Tu kum 2020 tan hong dampih lai ka Pa toh pate ni muthei leh zang thei a ka om manin ka lungdamna lian mahmah hi. Dam lai, muhtheih lai leh zak theih lai khawng mah a itna kilahkhiat pen a thupi mahmah thu khat hi. Ka Pa nuntakna pan in ka muh leh ka phawkkhiat thu manpha mahmah ka sak pawl khat, amah ka itna leh zahtakna etsakna in ka hong gelhkhia hi.
Ka Pa pen:
Mi chitak (Integrity nei) mahmah leh muantheih mi khat hi. Mimal ki-ukzohna (Discipline) nei mi khat hi. Mi kamtam hetlou leh a kisam mahmah loute ah mawk paupau lou hi. Kuhkal takin a sep khat peuhpeuh sem in zouden hi. Khotanou a omlai pek pan in, midang bang in damtheihna lam ah hatlou ahihman in zaanglou leh singtang lou nasep ah mi kipat ma in hong kipatpih pahpah zel ahihmanin mi nung ah ki-om ngeilou hi.
Jesu Khrist ah Pianthakna kichiantak leh nuntakna zong nei hi. Lai Siangthou pan in Pasian houpihna a zakna leh ki-apna pen (Johan 9) sung hi.
Mimal kitoudelh (self-support) theih ding leh midang buaisak lou a nuntakna zat pen apaipih kichian khat leh a tate hong pattahna zong ahi hi. A sanggamte leh a sungte (in-laws te) zong zahtakna lianpi nei hi. Ka Nu zong it mahmah hi.
A Pa leh Nu te zong it in zahtakna toh a sih tan uh lungkimhuai tak in kemsuak hi.
Pawlpi lam Pasian nasepna ah, ka naupang lai pan in sumkem in kum 2003 tan dong pang suak hi. Mission, sang (skul) chairman leh khosung youth club makai in zong mohpuaknate na neitou zel in a sep theihtawp suah in sem hi.
Atel (theihchet) mahmah thu lou buang gen lou hi. Nipi sang leh Biakpiaknate ah hong hanchiampih den in, innkuan kikhopnate ah thunget leh thugennate ah hong pattah den hi.
Na sepna lam sang ah akisam bangbang thalawp tak a sep ding zia zong ama’ nuntakna pan in hong lakden hi (Pasal leh Numei sep ding chih tuam omsak se lou hi); a poimoh leh kisapna bang a sep ding chi te ahi. A’ Pa leh Nu tung ah khut khatvei zong na kha ngeilou hi. Khut leh khe zangin innsung leh mundang ah ka Nu tung ah gamtat sia ngeilou a, kamdam tak zangzaw hi.
Pasian a thupipen a koih in nuntakna zang a, Sum a neih tawmnoute zeeksiam mahmah mi khat zong ahi hi. Tuni tan hun ka zatkhop touhnate panin ka Pa thupi ka sakna leh ka itna tel semsem ing. Kei adingin ka khalam leh taksa nuntakna lam ah etteh (model) hoihtak zong a hong hi toutou hi.
Pasian in tukum 2020, Pa cih ding ahong piaklai a, damkhawm lai na hihleh na Pa tung ah na lungdamna leh na itnana lak manghilh ke’n maw, lawm. Kumkik, Pate ni in bangchibang in hun zang ding na hiam, theikhol omlou hi.
Pa hinapi a ahoih hizou nailou na hihkhak leh pate ni leitungbup in a zat toh kiton in nuntakna thak zangta dingin kipan in.
Tapa hi a, Pa hoih nei kisalou a lungdamna ding nei lou na hihkhak leh nang khang apat in Pa hoih leh manpha hih ding hanchiam in. Na khang khek ding in Pasian muang kawm in kipan in. Ama’n hong tangtunpih ding hi.
Ei Zosuan atam zothamte pen, i it leh ngaihte damlouh/ om nawnlouh nung khawnga pil mahmah pante hileng kilawm sa ing.
Tua ahihman in i hun hoih leh manpha tak te uh mawkbei sak kei ni maw, sanggam.
Pasian in simtute Thupha hong petekta hen!
