“Ka tate thutakah a om uh chih ka zak kana kipahna thupi zaw himhim ka neikei hi”. 3 Johan 4
Simtute tengteng Pate’ Ni Chibai,
Tate Pathian’ thutaka a omtheihna dingun, pa dinmuna ding kuapeuh zuih di’a hoih leh kalbi poimohte, kei tel in, I vek ua kilatna hileh chih ka thumna ahi.
1. Innkote’ omdan ding gentu leh geltu (2 Kum 20:1). A damlai a ka Pu’n poimohngaih a hon hihpih sek ka mangngilh theihlouh tampite’ laka khat tuh ahithei tana innkuan kima ankuang umkhawm teitei ahi. Zing-an kuang pen kizat dingdan gelkhawmna hun ahi chi a, nitak-an kuang ahihleh sun hun zatdante kikupkhawmna chi hi. Innkuan sunga kuapeuhin mahni nna poimoh omte leh kizat dingdante khat-le-khat kitheihpihtuahna hun leh mimal vai leh innkuan vai omte apoimoh masa banga volh (prioritized) na hun ahi chi’n poimohngaih mahmah hi. Mimal’ nna poimoh sanga poimohzaw om hun in, mahni nnate thulh a, etsakna di’n innvengte’ thachialna a kuan ding, inndongta taakna muna sep ding om huna vasem ding leh adangdang, nna poimoh omte apoimoh masa dungzui in lepsak leh gelsakna hun in hon zatpih sek hi. Hiai paidan, Bible hon sinsakdan zuihna khat ahi a, lam tampi ah innsung navakna bulpi leng ahi bok. Innsunga pa pen mohpuakna tuh khalam leh salama innkuante’ zuih ding thuhoih-laahoihte kichian taka gelfelsakna ahi.
2. A paina ding lampi a naupang chiiltu (Pau 22:6). Tate skul hoihpen deihsakin nu-le-pate huai zongin kivialdian hi. Pa tamzawte’n tate school a khumlut ahih nakleh thilbangkim slulte’ hilh leh sinsak di’a lamen a ngavek I batna uh a om. Tua dingdan zaw ana hikhin veklou ahi. Skul in thilhoih tampi sinsak in chiil theitham, ahihhangin mahni mohpuakna ki-awngsut a anen-ahama kingak pumlum ding ahi ngalkei. Felna leh pilna bukim laibu leh skul kia ah om veklou a, innsung mahmah a kisinsak ding atamzaw tham om hi. Skul leh inn pawlam sang in innsunga pa’ mohpuakna lianpena, atantuan ahi. Mihingin I kisinsaktheih pilna leh siamnate abukim in afelkim hetkei, huaiziakin bangkim pethei Pathian kiang kia ah bukimna om a, Amah belte’n huaite mubehlap ahizaw. Huai lampi mahleng hilh leh sinsaka piitu ding pate I hi uh.
3. Chiklaipeuha phatuamngaitak leh tawlngaloua hilhtu (Diut 6:7-9). Phatuamngaitaka tate hilh chiatchiat ding ahihlaiin, kitaithoh leh salhthoh lam tamzaw khadek nak ahi de aw, hon chisak hi. Akhenin innkuan kikhopna hunte phatkhawmna hun a zanglou a, kitai leh salhna hun kia a I zatkhak ding lauhuaipi ahi. Kikhopna nei tham ni, ahihhangin kikhopna hun pen Pathian phatkhawm leh pahtawikhawmna hun hizaw henla, tate thuhoih-laahoih hilhna dingin kikhopna hun kia ahih tellouh ding, chi I hizaw. Tate toh kimuhtuah leh kihoulimna kikhopna neih chiang kia lel ahihlouha, atamthei bangpen ahihzawk ding ahi. I pansan Bible tang in agen bangin I tut chiang bang, lampi I pailai bang, I lup leh thoh chiangin leng, chiklaipeuha phatuamngaitaka hilh ding a chi hi. Hiai sepsuah theihna ding in tate toh tutkhawm, vakkhawm, lup-hun leh thoh-hun kibatsak, leh kithuahmun poimoh ahihdan hon muchiansak hi. Tate hilhna dia hunsehtuam nei a, huailou hunte a ngaihsak khalou I hihtel louh ding uh ahi.
4. Kichiantaka a gah loh ding toh thuhilhna leh kawkmuhtu (Pau 3:1-35). Thuhilhna kichi kitaina kia ahizenzen kei a, hawmthohtak leh ittaka I gamtat-khohei kilawmte a muhsakna in kama gentaang tampi genkhin hipah hi. Tate’ kianga azuih ding uh thu-le-laa hoihte I piaksawn ma a eimah I kimindimdem phot poimoh hi. Kihilhna khempeuh kivauthoh leh kitaithoh hizaw kei henla, ahoihzia leh hoihlouh zia bukkaka kikawkmuhna lamin paizawleh asaangtu adi’n nek nuamzaw ding. I taangteel ua, “Ka tapa, ka dan mangngilh ke'n; himahleh ka thupiakte na lungtang in kem hen....” chih I mu. Tate mangngilhlouh ding dan I bawlsak hia? Tate’n alungtang ua akep ding uh thupiak I pia hia? Banah, huaite Toupa’ dan leh thupiakte toh kituak hina hiam, chih ei pate kidot kul hi.
5. Tate thangpaihsaklouh ding (Eph 6:4). Eph 6:1-3 na a pate’ tunga tate mohpuakna I muhban taang khat simsuk le’ng pate’ mohpuakna - tate hihthangpailou a Toupa’ thuzohna leh hilhna a kepzawk ding ahihdan kimu hi. Pa tamtakte’n tate thuhilh chianga midang tate toh tehkaka, a chin zohlouhna kia uh focussed lianpenin I neikha zenzen ding uh, chih lauhhuai hi. Achanga tate’n thilhoihhihte recognised piaka pahtawi ding nu-le-pate’ mohpuak ahi. Huchiloua ahiding maha koiha pahtawi louh in tate thangpaisak khanak hi. Lohchinna ngaklah leh lungduaina tasam pa khenkhatin lohching dinga tate hilh zoulou leh chiil zoulou hinapiin a gah khum lohsawm in, lohsap hun ah tate ngoh (blamed) behlap khanak sek uhi. Michihin hihtheih leh siamnalam kinei chiata, pa’ mohpuakna tuh tate’ hihtheih leh siam zawng theihkhiak tup pipena neih leh huai lampi a makaih ahi. Eimah deihlam siamna leh pilnate tawp-le-chilha guanlut sawm sangin tate’ kivatna zonsuah poimohzaw leh lohchinhuaizaw a, pate’ mohpuak leng ahi.
6. Tate vualzawltu leh thumsaktu (1 Kro 28:9 & 29:19). Pathian in A temple lamtu ding in, ‘Ka lungtang bang pu Ka muta’ achih hial kumpi David teel lou in, a tapa Solomon teelzaw hi. David mohpuakna bel atapa Solomon lamzanna di’a thuhilh leh vualzawl ngetsakna ahihbang ngei in, a tapa vualzawl in, a lamzanna di’n Pathian kiang’h ngetsak hi. Tate’ lohchinna ding leh mavanna dinga vualzawl theitu pate ahi. I Bible taangteel ua, taang masapen ah, David in ama’ experienced akipan deihsakna toh a tapa Solomon thuhilh in vualzawla, a taang nawn ah alamzanna di’n Pathian kiangah ngetsak hi. Kithuhilhna leh vualzawlnate Pathian deihdan toh kituak ahih ding ahi, huchilou a Pathian theihpih louhte bel ahoih penpen I chihte leng vuaksuak theilai hi. Huaiziakin, bangkima Pathian telsaka, Ama’ piina a kilatkhiak tuh ei gingtute’ hih ding him ahi. Chiindan hoih mahmah leh etton di’a hoih, ka pa toh mun khata omkhawm gige theilou himahle-ung, a tute’ adi’n ni poimoh diak – a birth date ni (khatenga ni kibang) hunte ah phone tungtawnin thumsak gige hi. Tuni chiangin a tute’n leng a thumsak ngaina in ngaklahthei dinmun in om uhi. Eimah chiildan leh sinsakdante’n tate hinkhua ah mun poimohtak luah uh ahi, chih chiantakin hon musak hi.
7. A tawpdong tate lungkiaksan louh ding (Luka 15:20-24). Jesu’n tapa taimang akipan gentehna thu A genna akipan pate sin ding tampi honpia hi. Nu-le-pate’ lamet tung zoulou phetloua, lampial kha tate a omkhak taak leleng amau a kinepna beisak leh nungngatsan mailouh ding chih hon sinsak hi. Tapa taimang in ama’ tan ding gou pawkhia in apa’ inn nusemahleh, kisika hongkikin apa’n akhelhna tengteng theigige lou phetlou in, ahihna bangbang in ana pom hi. Tate adi’a pa tuh chiklaipeuha belh theih di’a kihong gige a om theih pa’ mohpuakna ahi. Khalam hinkhua ah michih Pathian akipan taimangna nei chiat I hivek uh. Ahihhangin, taimangna san kiphawka, kisika Pathian kiang I zot chiangin, I khelhnate tengteng ngaidama, A ta’ a simtel di’n chiklaipeuhin Honna pom di’n mansa gige in om hi. Ngaihdamna kongzapi honsa toh tate etkol tuh pa’ mohpuakna ahi.
8. Innkuante’ adi’a ngaihtuahsaktu (1 Tim 5:8). I Bible taang pansan in hichi’n chi hi, “... kuapeuh in amah mite a dinga a ngaihtuah sakkei a, a ma innkuante kholhouh a ngaihtuahsak keileh, ginna tuh a zuausana, ginglou mi sang in a gilouzaw ahi”. Innkuante’ ading ngaihtuah saklouhna tuh gitlouhna chi khat chih chiangtakin I mu uhi. Khalam leh salam a innkuante’ nek ding kiningching taka petu ding tuh pa’ liangkou ah kinga liauliau hi. Lam dik leh tang kawkmuhtu ahiding, chih khenlampek ah ana omsawn nawna, pa mahin ahinkhua a a latsak leh tot ding ahizaw. Etton ding leh ettontaak mihoih tampi leng a omtham, ahihhangin I kawkmuh lampi hoih I chih pen midangte’ tot lampite agaal apan kawkmuhtu hihsangin, lead by example thupi toh eimah in I tot leh hinkhua a I lah theih honghih chiangin innkuan lohchingpen hi ding hi. Kam a I gen leh I chiindante akigamlat luat chiangin, a zuitu adi’n kimin haksa hi. Hiai dingin pate’ hamchiamna ding tampi om ding hi.
Thukhitna:
Ahaksa lampi ahi, ahihhangin zohtheihna Pathian’ kiang ah a om. Eimah hatna leh pilna a zohzoh louh ding kalbite ngen ahi. Ahihhangin I Muan Pa kiang’h zohtheihna thuguk om hi. Amah ah kitulut in kimakaihsak peuh le’ng, Ama’n hon zohpih ding hi.
“TOUPA aw, na lampite hon theisak inla; na lamtate tanchin hon hilhin.
TOUPA laudan siam mi kua ahia? Huai mi tuh a lampi tel ding amusak ding hi.
TOUPA thuguk amah laudansiamte kiangah a om, a thukhun tuh amaute a theisak ding hi.”
Sam 25: 4,12&14
