Pathian in thum ding in thu honpia. Pawlpi leh mimal a thum ding in. Thumna ah Pathian in Ama’ kianga lunggulh thilte nget-utna neite tawh kipolhna hun nuamtak pia. Huaiziakin, thumna tungtawna Amah tawh mimaltaka I kithuahna a khan ding Pathian deihlam ahi.
Thanuamtak leh kuhkaltaka thumna I neih chiangin, mi I thumsakte leh ei athumtute hinkhua ah I thumna in thil thupitak ahihsek hi. Thumna tungtawnin i lungsim Pathian lak ah a kihong a, Pathian in I kha a hawmpi ahih lai inleng a hon dimlet sak sek hi. I lawmte kianga lungtang kihong taka i omsek bangin in ei Khristiante Pathian kiang ah kihongtakin i omsek uhi. Amah toh kilawmhoih I hihna, thumna tungtawn in i sukip thak zel uhi.
Pawlpi a thumna leh mimal a thumna a kibatlouhna, ‘aging-loua lungsim a thumna’ leh ‘aginga thumna’ leh ‘thumna thilpiakte’ leh ‘thumna zia-te’ tawh kisai gen ding tampi a om ding. Himahleh, a poimohpen tuh thumna toh kisai a poimohpen ‘lai-mu’, ‘a lai-gil’ bang ahia chih ahi. Huailou in zaw, I khut-liik, I mittui-kia leh I aw-gingte athon suak mai kha ding hi.
“Prayer is a sincere, sensible, affectionate pouring out of the heart and soul to God, through Christ, in the strength and assistance of the Holy Spirit, for such things as God has promised, or according to the Word of God, for the good of the Church, with Submission in faith to the will of God.”
(“Thumna tuh Pathian mai a, chihtak leh pilvangtaka, a Pathian ngaihnatna lianpi tawh, Khasiangthou hatna panpihna a I lungtang leh kha kisunbuakna, huchia Pathian deihdan, Saptuam hoihna ding a Laisiangthou a Pathian thuchiamte hihtangtuna a omna ding ginna leh kipumpiakna nei kawma ahi.”)
Hiai thumna hilhchetna in apoimoh point 7 bang a sukha hi. Huaite tuh -
1. Chihtakna neih ding (sincere). Pathian kianga Amah toh kikhawl ding a hongpai mi in I lungsima chihtakna nei I hi chih honmuh kei leh Pathian in I thugen I thumna hon ngaikhelou ding hi. Ama’n le bangmah honna kum utlou ding hi. Lungsima na chihtakna honmu honthei kiang pai na hi.
2. Pilvangtaka ngaihtuahnasiamna kizentak (sensible) thum ding ahi. Thiltuam tuam Toupa kianga I tut chiangin ngaihtuah det-deta kizentaka I tut ding ahi. Khelhna toh kisai ahih hun ah hihkhelh thilte teltaka thei leh kisiik in, kipahna tawh kisai ahih hun in na kipahna ziakte khatkhat a sim thei in, mi poimawh ahihleh apoimawhte uh teltaka ngaihtuah detdet a, tuate chetchet tawh na thum ding ahi.
3. Khrist tungtawnin Pathian mai a lungtang leh hinna kisungbua a thum ding ahi. Jesu tungtawn lou in Pathian kiang naih theilou I hi chih thei a, Amah ziaka I hamphatnate ngaihtuah in Ama’ min suang in Pathian I naih ding ahi.
4. Khasiangthou hatna leh kithuahpihna ziaka thilhihtheihna nei in thum in. I thumnate thil hihtheihna-nei ahihna dingin Khasiangthou hatna leh A panpihna I poimawh pen ahi. Thum ding dan I theih hetlouh lai a leng mauna genvuallouh tawh hon na thumsaktu sungten Khasiangthou ahi.
5. Laisiangthou sunga kigen Pathian in honpiak dinga A chiam thilte ngen a thum ding ahi, huchi hileh i thumnate dawn a om ding ahi. Ngen in piak in na om ding uh kichi Pathian thupina dinga Ama’ deihlam thilte, Laisiangthou tungtawna nget ding a hon hasot thilte I nget chiang in I thumnate dawn in a omsek hi.
6. Thumna thiltup Pathian Saptuam leh midangte hoihna ding ahih ding ahi, ei mimal phattuamna ding thilte hilou in. Pathian deihna bel mite’n Tanchinhoih ei a Saptuamte tungtawna a zak ding uh, tua Tanchinhoih gahte I hinkhua a muh a a-om ding chihte ahi hi.
7. Ginna nei in leh Pathian deihdan a kitulut kawm in I thum ding. Thumna lohchinna ding in a thumtu leh thumsak a omte lama kipan ginna a kisam masa a, huaiban in Toupa deih bangbang sang thei ding Toupa lak kiminna ki-aapna a poimoh hi.
(Hiai thute John Bunyan laibu ‘How to Pray in the Spirit’ apan laksawn ahi. Lasawntu - Upa Langkham)
