Khovel pumpi zelsuak natna kilohsawn baihlam leh lauhuai COVID-19 ziak in India ah ni 70 val bang Lockdown puan in a omta a, tuaziak in mi kuapeuh a neu-alian, a zawng-ahau in lam chi tuamtuam ah buaina liantak I tuak ua, tuak tou zel lai ding I bang uhi. Himahleh Pathian zahngaihna ziakin leh gamsung vaihawm tuamtuamte, CSO, Saptuam leh mimal panlaknate ziak in tuni tan dam a om in nek ding I sutuah thei ua kipahhuai I sa hi.
Lockdown ziak mah in gamsung khopi tuamtuam a organized hi’n unorganized sector a sepna tuamtuam nei I tuailai suanhuai tamtak, nu-le-pate leh sungkuan tampite kingakna hite a sepna munte uh kikhak ahihman in sem zom thei nawnlou in innlam chiat ah hong paikhe vengvung mai uhi!! Bangchik chiang a tua a sepnate uh kihong a vasem nawn thei ding uhiam chih I gen thei kei hi. Hiai omzia tuh I gam uah sepna neisa, summuhna neisa mi asang-a-sim in sepna nei nawn lou ding, sepna nei nawnlou tuh summuhna leng nei nawnlou ding chihna suak hi. I District sung uh abikin Lamka zang ah Laisiam tuailai sepna neilou 60% bang om ding a tuat ahi a, tuate behlap dingin khopi apan asang-a-simte honglut kik uh chihna ahi. Huaiziak in Lamka zang lel ah leng I nekzonna lam uh maban ding lungzinhuaipi suak hi. Himahleh hiai hun ah bangchibang a Government hi’n/ CSO tuamtuam leh mimal in panla a nekzonna puahpha ding, tua sepna mansuahte bangchibang a zang phatuam ding chih leh COVID-19 hipi apan bangchi kiven ding chihte sut I sawm kei.
Koigam peuh nek-le-tak haksatna, gilkial-dangtakna mun ah khelhna chituamtuam tam a, sum-le-pai muhtheihna ding ahihphot leh chi a poisak neihlouhna, guktak-laktakna in zui teitei hi. Ei gam leng tua bang lak ah I suakta tuan kei ua, maban ah leng I suakta sam kei ding chih theihsa ahi. Tua COVID-19 ziak a lockdown in I nektak-zonna hon subuai behlap ahihman in I Lamka zang mahmah uah leng guta-lata hongpung kei ding chih kua’n gen thei (diktatlouhna, thumanlouhna, kituahlouhna chiteng a mite hontheih lah I hita ngal ua)! Sapte’n, “A hungry man is an angry man” a chi uhi. Tua kia hilou in damdawi khamtheih-guihtheih a kibual leng I sikkhop uh hong kibeh lap ding hi. Tua ahihman in kuapeuh Gamsung vaihawmtute hi’n, CSO hileh pilvang tak a panlak poimoh ding hi. Sapte thupil in, “Prevention is better than cure” chi ahihman in hiai anuai a pilvanna di’a poimoh khenkhat buhpal lei dan a ngai in chiamteh le I chi hi:
1. Kuapeuh in mahni inn-le-lou hoihtak a venbit sawm ding, innngak omlou a inn pawtkhiak san vek chiin louh ding, pawtkhiak vek kul ahihleh kong, gate te hoihtak a kalh ding, invengte a om ua leh ana etzui sak/beng vak ding ua nget ding;
2. Fencing nei zouten gate hohtak a khak gige ding, Gate a Electric buld (LED) koih a compound sung nitak/ zanhun a vaaksa a koih ding. Mi theih ngeilouh in banghiam dot ahong neihleh innsung a lutsak lou in innkong/ gate ah kihoupih dan sin le’ng pilvanhuai/ bithuai hi;
3. Motor neite’n Motor sung /Car sung a van mantam leh manpha, i.e Wallet, Tablets, Laptop, Mobile Phone etc. a pawlam apan muh pailet theih dingte koihlouh ding;
4. Tolet/ kongkhak bul khawng a Mobile phone charge a koih louh ding or a pawlam apan sawkkhiak theih di’a koih louh ding;
5. Motor zanga kholak/ Bazar pawtna I neihleh pilvang tak a Motor parked ding, Motor lock/ kalh teitei ding ahi;
6. Kholak pawt/ Office kai a pawtkhiakna I neihleh a poimoh zahsang a tam sum kuahlouh ding;
7. A zatna ding om ahihkeileh ATM Card/Credit Card, PAN Card, etc. te kholak pawtna a vial tawitawi louh ding, himahleh mahni Identity proof na khat bek sakhau a kuah teitei ahoih, Emergency contact number tel in. A tung a Card poimohte leng wallet/money bag khat a kuah khawm tektuk louh a pilvanhuai;
8. Sana khutbuh, khibah, zungbuh, tau, etc. mantam taktak taksa tung a kholang taktak a bun/ thuah a kholai vial pawtpawt louh ahoih;
9. Mobile Phone Handset hoihtak tak mi muh a zattam luatlouh a pilvanhuai/ bithuai;
10. Meltheih ngeilouh in amah/ amau Motor a tuang di’a honzot uleh nial ding ahi;
11. Naupang neite’n kholak mawkvak saklouh ding ahi. Vakkhiak kul ahihleh a hohna ding uh theihpih a hongtung haklou ding ua hilh ding ahi;
12. Kholak pawt in mitangpi zuih lampite zuih ding ahi. Kua zuih luatlouh lampi leh inn kawmkal khawng peuh zuihlouh ding ahi;
13. Khopi a omte adingin kholak pawtna ah CAB/ TAXI zang I hihleh a number chiamteh ding ahi. Mahni Motor nei I hih keileh public transport te zat a bit huaipen;
14. Zing walking pai zel na hihleh khovak chiah pai pan inla, nitaklam pai zel nahihleh khomial ma in inn tungkik in;
15. Naupang tuition la omleh a lian in vakhak a, vapi zel ahoih;
16. I huangvulh-gantate nangawn uh bit nawnlou ahihman un tua bang ganvulh neite’n pilvang tak a kep ding ahi. A omna buuk uh tanvaak ding light thuah ahoih hi;
17. Social Media khawng, Internet khawng a mahni personal detail khawng koih khiakkhiak louh a pilvanhuai/bithuai hi;
18. Tulai hun a mi a tam zaw in FACE MASK thuah chiat ding ahihman un Identification bawl haksa ding hi.
Bangteng hileh khelhna a dim khovel a khosa lai I hihman in khelhnate nawk phaklouh in I khosa thei nai kei ding, himahleh mimal leh innkuan in mahni kivenbitna dingin pan I la thei. Tua ahihman in mimal/ innkuan in tua kivenbitna omthei liaite ngaih poimoh mahmah ding ahi. Aziak bel Solkar/ Police in mimal bitna enzui senglou ahi uh. Inn kiluh hiam, guta-lata in van a guk leh Police a Report bawl ngeingei ding ahi. Gamsung Dan dungzui a mikhial in a khelhman a thuak/ tawi ding ahi. Inndongta vai khawng a genveng zel hoih lua bangmah leh a khialtu lam ah bawlhoihna om tuanlou hi a theih ahihman in, tuate chiin tamlouh ahoih hi. Hun nanung lam a thiltung ding 2 Timothi 3:1-9 a kigen bang in tamtak tangtungta a, tunglel lel leh hongtung lai ding le om ahihman in mimal pilvanna a kikep theih tan a kikep a aban Pathian khut a ngakh ding ahi.
Toupa’n simtute hon vualzawl hen!
….
*Thugelh honpetu CBI (Special Crime-I), New Delhi a seem Addl. SP lenlel, sepna a ettontaak leh vaihawmna konga kiva heutu suanhuai khat ahi. Lungdam lua.
