Khovel buainate'n sunchin hon bawm e,
Gentheih haksatnate'n nisim hon tuam;
Lungkham huiva bang a ka mauna gamlei ah,
Laukha'n hong leeng in Immanuel.
Toupa aw hong leen in nuai simlei daidam ah,
Nisim khemna dougal zinglai ah;
Ka nung leh ka ma ah hong ching den inla,
Khamuanna khut toh hong leen den aw.
Omlai vei ngaihtam sialna simlei zaw,
Sunchin naubang kahna'n lawm lua sa'ng e;
Itna kha ka tung ah hong zaak in Toupa aw,
Na angsung munmuang hong beel ning e.
Gal in don ve'ng tungchiang Vangkhua etlawm,
Anbang it khensate nuam a leenna;
Naubang nui hiauhiau in Thianmang lambang paak uh,
Tua mun tung di'n hambang hong huai in.
Aw tangtawn zing ninou hong suak ding a,
Ka buainate meibang hong thengsak ding;
Khovel buaina tung ah vabang in ka leng dia,
Halleluiah nuam in lengta ning.
https://www.youtube.com/watch?v=w0gn6qJyulc
-------------------
Laa Hong Piandan:
Leitung a piangkhia mihingte leh hinna nei tengteng in siatna leh sihna maituah dinga piangkhe chiat I hi uhi. Tuamah bang in Khalam kalsuanna ah leng hong vuallelsak thei, hong hihse thei, hong that a hong gimsak nuam a bangmahlou hong suaksak nuam gige melma lian Setan leh a vanzat chi tuamtuam tam mahmah hi. Hiai Laa in a tuppen bel, Khristian gingtute khovel a khosa lai, khovel' a lah hi hetlou, Pathian' sepaih muanhuai te'n i hinkhua ua niteng a Setan toh kidou a kuamah hon theihpih leh hon theihpihlouh mimal a Setan gal dou a gaalphual(battle field)a om gige te I hihna. Hiai bang hun a Toupa' ompihna kia lou i suan leh muan ding omlou, Pathian' Khammuanna khut in hong letna kia toh khovel tunga vualzou ding i hihdan genna ahi (Ephesate 6:10-18, Sam 139:5 en in).
Laa’ Thu Genchetna:
Tang 1na: I tenna leitung(khovel) ah niteng in buaina tuamtuam, Setan' vanzat gal chi tuamtuam, a ziak(point) tuamtuam a beih a i omlai in, vuallel kisak hun in Immanuel' ompihna poimoh i hihna genna ahi.
Sakkik: Niteng a khemna/khelhna toh kidou a i omlai, gamdai a om mahbang a eimah mimal kia a haksatna i thuak hun ah inung-ima ah Toupa'n a Khamuanna khut in hong len henla, hong ompih in hong khah ngeikei mahmah leh chihna.
Tang 2na: I tenna leitung nat-le-sat, lungngaihna gam i ngaihtuah chiang in kah vungvung, kah ngoihngoih a mau vengvungna ding in hoih in kilawm lua hi. Hiai bang haksatna lak ah Toupa' itna kha(ak/vasa pite'n lauhuai laka a noute' tunga a zakkhum bang un), i tung uah Toupa' humbitna leh kepbitna poimoh petmah I hih banah Amah' angsung kia munmuang pen leh bithuai pen belh ding lunggulhhuai tuntun genna.
Tang 3na: Hon paisansa i ittak nu-le-pa, pi-le-pu, u-le-naute Thupina gam, i lametna van khopi etlawm ah, kipak tak leh nuam taka Toupa pahtawi a omte kiang tung ngei ding a Toupa' ompih leh makaihna ngetna.
Tang 4na: Khatvei tei I sihnung in hia..I damsung in hia… Toupa hong pai chiang in leitung haksatnate nuaisiah in Tangtawn khua hongvak ding a, Tatna bukim I tan chiang in Toupa' ziak leh Amah vang in sihna, buaina, haksatnate tunga vualzou in i leng ding uh. Tua hun chiang in i lungkhamna tengteng beita ding a "HALLELUJAH!", lungkimtak leh nuamsatak a om tawntungta ding hihang!
THUMAL GENCHETNA:
Khovel: Leitung
Sunchin: Hunteng
Nisim: Niteng
Huiva bang mau: Vahui banga ham
Gamlei: Tenna leitung
Laukha: Khasiangthou
Nuai simlei daidam: Leitung nuamlou, thawmhauhuai
Dougal zing: Gal tamlua, Galphual a om bang
Khamuanna khut: Muanna khut, Khut hatpen
Omlaivei: Natna
Ngaihtam sial: Ngaihtuah tam
Munmuang: Bithuai/lauhuai omlouhna mun
Gal in don(Galdot): Ngaihtuahna toh mitkha a mu
Tungchiang: Tunglam, Vanlam
Vangkhua: Khua
Anbang it: It, Ngai
Nuam a lenna: Kipak, nuamsa a hunzatna
Naubang nui: Nui
Lambang pak: Phat, pahtawi
Hambang huai: Tonpih, pikhia, makaih, ompih
Zing ninou: Nisuak
Meibang theng: Bei, meipi banga lengmang
Vabang leng: Vasa huihkhua a nuamsa a leng diai-diai bang
