BYF EBCC Delhi Silver Jubilee kum hon musaktu, Pathian kiang a kipahthu gen thei a honkoih, tutan honpi Pathian min ka phat hi. Phawk leh nget a ka om bang in, Delhi a ka hunzat sung a Pathian hoihna ka tan tampite lak a khenkhat Amah’ min phatna ding in k’on luikhia hi.
Ahitak in, ‘siamgat in leng nek di na mu zou na di’ chi a, haksat ziak a pawpawt zoulou di’n ka Nu mahmah in hon khou hi. Lamka a piang leh khangkhia himahle’ng, khosak haksat man in sep theihtheih – siamgat, suangsek, loubawl, adg dg. semkawm in school ka kai hi. Hichizen a Pathian in ka ma honpi lamdang ka sa lou theikei hi. Neulai a ka Nu-le-Pa’n honna sinsak “thil tengteng Pathian kiang a tut-leh- nget di” chih pen manpha ka sa a, hiaitan ka kalsuanna a hon pitu leng ahi den hi. Ka hinkhua adi’a Pathian kianga ka nget – sepna leh pasal - deihtel a buaina di omlou in kichiantak in honpia hi.
1993 in PU Science zou in ka Ute’ leh tanaute deihsakna liauliau in Delhi ah college kai ding in k’ong tung hi. Tulai dan a kithuzak theihlou hinapi in railway station ah ka UChinpau in honna ngak in train khawlma in ka kigalmuh pah uhi. Delhi kholum laitak ah ka nau Khamthianmung toh k’ong zing tun uhi. Kintak a kihah a, ka ULiannem honbawl nektheihte ne in DU campus ka zuan pah uhi, train tuanna lung-am in etna lamlam kivei duaiduai mai hi. Tua ni pen DU a college registration last date ana hi hi. Ka subject (economics) leh college (Indraprastha College for Women) deihpente ka mu tuak hi. Ka mark pen sang huntawklou ahihman in hostel tang dingvual a langlou leh ka Ute inn lianlou chik a teeng/ beel ka hihman in kisuanlahna a lian hi.
Lamet ngam hikei mahleh, poimoh ka hihman in college lutma apan in Hostel accommodation ngen mi hunkhop lak ah ka va kuan zel hi. A list nihna hongsuak a, ka mukei uhi. Chandni Chowk apan college tan pai zel DTC bus omna zuanthei in college ka kai pan hi. Kha khat leng phalou in, lamdang tak in hostel piak in ka om hi. Ladakhi khat leh Tibetan khat toh mi 3 ka ki-roommate uhi. Ka khonung theih leh ka Tibetan roommate te’n sum tamkhop apiak ziak ua hostel mu ka hihlam ka thei hi. Aziak ahihleh, merit-based a hostel piak ahi a, ka lawmnu’ mark sanga kei mark 0.4 per cent a tamzaw ana hi hi.
DU a Eco(Hons) subject hoih chih ziak a ka lak ahi a, a basic ka neihlouh ziak in ka sikhop mahmah hi. Science apan, maths background nei chih ziak a economics la ka hi a, kuamah rawn masak omlou a gum deuh a beitou ka hihman in, lungkiak hun ka hau a, thumna ah ka hahpan mahmah hi. First year exam zou innlam ka pai in, fail dia kikoih ka hihman in ka paw-pawt ngamkei hi. Zouzou lou di ka kisak lai in Pathian in ka thumnate hondawng in, A hehpihna ziakin back subject le neilou in ka zoukhia hi, ka nung ngaihtuah chiang in lamdang ka sa hi.
1996 college zoh in JNU a maban sutzop ding lunggulh in entrance (Economics) exam ka pia hi. Kipahhuai tak in MA (Eco) ah ST kei chauh laak a om in college a kum 3 ka ki-roommate pih sa (Ladakhi nu) toh JNU a kum nih ka ki-roommate kha nawn ua, hamphathuai ka sa sawnsawn hi. Huan ah, Delhi a siamsin a ka om sung in ka UGouchin, sepaih, chikmah a Delhi posting ngeilou tuh ka siamsin sung sawtkhop posting hongpai in hon ompih kha hi. Pathian in kei adi’a lampi hon bawlsak leh hon khotuahnate kiching petmah hi.
1999 kum tawplam hong hita, M.Phil bang zoh hun kuan honghi in, maban ding lungngaihna in hon lom phak hi. Tua akum in sepna ding exam hunkhop – bank tuamtuam (combined exam om nailou), SSC, IES, RBI te ka pia hi. Nitak khat ka nau hong giak toh lungtang tengteng in mangbang tak in – Toupa aw, bangmah ka phu kei, hilele ka poimoh ahi, sepna n’onpiak ding ahi, chi in ka thum uhi. A kha nawn in ka lamet phaklouh RBI adi’a interview sapna ka ngah a, August 2000 in ka M.Phil dissertation submit zou in RBI ah ka seem ngal hi. Khatpeuh muh bangbang sem di’a kiman ka hihlai in a teelhuaipen mah Toupa’n honpia hi (Jer. 29:11).
August 2000 a hostel apan a sepna join di’a (Mumbai ah) kuan in, hiai Delhi mah ah 2005-2011 sung ka hong seem kha nawn hi. Hiai kum guk-le-kim hu ding Delhi a ka sep sung in, ittu pasal ka nei in, tanu leh tapa leng piak in ka om uhi. Ka U cancer natna ziak a ki-enkol bang ka kem kha a, school leh college kai naute bang enkol kha in ka om ua, hamphathuai ka sa hi. Delhi tuh lam tampi a Pathian pina ka chetna leh vualzawlna ka tanna, ka hinkhua a hun poimoh ka zatna ahi a, a khua leh saptuam te ka ngaina mahmah hi. Hun haksa hunkhop ka tuah hunte ua, hon veh leh khamuan tute tung a ka kipahna uh ka mangngilh ngeikei ding hi.
Saptuam toh kisai ah, Delhi tuntung in mi kitam nailou ahihman in ki-inntek pah hi. Kikhop masakpen (Green Park Free Church) in thohlawm dong in ka pang kha a, ka zahtat man in ka mangngilh theilouh khat ahi. Hun tamzaw ah Sunday School sinsaktu di’a seh in ka om a, a sinlaite kei mahmah ading in a phatuam hi. KTP committee member bang in leng ka na pang kha a – kikupkhawm hun a kinialna sim bang om chiang in “na chalak lua” chipeuh a ka na pau chiang in, a hehsimte bang hongnui ua, team hinapi a ki ‘amen’ duamduam gige hilou ahi. Kuapeuh in kithumpih tuahna poimoh ahi chih bang ka mu hi. Tuailai box sumkhon a Munirka dung-le-vai a gimtak a kivei hunte bang hun ngaihhuai lua hong hizel ta hi. Ka’ ‘aw’ off-key ahihman in la sinna ah bel a buaihuai lam ka hi. 1995 Tuailai Day Mt. Carmel School zatna ah group leader di’a honsep un, phatuamngai lua in kidemna teng a tel ding chi in Trio adi’a a mi thumna di ka muhlouh man un ka va ding a (a la sa theiloupi) a nihna ka la uhi. Aziak, sakkhelhte a mark cut ahi a, ke’n bel salou, sakhial khalou hi zezen ka hi. 1995 papi camp ah speaker (Mrs. & Rev. Dr. Ginnei Thang) poimohte enzui di’n Vungno tawh ka pang ua, nasep ding om manglou ahihman in, thugen ka ngaisuak kha sim ua, hamphathuai ka sa hi.
Ka tuahte apan sinlai laak tuak ka sakte
• Ka subject kibatpih ka classmate te sang a, eilam NE singtangmi library facilities le zang ngeiloute ngen toh ka kithuah pen hihkhial ka kisak leh ka kisikna mahmah ahi. Student ading in eimite chauh hilou in, i subject kibatpih i classmate te lawmbawl siam a, amau apan sin ding ahi. Huan ah, subject tel leng pilvanhuai mahmah in ka thei hi.
• LST sim & thumna hunbit zattheih gige pen manpha ahihman in, bangmah toh kipelsak louh ding ahi.
• Saptuam a panna neih khak zel pen hamphathuai ka sa. Sunday School sinsaktu apan in nasatak in ka phattuam pih hi. 2000 (sepna ka join ma) a Senior pawl sinlai saptuam thu-up te bang manpha ka sa hi. Ahia, sinlai sikhop mahmah ka hihlai a, saptuam hon sehna khatpeuh (midang omlou hilou) “No” ka chih theihlouh pen a hoihpen ana hi de aw ka chih hun a om tham hi.
• JNU Christian Fellowship a kikhop bang manpha lua hinapi, mahni saptuam ngaihpoimoh luatna in, tamkhop hon chansak hi’n ka mu hi. Huan ah, weekly Bible study ka phattuampih a, theihsiamna hon behlap hi. Ei saptuam bing pel a, ‘Kris di’a muanhuaina’ pen poimoh ka sa hi.
• Kipolhkhawm/kiveh nuam lua hinapi in i hunhoih tampi mansakna ahi a, pilvanhuai ka sa.
• I loh ma nana tuh sumchil ding ahi. Sum zat a pilvan ding ahi. Kicheina hoihpen omdan-nungchang hoih ahi. Van mantam pipi a kizep mawk pen pilvai lou kha ding ahi.
• Khopi a sumsenna a kikhia tuh public transport zat leh auto/taxi zat man ah ahi. Sinlai in i laisimna hun hawmthoh lua I hihkei nak leh student pass toh public transport zat ngeingei ding ahi.
• Roadside dhabha kho anhuan manlouh ni a nekkhiat ahihke’h, an mantam pipi restaurant kho nek chiinlouh ding ahi – sumsen kikhe lua hi.
• Innkuante kiang a zuau gen ngei hetlouh ding ahi.
Delhi eimite ka muhdan leh awlmohhuai ka sak khenkhat
• Delhi tun tung lai in kuapeuh fridge, TV thak nei tuh thupi leh kipahpihhuai, chini-bawngnawi tawi a kidelh ahi. Tuchiang in bel, flat luah thak khawng in honchial ahihke’h kidelh/veh zou nawnlou hita hi. Hiai in khosak-innten a i masawnna uh hon lak ka sa hi. Hinapi, midang awlmohna, kipanpih leh thawnpiak chih khawng ngaihtuah khak hi law nawnlou ade aw hon chisak hi.
• I saptuam a i thilpiak/thohlawm te et in, ei khandan toh bang achi de aw chih ki-et tuak ding in ka mu hi. I sawm-a-khat khawng i housing loan repayment leh i lifestyle maintenance na in dep lua in a om maimah hia? Aihkeh, ei lemtan bang a, a vangkim a, i muhzah hi sese lou (phal zah) khawng pe lel I hih khak ding le kivenhuai ka sa hi.
• Khopi ah hun kineilou chih thudik pansan a, tasam leh vehtuak tampite thulh baihlam mahmah ding in ka mu hi. I dinmun (saptuam/sepna ah) nopsak pian in, i mohpuakna nelhsiah baihlam ding in mu ing. Biakna toh kisai in i vanzat, lasak, vaisai uh muhtheih a kilawm mahmah ahihlai in, hong kikhawm thei ngeiloute phawkna neilou I hih khak ding lauhhuai ka sa hi. Pathian ngaih in tasam/ lungngaite veh leh khovel nitna a kidiah louh pomtak biakna ahi (Jacob 1:27).
• Deihtelna leh zalenna ngai thupi mahmah khangthak (postmodernism) I hih i haih kei hi. Thudik (absolute truth) kichi omlou a, a mihing deihtelna toh kikheng zel (relativism) hi a ngaih ahi. Huaiziak in, i Biblibical worldview – Pathian pen hinna teng kipatna, A thu dikkim, kikheng ngeilou, bangkim tung a thunei leh vaihawm ding ahihnate ah i dinkip ding leh piaksawn ding mohpuakna ei gingtute ah ngak ahi.
Atung a, i gen khempeuh Pathian hoihna, Amah lemgel, kei leh ka innkuan un ka mangmat phaklouh uh, phulouh Pathian hoihna ka muh ahi hi. Tuni in ka maituah lai dingte ka theikei; himahleh, hiai tan honpitu in hon ompih den ding chih theihchianna ka lenkip hi.
I thupi “phakchiam delh tuailai” huap khak in i omchiat na hiam? I phakchiam bang hi hiam? I delhna hiam? Koi tan i tunta a, tuailai? Lunglel/lungkia i om hia? Pathian a thuchiam – hon nuse ngeilou ding – ah a muanhuai hi.
….
#Chinngaihlian - Kum 1997-2010 sung in BYF, BCD leh BDF chihte ah committee member in na kizang hi. Tu’n RBI a sem in Mumbai ah khosa lel hi| Thulaakna: , “Phakchiam Delh Tuailai,” BYF Delhi kum 25 chin (1994-2019) chiamtehna a suah ahi. Mobile app, epub leh pdf format a khahkhiat; p. 9-10. https://ebccdelhi.org/resources/1/silver-jubilee-emagazine.html
