Simtute tengteng Naupangte’ Ni Chibai,
Thumapi: Pathian in thilsiamte – lei leh van, leh asunga om tengteng A siamin, “...hoih Asa mahmah a” chihleh “...A vualzawl” chihte kimu hi. Ahihhangin, Eden huan khelhna ziakin hamsia khovel ah, mihingte tengteng leh thilsiamte’ tungah, honglut hi.
Vualzawlna leh Hamsia : Thil himhim ah hiai tegel kitonkhom helhel gige a, mihingte mahni thupukna leh gamtatdan zil in khatzaw samsam kitang ge-geih abatna om hi. Khovel thila etin akhenchiangin gingloute’n salam leh muhtheih thilte a vualzawlna tanglua uh I sakton omtham hi. Ahi a, Pathian in vualzawlna leh hamsia tangding chi-le-jat in khentuamloua, A thuzuite leh zuiloute in khensat hilhel lel hi. Kuapeuh gingtute hi’n gingloute hitaleh Athupiak zui peuhmahte’n Avualzawlna tanga, azuiloute’n A hamsia. Eph 6:1-3 na a ‘thupiak chiamnei masapen’ thu ah ginglou I chihte’n zuidikdiak adi ua aw! hon chisak hi. Vualzawlna lamtampi ah le’ng amu-ngeingut uhi.
Pathianin A namteel Israelte’ kiangah thukhun khauhtak Ana bawl hi. A zuihding uh dante piakin aom ua, huaite zuih leh zuihlouh ziaka gah alohding uh tanpha chiantakin gen hi.“Ngai un, tuni'n na ma uah vualzawlna leh hamsia ka koih a;TOUPA na Pathian uh thupiakte tua k'on piakte na zuih uh leh, vualzawlna. TOUPA na Pathian uh thupiakte na zuih kei uh leh, na theih ngeilouh uh pathian dangte be ding a tua k'on thupiak na pialsan uh le bel, hamsia.”Diut 11:26-28
Khekkhiak theihlouh omlou: Khentuamneilou Pathian ahihmanin mihingte Ama’ mita kibangvek I hi ua, poimohzaw hiam poimohlouzaw tuam ki-omlou hi. Mihingte mahni kipiakdan dungzuia poimoh kisakna leh poimohlou kisaknate zatkhelhtheih tuaktuak hi. Mong neilou Pathian itna’n eite batphak honsawm gige laiin, eilou inle’ng Pathian nak hihtheih lo-tela, Asepdingte seem veve hi. Sapte’n – no one is indispensable, achihbang un salam thil ah poimohluatna tuam nei I hi hetkei uh. Kisaktheihpih hial dingin eimah thu in khovel ah bangmah bawl lamdangtheih ding leng I neibok kei uhi. I bangkim Pathian khutsunga om hi a, Ama’ ziaklel in eite’n manphatna leh poimohna neikha zenzen I hizaw uh. Eite bel mahni dinnamun theichian zenpi a kiknadingte apan kiknuamlou a lungphengte I hilailai ua hive’n! Pathian lamah bel I vek un eimah tuamchiatin poimohna I nei vek uhi. Adiaka Amah, Pathiana neite adi’n, awilou leh gingloute’ sangtham in, tungtuanna- special status I nei uh. Kahlate 3:24 a I muh bang in, “TOUPA ka tantuan ahi, ka kha in achi; huaiziakin Amah lametna ka neiding”.
Elisa Thillamdang hih apan sinlai (2 Kumpipate bung 2na):Elisa in apu Elija kianga angetbangin apu’ kha tan thuahnih amu a thillamdang tampi Pathian in ama’ tungtawnin hihzel hi. Israelte’n Pathian tunga ginomlou a pathian dangte lama apialsan gige ziakun, huai hunlai in Jeriko khua tuinek limlou leh nausiatna gu in zeel hi. Elisa in tuilimlou leh nausiatna gu akipan huai gam damsakin huainungsiah naungek piangdingte hondam pha hi. Ahihhangin, pasal naupang honte’n Elisa ana kou ua, anuihsan ziakun, Toupa’ minlou in hamsiata, gamlak akipan vompi nih hongpawt in, alak ua naupang 42 hong kei uh, chih ahi.
Naupiang nailoute hing-le-dam a apiantheihna ding un, Elisa in tuineklimlou leh nausiatna apan Jeriko khua damsak mahleh Pathian mizat jawlnei simmoha-kou naupangte hawituanlou zel hi.
Eite daikilkal leh eklei apan hong zongkhia, sangpi a Hon domsanga, miliantelaka hon simtel Pathian ahi. Thamlouin, A Hotdamna huangsung luttheihna hamphat nawnsawnna hon neihsaklaite I hi uh. Huchi ahihlaiin, A thupiakte zuitu leh theihpihtu ginom hih tuh I mohpuak lianpen ahi. Mangbatlai a huh pahpah nai gige (Sam 46:1) ahihzahzah in khelhna amawk akoihlou leh gawtlouha khelhna ensim mailou Pathian ahi (Pau 11:21, 16:5, 19:9 & 28:20). Jeriko khaw naupangte vompi’n akeihma in amau muna naupang ding apiantheihna di’n Pathian in A lampi ana sialkhin hi. Eite khekkhe ding le’ng koihkhawlsa ahithei, chiklaipeuhin leng ahithei gige lai. Huaiziakin, bangmahlou I hihdan I kitheihchet semsem a Job, Sam leh Eklijiasti a bangmahlou I hihdante uh chiangtaka I muhbang in, mahni kipoimohsaka, Pathian leh Athu kigente ngeingaihlou leh chiamnuih peuha zanga agentute leng hawituanloua I om nilouh le zaw, I sapum kia thamlou I kha nasan bangmahlou a mangthang ding hi hang. Toupa'n, ka Kha in mi khantawn in a sual nilouhlouh kei ding... A chih bangin mihingte’n Pathian’ maipha zonna di’a eimah hun kisehtheite I hikei lai uh. Ama’ hunpiaksate atamtheilam suama Ama’ adi’a zat tuh hun hoihpenahizaw. Huaiziakin, naupang neu lungsim siangthou pute mahbangin khalam hinkhua ah piangkikthak in kithakpat chiat ni hang.
Matthai 18:1- 4 “.... Chihtaktak in k'on chi ahi, Na lamdan ua, naupang neuchik bang na hong hih kei uh leh, vangam ah na lutkei hial ding uh.....”
Simtute, I hinkholui ua kipan hinkhothaka hingthei dinga Khalam siamthakna muchiat ding in Kha Siangthou in michih hong sungluahta hen!
