a hon kithuahpihtu saptuam EBCC (Delhi) leh DMF (Delhi) te ziak in Toupa min ka phat hi. Toupa'n A’ saptuamte hon ompih in tam sem in hon vualzawl zel hen chih ka thumna uh ahi.
Mihingte'n i tuah diing deihtelna i neikei uh a, himahleh haksatna leh gentheihna i tuah hun chiang in Toupa hon ompih ahihdan kichian zaw zel hi! Toupa'n ahon itna i muhchian semna diing in akallak in haksatna tuah diing honphal mah ahi. Himahleh i thuaktheih val haksatna hon tuaksak tuanlou a, haksatna i tuah hun chiang a Toupa i sap leh a hon dawng zel hi, a thuchiam a zuau ngeilou ahihziak in.
•Sam 138:3 - K'on sap ni'n nang n'on dawng a, ka hinna hihhat in n'on hasuan a.
Mihingte'n i tuah ngeingei diing a i theih uh, himahleh eitung a tung ngeilou diing banghial a i koih uh tuh SIHNA ahi. Mi tengteng in sihna maituah diing i hi uh a, bangchibang sihna maituah diing i hi ua chih i theikei. Himahleh i hinna Toupa thilbangkim hihtheih i kikepsak chiang in haksatna, gentheihna leh buaina tuak mahlehang i lau kei uhi;
•Pathian Kha in a honbawl a, Thilbangkim hihthei hu in hinna honpia hi. -Job 33:4
•Ahi, sihna lim guam tawn mah leng, Gilou himhim ka lau kei ding; Nang ka kiang ah na om ngal a, na khetbuk leh na chiang in hon khamuan zel hi. -Sam 23:4
Hiai khovel ah zaw gimthuak ding him i hi uhi. Gingloumite thuakte ei Amah gingtate'n thuak kei le'ng kilawm hive'n, himahleh, Toupa'n Amah gingtu leh gingloute tung ah Ni sa sak in, vuah zu sak zel a gingloumite'n suanlam a neih theihlouhna diing uh ahi. Huaiziak in in tuah khempeuh ah kipahdan sin in, Toupa muang in Amah ah ginna koih ni, haksatna leh buaina tuah hun a i ginlah hial lehleng i ginlahna na-ngawn a hon panpihthei Pa amah hi.
•Hiai thute na kiang uah ka genta hi, Keimah a na khamuanna ding un. Khovel ah gimthuakna na nei ding uh, himahleh khamuangtak in om un, Ke’n khovel ka zouta, A chi hi. -Johan 16:33
•“Toupa, ka gingta hi, ka ginlahna honhuh in.” -Mark 9:24
Kha lui 31 in khosik nei in ka taksa noplouh dan ua kipan COVID-19 hi diing in ka kimuangmawh uhi (aziak bel Kikim in a sepna ah damlou natna hiivei va kemkha a, kituamna leh kivenna bangmah pelou ahihziak un), ki-ensak pah lou in ka theih dandan un ka ki-enkol pan ngal uhi. Himahleh ni khat chisa pha theilou a om in ka patau sim ua ka va ki-ensak uh a, Doctor pa'n khosik damdawi hon na pia hi. June 2, 2020 in ISIC Hospital ah khat ka vaki-test uhi (khat in avei leh khat a hi di sa chih ka ngaihdan uh ahi - ka taksa noplouh dan uh a kibat ziak in). June 5, 2020 in test results a hong suak a COVID-19 hii leng ka na vei kha taktak uhi. Himahleh test results a suah hun in a dan omluata ka hilim uh! Hospital leh Sorkal lamte'n hon phone zel mahle uh inn a ki-etkol ut ka hihdan uh ka kigen ua, hon phalsak uhi. Huchi'n June 19, 2020 (Sintawpni) in solkar lam in zalenna honpia ua, vei lai ka hi ding uam aw, vei nawnlou chih ka kithei kei uh (Govt.lam in test ngai nawnlou chi uh hive’n). Himahleh, kou le'ng damlawta ka kichi ua, pilvang tak in ka kizalensakta uhi.
Simtute, Na hon awlmawhna uh, na hon thumpihnate uh ziak a hiai tan tungthei ka hihman un kipak lua ung! Toupa'n midangte adi’a vualzawlna hisem thei ding in aleh tamsem in taksa chidamna, kipahna hon pia henla, hiai khovel hun haksatak lak ah honching in hon ompih zel hen chih ka thumna uh ahi.
Kipak lua ung!
