1. Heutupa Mang, cibai aw. National Highway (NH) a gari tuahsia-a sihna-manna tuak mi tampi omlai a nou June 18, 2020 zinglam baihtak a na tuah uh lung phawng lua thu hi. Serious & critical condition a damdawi-inn tut a om, kal khat (one week) cing minmen a dd-inn pusuahsan thei a n’ong om uh bang le thupi/ lamdang nawnsawn. Hiai ni (June 17-18 kawmtuah) a thiltung tomkim in n’on gen thei dia’m?
Dawnna: Amasapen in, hinna tung a thunei, muantak Pathian in hichi bang hun mu thei a ka hinna hon humbit sak lai manin A’ min ka phat hi.
Tutung gari tuahsiatna huaise tak kei, ka tanu Rosie Khawlthienmawi, leh Unaupa Liankhosiam Vaiphei (Siama) te’n ka maituahte uapan Pathian humbitna thupi leh lamdangte ka gel kik chiangin, kumpi David thugen, "Tangtawn Toupa Pathan aw, kei kua ka hia, ka innkuante zong bang hi uh ahia, hiai tantan na honpi?" chi a ana gen, ka lungsim ah honglang.
Christian Institute of Health Sciences and Research, Dimapur, Nagaland a ka tanu GNM 1st year zillai lock-down ziak a koltang June 17, 2020 ni in Dimapur airport apat flight a Guwahati airport honzuan Unaupa Siama toh Siliguri (West Bengal) apat ka vadawn uhi. Flight hongtun zekai banah Covid-19 toh kisai paperwork Rosie in a sai zohin thumna saulou nei in NH-31 ‘C’ tawn in ka zan kiik uhi. Assam state pel khin West Bengal sung bangtanhiam ka tai nung un Alipurdoar gammang (forested) lakah zalmang ale mat uthuailou khop tuahsiatna June 18, zinglam dak 1.30 am velin ka maituah uhi. Vuah zu in mial mahmah a, mihing lam hihtheina tan ah pilvang huntawk in gari leng hek (drive) in ka kithei hi. Himahleh gintak hetlouhpi’n ka mailam (opposite direction) apan truck/ lorry hongtai headlight in ka mai a salh toh kituak in ka ma ua truck lianpi van adim-a-pua khawl lai ka phusuk tamai hi.
Ka lawm tegel ka sap leh a hon dawngkei ua, kei lah ka awm ana mahmah hi. Huchi in ka seatbelt sutkhia in ka lawmte phawnghalh tum in sap toh sawi (sawiliing) toh ka thuah a, bangtan hiam nung in khua honphawk ua kei leng ka hihthei dandan gari apan khumkhia in ka phutkhak truck lam manoh in ka pai hi. Amau panpihna ka ngen ngal a, himahleh khomial nuai ah a truck sung uah lutin hon taimang san daih uhi. Sawtlou nungin gari lian leh neu hong taite panpihna ngenin khut zaak leh kikou thuah in ka ban sap hi. Hon ngaihsak a omkei ua, a hon tailiam san zel uhi. Ahong khawlsunte’n le hon gal-et thoh in kilehkik zel ua, a phone te uh koulam nga a vak zualzual (flashes) te’n ka lim uh la hi-ngei ding un ka ging hi. Kei leng beidong kisa in lamlian lai ah ka vadingtop mai a, truck hongtai masapen kha kham (khawl) sak zou khong hi. Amau hongpai in sikchiang (iron rod) toh pangin gari kongkhak kal hong thei in Miss Rosie, a mai a sisan pak ningneng leh Mr Siama, a tal leh a khut veilam a sisan luang, zoi nilnel hon lakkhiatpih ua, police hon sapsak in tua khit hon paisan uhi. Ka phone ka On dek leh battery bei ana hi a, Siama' phone (pucca road a lengkhia) ka top zat ka sawm leh ana ki-lock zel a, ka tanu phone gari seat pocket a kikoih in ka zi ka phone leh network ana om zenzen a, Pastor Thangcha Gangte, Jaigoan - 30km vel a om - hon delh ding in ka sawl hi. Mr Siama khutguh kitan a thuak nopdeuh khakleh chi’n plastic gari part lampi lai a lengkhia tawm zokin a khut meitei dial (towel) ka zat lai zang in ka gaaksak hi. Minit 30 vel pai nung in highway police patrolling te Tata Sumo gari in mi thum hongtung ua, ka detail uh leh bangbanghiam a buaipih zoh un Alipurdoar govt hospital, 9 km vel a gamla hontun uhi.
2. Aw… ahihleh, na tuahsiatna mun uh Alipurdoar (WB), NH 31 ’C’ apan damdawi-inn puaktung a na omdan uh, dd-inn a seemte hon na etkoldan tangpi leh tu a bang dinmun (condition) a doctor-te’n hon pawtsak ahi uale?
Dawnna: Covid-19 ziak hi ding in ka ngaihtuah a, police te hi'n Alipurdoar govt hospital a duty te hitaleh hon mullit uh hi'n ka thei. Police te gari zanga hospital ka kipuak tung dek unle kou leh kou ka kibuaipih ua, huchimah bang in hospital ah leng gari apan kumkhiat leh stretcher a kizawn ding natawm hospital staff te sap petmah a ngai uh. Kei lah agik ka dom chiangin husam ding bangin ka om a, a tawlhuai mahmah. Siliguri zuan a Ambulance gari 2 a dakkal 4 lam pai di’a ka kipuakkhiat chiang un bel Pastor Thangcha Gangte leh a hon delhpih mi thumte’n hon buaipih vek uh.
Siliguri ah Neotia Hospital kichi ah puaklut in ka om ua, a ni khat ni in Covid-19 test leh investigation in bei. Ani nih ni in bel ka liamma uh zil in major surgeries leh treatment hon zohpih uh. Kei, ka nakguh nih (rib bones) ana khaang (crack) a, Rosie ahihleh ataklam khut ngawng guh leh a nakguh (nose bones) kitan a, Siama pen ahihleh aban veilam, nakguh (ribs/rib bones) 4 akitan banah a tal leng kikhui hi. Ni thum sung ICU leh Critical Care Unit te ah etkhol in ka om ua, huchi'n ward ah suan in ka om uh hi. Doctor te’n, kei leh Rosie hospital apat ni 4 zoh in hon discharge ua, Siama pen ni 6 zoh in hon discharge uh.
Ka liamna uh nasalou ahi hiam, ahihkeileh doctor te siam ziak - bangmah ka theikei. Himahleh hiai ka thei, hiai ka tuahsiatna uah Pathian in ahon ompih tawntung.
3. Thupi lua, lamdang lua! WAYMAKER laphuaktu in, “You are way Maker, miracle Worker, promise Keeper, Light in the darkness my God, that is who You are” ana cih phawkhuai ei. Nou, Siliguri a na omna uh sawtta hia? Bang seem a om?
Dawnna: Kum 7 bang val ding hita. Pathian nasep theihna ahihleh chi in mission school pan ding a kisa himahle ung, Pathan in lemsa nailou hia, ahihkeileh tua ka sep mah hon deihzaw, a mun leh gam thu a buaina neneuh om ziakin school lam bawl khawlsan photin, kipaktakin mission a lunglut saptuam hiam Christian mission organization tuamtuamte toh kei mimal pantheihna ah ka sem hi. Siliguri Bible Fellowship, Eimi Christian Fellowship, Siliguri te banah Himalayan Mission Field (EBC mission field te lak a khat) te ah theih bangbang in ka kizang.
4. Kidong sau laile. Simtute theihtheih di’n nang-le-nang (koi khua suak, koi a khanglian, innkuan khawsa dinmun & adg.) n’ong kigen thei dia’m? TOUPA min thupina di’n…
Dawnna: Ka min Ngulsuanmang Songput; Khua: Bungmual, Lamka; Ka pa min (L) Thangkim; Ka nu min (L) Ngainem. Unau 7 ka pha ua, kei alianlam apat sim in a 6na. Ka pianpih sanggamte’n hon dampih chiat lai uh. Laizilna lam ah MA leh B.Th ka zou. Ka zi min: Nu Elizabeth Songput. Ka tate: (a) Miss Rosie Khawlthienmawi (19), (b) Mr. Samuel Paugoumuan leh (c) Mr Nathaniel Thanglianlal.
Ka nu-le-pa'n hon omlouhsan baih man un Gilgal Children Home/ Mount Carmel School, Mualvaiphei, Lamka ah ka neulai hun tamzaw huai ah ka zang hi. Ka graduate zoh in Mount Carmel School ah ka seem a, 1997 namkal buai ziakin Tamil Nadu ah school enkol in ka omtou a, 2012 in Siliguri, West Bengal ah ka innkuan un ka kisuan uhi.
5. Hibang thil na tuah uh n’on gente’n Khrist a unau mi bangzahhiamte hinna ah thu gen di (tha pe di), gingloumi a thu zakha leh theikhate hinna tanpha lawng lai di cih I lamet leh thumna ahi, heutupa. Simtute bang vaikhah nop na nei…?
Dawnna: Zan (26/06) in ka gari laakna Mahindra company showroom, Siliguri ah ka zi toh thil omdan ka vagen ua leh ka gari uh kisia phone a limlak en kawm in amau company bawl gari hikeileh hinglou hial ding ka hihdan uh hon-gen a, ke’n, “Ka Pathian un honven ziak a dam ka hi uh” ka chi hi.
Tutung ka tuahsiatna thu uh zakha peuhmah, honthei ngeiloute natanin lainatna toh honna thumsak uh chih ka thei a, kou adi’a thumpihtu kibehlap ahihmanin Pathian in ka tuah ding ua phal hiding in ka um hi. Hon na thumsakte tung ah leng lungsim tawng apan ka kipahna thu ka gen hi. Ki-enkol lai ka hihman un hehpitakin honna thumpih lai unla, hon na thumpih toutou un.
Pathian in koute ading thumsaktu leh panpihtu ding hon na koihsakte genbeh ka utlai hi. Amaute: Eimi Christian Fellowship, EBCC Bhuttabari, Kuki Welfare Society, Naga Christian Fellowship, Siliguri Bible Fellowship, Zion Church (EOC mission field).
Mihingte’n vangsia I kisaknate, thuak tam tuam lua i kisaknate, Pathian lemgel I bat phaklouh luat ziak hizaw ding hita e, chih tutung ka thiltuahte’n hon ngaihtuah thak sak (Isai 55:9); (God's) blessings in disguise. Muantak Pathian min phat in om hen!
