Tulai in Covid 19 ziak in I khovel naktak in a hong kikhek guih a, hiai hileng toh akum a sim khosak khawm phot ngai ding abat man in pilvang tak kawma I khosak siam ngai mahmah hi. Huchihlai in, bangchituk in pilvang kisa lele, I kaikha kei ding chihna thu omlou a, kaikhak theih veve hi. Huaiziak in, lungsim taka le I kisakkholh ding, I tate leng huai di’a I sinsak ding, I kai khak leleng buaiselou a I om theih nang in innkuan sung ah le hih theih bangbang a I na kisakkholh poimoh petmah hi. Banah, hiai hiileng sese lou a leng sih theihna tam law mahmah hi. Khatveitei si chiat ding I ka hia… I sih chiangin, hiai khovel buaina, natna, hiileng leh adg. Te’n hon buaisak phanawn lou ding chih khawng I ngaihtuah chianga zaw tawldam taka hinkhua zat theih veve ahi (buaina kal ah le…).
Huchihlai in, lungtang khauh mahmahte a hong nem a, Pathian himhim leng ngaihsak lou, ut-le-dah a khosa tamtakte’ lungsim hiai hileng tungtawn in khek in a hong om a, pianthakna ngah bang, hinkhua kikhek tampi om uh ahihdan bang I thei a, kipahhuai petmah hi. Mihingte’n, lunggimna, buaina, haksatna, natna khawng I tuah hun in Pathian I ngaihna leh I khalam dangtakna nasa biik sek ahihman in, hiai hun haksa I tuah lel pen, Saptuamte’ adi’a leng Pathian thuhing gen nang a hun hoih pen hikha ding hi. Hiai hiileng pen khalam dangtakna sukha di’a Pathian vanzat thupitak ahi chi le’ng I genkhelh gingta lou ka hi.
Biakna munte hun bangtan hiam hon phallouh ahihnung in, tu in zuih ding dante zui kawm a I biak bukte hon phalsak I hi nawnta a, a manpha theipen a I zat ding lunggulhhuai petmah hi. Saptuamte le hiai hii toh khosa khawm dia kibawllem siamsiam in, khalam leh salam ah vualzawlna dong ding uhi. I saptuam mite khalam dangtakna bang le buaipih pha ngamlou khop a om khak ding lauhuai hi. Jesu a hong pai zawk keileh hiai hiileng toh khosa khawm toutou ding I bang a, hiai hii toh I om khawm sung tuk a Pathian thu i ngaihnop hun uh om nawn lou maithei hi. Jesu hong painawn ma a sapna nanung leng ahikhamoh di hia… Huaiziak in, hiai Covid 19 in khalam dangtakna hon pia a, khovel a hiai hiileng a om sung pen Pathian thuhing gen nang a “Golden opportunity” ahi kha mai diam? Saptuamte’n houchik a hiai hun manpha I beisak khak ding bang lauhuai hi.
Huaiban ah, hiai hileng apat kivenbit seng ding leng ahikei, kaaikhak theih na a tam mahmah. Huchih lai in, positive khenkhat, a veilam uh a kitheih ma ua, inn a a tenpihte uh bang, gari/ train khawng a dakkar bangzah hiam a tutpihte uh bang, lohsawn le uh kilawm ahihlai in, a na huchi khollou zel, a kiang nai ua omte bangmah chilou (negative) chih bang zak ding hunkhop om! Huaiziak in, hiai hiileng pen lauh ding, pilvang taka zuih di’a kigente le zuih ding, lauh khengval ding bel hoih lou hi.
Hiai hun haksa I phutlel uh, khamangthang mat nang leh khalam a kilamtouh nang a, manphatak a zang thei ding in, a Saptuamte Pathian Kha Siangthou in hon thuam hen aw…
“Khawl theih hilou Toupa gam adi’n, a nuamlou a haksa bangteng ah zong…”
