Pate Happy Father’s Day
Tuni Pate Ni ahih tawh kitonin Pate Manphatna tamlo i gen nuam hi.
I . Pate Manphatna
1. Pa’ kici kammal pen kipatna a piangsak, pianna bul cihna ahi hi. “Eite khempeuh in eite a hong piangsak Pasian ahi Pa khat bek nei hilo i hi hiam?” (Mal. 2:10). Leitung ah Pa kici ana om kei leh innkuan hizahta omlo dinga, ei mihingte zong kipiang lo ding hi cih theih hi.
2. Pasian pen mi khempeuh pa hi a, innkuan a pate pen innkuante’ pa hi a, pawlpi leh siate leh makaite pen pawlpi mite’ pa ahi uh hi. Pate pen bangzahin manpha hi uh hiam!!
3. Pasian in pate pen innkuan sungah lutang (head) pen in koih hi. Efesa 5:23. Pate pen nuntakna a piapa leh thunei pen, innkuan sung vaihawm pen ahi uh hi. (Paun.23:2). Tua ahih manin Innkuan sung lawhcinna kipat nading pate ahi uh cih i phawkthak ding hi. Innkuan mite in khalam leh sa lamah hinna a neih nading un mawhpuakna lianpi pate in nei hi. Innkuan sungah lutang pen ahihmah bangun, innkuanpihte koi lamah, bang lamah i paipih hiam cih kivelhuai mahmah hi.
Mite’n Pate manphatna a gen uh pawlkhatte:
PATE pen:
a) innkuan sung khaikhawm pen ahi uh hi
b) Pasian leh innkuan kal ah palai ahi uh hi
c) Innkuan siampi ahi uh hi
d) Zi leh tate Pasian thu ah makai hoihpen ahi uh hi
e) Nek-le-tak zonna ah makaipi pen ahi uh hi
f) Innkuan mite adingin thupha leh thusia kengkhawm ahih man un mawhpuakna lianpi nei hi.
Zite’n Pasalte:
a) Pa banga hong nei uh ahih manin it siamin makaih siam ding ahi hi
b) Lawm banga hong nei uh ahih manin kipahna leh dahna, lungnopna leh lungkhamna genpih ngamin om ding hi. Zite thugen limtakin ngaihkhiatsak ding ahi hi.
c) Pasal banga hong nei uh ahih manin khalam leh salam ah vak (feed) in kem siam ding hi.
Ii. Pate Thupina
Pasianin thu lian leh na thupite ah pasalte kiangah thu gen hi.
1) Adam: Topa Pasian in mipa thu pia a, “Na ut-utin huan sung singgah khempeuh na ne thei ding ...” ci hi. Piancil 2:16-17
2) Abraham: Topa in Abraham kiangah, “Na gam leh na beh leh na pa’ inn panin nang kong lah ding gam ah pai in ...” ci hi. Piancil 12:1 -3
3) Tote na kisema, tote gamh kiluah thei lo a, pate gamh bek kiluah thei hi. Paunak 19:14
Tua hi a, zi leh tate kepna leh Pasian makaihna ah Pasian dongin thungetna tawh Pasian aw ngaikhia in, tate’n i gamh a luahsawn ding uh a hoihnate lungngai kawmin hinkhua zangin kidawm siam kawmin nuntak sawm ding hi.
Iii Pate In Thupha Nei Hi
Isak leh Rebekah te nupa in tapeeng nei uha, Esau leh Jakob ahi uh hi. Isakin Esau it a, Rebekah in Jakob a it hi. Isak teekin upa ta ahih manin a tapa Esau sam in, ama’ ading sa beng in, meh lim an lim bawl dingin gamlak ah sawl in, thupha kong pe ding hi, ci hi. Rebekah in tua thu za in a nau zaw Jakob samin a pa meh lim, an lim bawl dingin hilh hi. Jakob in a nu thuhilh bangin keelno nih la a, a nu kiangah paipih hi. A nu in a pa duh bangin meh lim bawlsak hi. A nu in a u Esau kizepna puan hoihpen te silh saka, a khut leh a ngawng ah keelno vunte silhsakin, a bawlsa meh lim leh an lim a tapa Jakob a pia hi.
Jakobin a pa kiangah tuate paipiha, a pa in ne hi. Isakin Jakob thupha pia a:
“Pasianin na tungah vantung daitui hong pia henla, na lote hoihsak ta hen. An leh leenggahzu tampi hong pia ta hen.
Mite in nangma na hong sem hen la, minamte na mai ah hong kunta uh hen. Na sanggamte tungah topa hi in la, na sanggamte’ suan-le-khakte, na mai ah hong kun uh hen. Nang hong samsia peuhmah in samsiatna ngah henla, nang thupha hong pia peuhmah in thupha ngahta hen,” a ci hi.
Isakin a tapa Jakob thupha a piak khit phetin a gamvakna panin Esau hong tung hi. Amah in zong an lim bawl in, a pa kiangah hong paipiha, a pa in “na sanggampa thupha pe khin ka hih manin amahin thupha ngah ding hi,” ci hi. Tua ciangin Isakin:
“En in, leitung pana piang an leh leenggahzu na nei kei dinga, na lo adingin vantung daituite na ngah kei ding hi.
Na namsau tawh nang na nungta dinga, na sanggampa’ na na sem ding hi. Ahih hangin amah na langpan ciangin ama khut nuai panin na lengkhia ding hi,” a ci hi. Piancil 27:1 - 40
Atunga thute tungtawnin, pate - manpha in, thupi in, thupha nei uh hi, cih i phawk ding hi. Amaute zahtak in, a thu uh mangin i pahtawi ding hi. Amaute i leitung Pasian a hih man un, thupha hong piak theih nading un amau lungkimna i zong ding hi.
Pate in zong i zi leh tate samsia lo in, thupha i pia ding hi. Topa’n thupha hong pia ciat ta hen!
….
*Thugelh honpia heutunu, Nu Hoihnu pen Sia (Rev.) Suan Khan Thang’ ji hi. A pasal, ta & tu te tawh Harinagar ah khawsa lel uh. Lungdam lua hi.
