Aw u-le-naute aw bang selung I gel hiam
I nuntakna simlei siatna’n a dim zouta.
Bible thugente zong nisim in tangtung zel
Zan bei ding ahita khua vak ding ahita.
Sakkik: Aw na lung a kim na diam?
Aw na kha a muangta hiam?
Na hihna bangbang in Toupa’n vaihawm ding hi
Aw unau na lung akim na dia’m?
Sihna’n zoh lah nei lou natna’n zoh lah nei lou
Khelhna’n kuamah khen lou siatna’n deidan nei lou
Khelhna nasem mite nisim khial semsem ding
Thil hoih hihte sunchin in hoih semsem ding uh.
Ni khat ni chiang Toupa’n namte vaihawm ding a
A thil hih bang zel un kipahman a sang ding ua
Khuk khempeuh khukdin ding lei khempeuh kiphuang ding
Na ding ngam na ding hiam tua ni mulkim huai ah?
https://www.youtube.com/watch?v=MU559_Q51oE
Laa hongpian dan: Pathian min thupi na di’n ka hon gen di, simtute alakdan na siam di’n k’on ngen masa. Kum 2009 July-September, kha thum sung vingveng thil ka muh khempeuh kinawh petmah in ka mu a, lamdang ka sa petmah hi. Thil omdan lah ka theisiam ngal kei a… Pathian kiang ah, “Toupa hiai ka thil muhdan bangchidan ahia?” chi in ka mit bang ka nuainuai a, kei muhdan diklou hi’n teh peuh chi in ka dong zel a himahleh ka theisiam tuankei! Huchi’a nitenga Toupa kianga ka thum zel lai in ni khat tuh Pathian in honhilh a hingei di’a, huchia ka thum lai in, ka lungsim ah, “Hiai na thil muhte, Kei hon phawk lou mihingte’n khovel, a thupina toh mangthang dingte, delh a kinoh hehu uh ahi chi dan in ka thei mawk a; lamdang ka sa mahmah hi. Lamdang sa a ka lungkham mahmah lai in, ni khat tuh hichi’n ka thumta hi: “TOUPA, ke’n lah na hon itna na hon tatna thu gensiam lou, sa siam lou ka hihmanin bang hih ding ka hia?” chi a ka buai mahmah lai in Toupa’n, Hiai mite lak a thugen poimoh sa ahihdan ahong lang a, “Toupa, ke’n lah gen siam lou ing a, zan lah bei ding hita, khua lah vak ding… na hong paina ding nai petmahta ahihmanin hiai thu a na za leh a na ngaikhe kha peuhmahte kiang ah Na min in dotna ka dong mai di awle…” chi in, huai ni in a ka Laisiangthou sim tungtawn in hiai laa dotna ka hon bawl thei mawk ahi (Laa, tang 1na leh sakkik en mah in).
Tang 1na: Mihingte, i nu i pa Khristian sahkhua zui ana hihna un ei a tate uh hon hondam ahimawk kei a, phet lou in kha muangloupi khamuang dandan in mi tampi ki-om; lungkim loupi lungkim dandan a om le tampi ki-om bok a, huai in ka lungsim hon na sak mahmah ahihman a sakkik hongpiang ahi.
Sakkik: Hiai dotna bawl di’n kei ka kisit mahmah a, himahleh Toupa’n poimoh sa ahi chih lah ka lungsim ah alian/ achiang mahmah zel hi.
Tang 2na: Khovel mihingte’n bangchituk in damna ding deih in hauhsakna/ damna zong mah le’ng sum-le-pai a damna om lou, milian-mihaute leng sihna-natna in khen lou. Khelhna lah khovel a pung deuhdeuh siatna lah niteng a uang deuhdeuh ahihman in kuamah sihna-natna mai a pang zou om lou ahihdan honglang a, huchi’n hiai tang nihna a hongpiang ahi.
Tang 3na: Toupa’n, mitengteng Ka ma ah khukdin ding ahi A chih bang in mihingte’n leitung I damsung in I tangtawn mun ding ngaihtuah lou in Pathian hon itna phawk lou in om mahle’ng ni khattei I hihna bangbang asia-apha in Toupa’n vaihawmna a honpi lut ding hi. Tua ahihman in tu I damsung in Jesu Khrist I hondampa di’a sang in nei le, Toupa’ vaihawmna mai a I din chianga siamtang a om thei di - kibawlpha mahmah le chih vei petmahna toh tang 3na hon kigelhkhia ahi.
Toupa’n hiai thu a sim leh a sate banah a ngaikhe kha tengteng midang en lou a eimah kiveel a Toupa ma a ki-enchian thak thei di’n hon vualzawl mahmah hen aw!
