Covid-19 hiipi ziakin biakinn leh Sande Skul khak in om a, himahleh ei a di’n Toupa’ hoihna kiamlou! Vanglian Toupa’n A itna leh hehpihna, A saptuam BCD naupangte lak ah ni bang taangsak hi –
“Khovel mihing tamtakte’n Setan saltang a manthatna leh sihna lampi zuan a a pai lai un, I vondeih tamtakte tung ah Toupa’n A hotdamna ni bang ana taangsak hi. A zahngaihna leh thilhihtheihna kawlchiang, sihna tuipi san ah zaak in om a, zinmang henkol pan suahtakna thupitak tuni’n i lak ah tuang hongtung hi! Aw, Thupipen, A lamdang, Lemthei, Pathian Hing leh Siangthou min phatin om hen; Za thei hile’ng zaknuam hina’n chi’a! Van misiangthoute kipahna thawmging husa; luipi tampi luangkhawm leh vanpi mualkuam thawn ging zuazua bang in, a vualzou Belamnou pahtawina; za thei hile nuam na’n chia maw!”
Tehpihbei, itna lian, Belamnou vualzohna thupi! Vanmang tapa neihsun tatna sisan thawnlou -
“Zuau chiteng a ngoh a om a, engbawl, simmoh, chilphih, zep leh sat sidup a om, Belamnou vualzohna thupi hina e! Thawnlou hi! Thawnlou hi! A linglukhu a pat si pawtte leh taksa a si pawtte; A mai leh a pumpi a tatna sisan luangte, Kalvari mual zuan a, Khovel khelhna leh A mahmah kikilhna ding giktak, A kros pua a pai; Pathian Belamnou sisan thawnlou hi!” A mah tuh Kros leh sihna Hankhuk ah ana vualzou a, a vualzou zel ding hi. Halleluijah, Toupa phatin om hen!”
Hun khat sung adi’a EBCC Delhi Saptuam in Pathian hehpihnaa tandan thupi petmah... Khamangthang naupang 25te kha hotdam a om i chih thil thupi tak ahi. Saptuam heutute, mipite, Sande Skul heutute leh nu-le-pate pankhawmna gah ahi i chilou-theikei hi. Mabanah leng buh laak ding tam law lai, pangkhawm in seemkhawm zel ni. Toupa’n thupina tang hen! Amen.
…
*Thugelhtu, Children’s Department, EBCC Delhi sinsaktu, thugelh & lagelh a kiva khat hi. Lungdam lua.
