Pa Sum (Upa Chinsum) in "Hiipi Hongleeng – Kiveelna & Tha Kipiakna" chih a gelh, EBCCDELHI blog a kikoih, lunglut tak in ka na sim hi. Pu LT Ngaihte in facebook a thugelh tomchik a neih, a tomlam in gen le, Pathian thu kigen tam deuhdeuh, kingaina, kipahpih mahmah, hilehle khotang hinkhua a lamdanna omlou, se deuhdeuh… chih in a gen theih ding.
Huai toh kisai ah ngaihdan neitei ka hihna ah, ka kum suk pah hi. Eilawi bel, Laisiangthou bang suut in bang gennuam hiding hiam chihna toh zong lehang, "Laisiangthou suut di hilou, zuih di ahi" kichi gaihgaihte i hi uh. Bang hiam theisiamlou in dotna kuahiam kiang ah dong lehang lah, "Hon dawng leng dotna dang na neilai diam? A background bang le suut masak ngai ahi.." chih tan khawng a kidawngte i hi uh. Poilou lai.
Thugentu kitam deuhdeuh, kisiam deuhdeuh, a ngaikhetu leng tam deuhdeuh. Ahihhang in, thugentu' gendan pen Bible toh kituak mah hiam chi a, Laisiangthou phen kitawm mahmah zel. Pathian thu tuh KHALAM AN ana himah ahi. AN TAK nelou a, thil tuamtuam toh kihel nekkhawm pen a dik di bang in dikthei lou a, KHALAM KHANNA hon tunlou ahi hi. Thugelhna bang ah, Bible chang telsak lehang, "Bible chang kikapna di hilou" chisuk zelte i hi uhi. "Mi kuapeuh in thu a gen leh Pathian thute bang in gen hen" chih pen chiamteh ni.
Pathian thu bang ding a poimoh ahi di’a? "...Na kiang a THU ka gente tuh KHA ahi a HINNA leng ahi..." chih leng Bible ah i muthei (Johan 6:63). Nungzui i hi ua, Laisiangthou a thute i kipisak ding uh ahi. Peter in Jesu ana kitheihmohbawl lai in, "Ak nihvei a khuan ma in nang thumvei n'on kitheihmoh bawl ding" chi a Jesu'n a gen ngaihtuah khia in, kisiik thei hi. Juda Iscariot ngei leng, a kisiik theihna ding in, "....zuausan a hon mansak dingpa khut ka kiang ah dohkan tung ah a om ngal a" chi'n ana gen hi. Bang hiam thil i hihdek chiang a, Pathian THU i lungtang a hong lutzel pen tuh a THUTE i theihsa apan ngen ahi. Laisiangthou KHALAM AN ahi a, i nek ngeikei leh haksatna tuah hun a i zat ding uh a omkei ding. Juda Iscariot bang in SIHNA tan hon tunthei hi. A THU tuh HINNA ahi.
Kisiikna chih i gen nawn chiang un, "Ka kisiik lua" chi a kah huphup pen kisiikna buching dan in i ngai sek uhi. Kisiikna tuh Repentance(metanoia) ahi a, huai tuh, i ngatna kinung heisan (180°) vilvel a Pathian lam nga chihna ahi. Tapa taimang leng a Pa' ta hikhinsa taimang ahi a, hun sawtlou nung in kisiik hi. Vok in a nekte khawng duhgoh maimah in om a, vok kuang bul ah kisiik in a kap den kei. Thou in, a Pa' kiang lam zuankik hi. A Pa'n a tapa gamlapi a omlai ama' kiang lam zuan a muh in vadelh a, vakawi in tawp tonton hi. Hotdamsa kei vele (a ta hikhin kei vele) chi in ut dandan in om kei ni. Puan hoihpen, khedap hoihpen, zungbuh hoihpen na buhtheihna di'n na 'Kisiik' a Pathian' lam na naih masak ngai ahi.
Huai banah, a tamzaw i paibuaina uh tuh. "Hotdamna mangthei nawnlou, A Ta kihikhin hiven, ut dandan in om lehang le Vangam kai di thou. Lallukhu kitang kha keileh le poi sam…" chih ahi. I kihilhdan uh a buai vekta. "Nungtolh mah veh aw, a hotdamna bel a mangkei chih ka theihpih" chih khawng kisiamtamna kampau ahi. "Kong kawchiik ah lut tum teitei un, mi tampite’n lut a tum ding ua, tawmchik a lutzou ding uh" chih Laisiangthou apan i mu. Mi lutsawm hingal lutzoulou leng om di ahihleh sawm khollou a, "Hehpihna ziak a Ginna tawn a hotdam..." chih khamuanpih a om leulau i hihleh bel, rail lampi a lum, rail hong tai chiang in hon gawilum kei ding chih hahtak a gingta toh kibang ding hi. Jakob in a tapa Joseph si mah hidan in gingta in kap huphup mahleh atak in a si kei! Hinna Lallukhu ahihleh, a tawppha a gin-om a, a vualzou' teng aa ding ahi.
Huaiziak in, "Na omdan uh Khrist tanchin hoih toh kituak sak photphot un......." chih theikawm in nungta lehang i khotang uh, i saptuam uh a kikhek ngei ding. Khrist Tanchinhoih tuh, hong PIANNA, SIHNA, THOHNAWNNA ahi. I lungtang ah Khrist Piangsak in, i khelhnate a sihpih bang in en leng i khelhnate sisak in i vuikhawm ding uh. Vualzou a, a thohnawn bang in thil siamthak hihdan kithei in thounawn ni. Si lou pi a athak a piang(Piangthak) chih omlou ahi. Piangthak i chih tuh, a thak a piang chihna ahi. A thu a hoih mahmah, a zuih a haksa.
Hehpihna ziak a ginna tawn a hotdam a om i hihdan uh kithei in, i gin uh theih a, khelhnate kisiik(nunghei) a, Khrist Tanchinhoih toh i omdan uh kituaksak ni. Innkuan ah i pan ding ua, Saptuam leh khotang ah abanban in hong kibawlhoih tou ding hi.
Ka Kipak E.
…..
*Thugelhtu, SBI, Siaha Branch (Mizoram) a seem, laigelh lam a kiva ahi. Amah thugelhte koihkhawmna: https://www.thaikawitongluan.com
