Ka omna khua uh Seebara, Chitradurga District, Karnataka state a khawta (lianlou) khat National Highway No.48 in a totkhak ah ka nupa un ka va khosa liklik uhi.
Huai khua ah Khristian tamlou chik ana om lii-liai in amaute toh nuamtak in ka khosa uhi. Hiai mun ka tun tunglai un naupangte'n a hon mu nuam thei mahmah mai uhi. Himahleh June 1, 2014 tan in zaw ka kineel panta ua ka inn uah hong om/ten chilh chih theih bang khop phial in hongneel ua hong maingal theita uhi.
Kou ngei leng naupang honte' makaih in ahon chih dandan uh zui a khosak pan leng ka hipen mai uhi. Govt in a gamsiit (reserved area) mun khat ah singkung khawng om in huai ah theigah khawng ka valou ua nuam sak in ka sak thoh uhi.
A haksatna lam gen le, a khua ah tui ni khat in khatvei chauh kaai a huai hunsung a a deih teng in Bel a va kidawh va kipuak/ kitawi chiat ding ahi. Electric ahihleh nitak in dakkal 8 sung vak a sun (day time) chiang in dakkal 4 vak hi. March leh April lak vel khua lum chihtak in a lum a, a gam ah singkung muh ding avang mahmah hi. Suang ahihleh a tam petmah mai hi, a khaw mite' kivakna leh nekmuhna tuh suang valaak a zuak ahitangpi hi.
Huchibang hun in ka heutute un Field Khawmpi neih ding ahon sawm ua kou khua a Khristian om teng toh Chitradurga khua ah Khawmpi in ka vahoh ua May 29-30 sung Khawmpi ka nei ua lohching leh nuamtak a zou in May 31 in ka omna khua uh nitak in ka tungkik uhi.
June 1 zingkal baihtak in phone a hong ging a, ka lawinu Chiinlalnem’ pa Pu K. Luaikhanpau, Bungmual a lupna apan thou nawnlou ahihdan hon hilh ua; Kou leng loh theih, bawl theih lah omlou (chih bel, a luang bek lap a delh ding chihlah thil hithei vuallou), phone bawl kual a kihoupih tuh hihtheih tawp ahimai hi.
Huai hunsung in tui tawi a hong hun a, Nenem tuang tung a lupna kizial tung a tukawm in phone a pau kawm in akallak in hong kapkhe zel a, akallak in kidiik hut-hut zel in haksa tak in hun a zang hi. Kei lah tua tuikaai va tawi kei le’ng zingchiang ka ngaak ngai ding ahihman in, tuitawi ding in ka vadiankhiak san a ngai zel hi. Ka kuanlam in ka inn kiang ua naupang khat kiang ah thil omdan ka gen leh ama’n leng anu ana hilh ahi ngei di’a, tui tawi khatvei ka vatun in ka innvengnu uh innsung kongbul ah ana tu a, Nenem ahihleh zanpuan zial tung ah tu in akidiikdiik mai hi. Amaute gel ka muh chiang in hehpihhuai ka sa sawnsawn a, aziak tuh hiai mun a ki-om pan, kitung tuung phet, pau kitheituah lou ka hi uhi. Ka innvengnu un vaipau hi’n sappau (english) hileh mal khat le theilou bang ahi, kou lah amau pau (Kannada) a malmal a thei panpan ka hih chiang un, huchibang lak a hichipi tuak ka hihna uah numeite ka hehpih mahmah mai hi. A lehlam a i et lehlah nuihzat huaipi khat lehsuah theileh kilawm - Pau kitheituah omlou a kingaina tak a omkhawm, i gennop kigen thei zaw sam omlou ahihna ah, a kallak in ke’n tuitawi ding in ka pawtsan a ngai zel hi.
Tui ka ngah tak in phone ka la a, mi ka ban houpih a, amau hon khamuan ban uah hon thumsak ua, huaite'n Nenem leng a tawldamsak deuh hi’n ka thei hi. Huchih sungin ka seppih leh ka heutu uh kou toh kinai pen leng a hongtung a kikhopna khawng nei a ka hong buai uh leh Pathian ompihna toh lungngaihnate leng hong zaangkhai in a dan hong om deuh abang hi.
Pau leh ham kibatpih omlouhna mun a om a haksatna tuah dan ka vachiam khata ua, huaite adi’a thumsak apoimoh dan ka vamukhe semsem uhi. Nang na sawlkhiak Missionaryte adi’n nana thumta hia? Phone in bangzah vei na call ta a? Hiaite khawng innmun a omte' ading in houchik bang mahleh melmak gam leh theih ngeilouh gam a omte' ading in ging kilawm leh khamuantu hi gige ahi.
[The Longest Hour chih article ka gelh a behlapna dan ahihban ah, huai tui ka vatawi sung nidang a zingkal hun ka zatna dan tangpi uh himahleh huai ni sawt ka sak diak ziak in i Topic toh leng a hong kizawitawn thou sa in ka hon behlap zek hi. ~Laigelhtu].
