Mi khat in a genna ah, “Bible ah ‘Khristian’ thumal 3vei vel kimu a, ‘Nungzui/ Nungzuihna’ (disciple/ discipleship) thumal ahihleh 269 vei vel kimu hi. Nungzui I cih cia’n sintu (learner) cihna zong ahi,” ci lai hi.
I nu-le-pa, pi-le-pu apan Khristian hi (Khristian innkuan apan piang), a minpu Khristian om khak theih mah hi, ci ni. Kha Siangthou nasep tungtawn a mikhial hih kiphawkna leh tua poisa/ kisiikna tawh Jesu Khrist Lal leh Hondampa a sanna experience kha ngeita I hihleh mi hampha I hi diing. Jesu lou in – Jesu Khrist’ sihna, kivuina leh thawhnawnna koppih lou in – damlai khawvel hinna bangmah lou mai ahi, Khawvel pilna zong haihuai lel hi; Hihhang Mang Jesu tawh bangkim hithei ahi. Hallelujah!
Tanchinhoih Johan 13:34 ah, “Thuchiam thak k'on pia ahi, ki-it un; ke'n nou k'on it bang in, nou leng ki-it un” cih I sim hi. Hiai Jesu Khrist kammal pen Khristian, Amah nungzuite laka A vaikhah ahi. Aban (t. 35) ah bang Agen a? “Na ki-it uh leh, mi tengteng in ka nungzuite na hi uh chih huai ah a thei ding uh,” a chi a. Wow! Tutung DEW issue ah Bible Thutak hinpihna, itna latkhiaksakna tawh kisai, sanggamte Pa Liankhanlam, Tg Thangte Naulak leh Tg K Lianthansang te’ thugelh ah theihsiamhuaitak in tuang chitchet. Sim ciat ni maw, A’ aw na zakna TOUPA in hisakta hen!
Marka 3:14 ah, Jesu’n, “A kiang a OM ding leh, thu gen di’a A sawlkhiak ding in sawm-le-nihte a sep a…” cih I mu hi. Jesu kianga OMNA leh KUANKHIAKNA, kikhenthei hiam, kimakhelh theih hiam hi un I theikei hi. Johan 8:31 ah, Jesu mah in a gingta Judate kiang ah, Ka thu a na OM gige uh leh, ka nungzuite na hi taktak ding uh” ci leuleu hi. Jesu Khrist, Lal & Hondampa a sangtate, Amah a OM GIGE di’a sinsak leh lamet I hi. Tua (Amah a omna) pen, nungzui suahna, nungzui suahna leh gahsuahna lah a tonkhawm helhel hizel dan ahi.
“Huaiziak in, kuan unla, nam chih apan nungzuite bawl unla, Pa leh Tapa leh Kha Siangthou min in baptis unla, thu K'on piak tengteng pom ding in thu hilh un” (Matt 28: 19-20) cih thupiak gol I ngah lai in, “Khristian tengteng missionary di’n honsam” cih lai pen dik law mahmah hi. Tua thupiak, mihing hatna leh pilna masuan a sep theih hiam, piang thei hiam ahihmawk louh man in:
a) Jesu Khrist a om gigena (Johan15:5]
b) Mahni’ pa, nu, zi, tate, unau, sanggamnu, leh hinna nangawn Jesu Khrist tawh a kizopna nuai (subordinating all earthly relationships to loyalty to Christ) a koihna (Luka 14:26)
(c) Jesu Khrist leh a Thu a om gigena in Pa pahtawi, gah tampi suahna in zui (Johan 15:8), cihte I ki-etchetna di leh kiveelna di’a kigelh na hiveh aw maw, guai.
Sawltak masate, Jesu Khrist a om, A nungzui (disciple) te hi ua, a nisim omdan leh kampaute uah kilang… Gal 5: 22-23 a Khagah kigente ahunhun a gahkhe siahsiah zel hididan ahi. Aw, tuabang hinkhua eite adi’n zong phal hitel hi, A’ Thu za a zom/ zui/ hinpihte I hihleh. Tua bang hithei tek di’n simtute, T0UPA thupha maw!
