Pau.25:11 A huntak a gen ding tak gen khak tuh dangka kuang sung a dangka-eng epul bang ahi.(Paral.Bible)
Thu tuamtuam, gen theih vek mahleh amun toh kituak, ahun toh kituak lou, a ngaikhia mite adi’a kilawm lou leh kituak lou chih bang om thei hi. A hun leh a mun toh kituak thugen theite tuh mipil, mivantang tung a mi ahi uh. I omna mun, i ompih mite leh tua i dinmun lel, daih dide hun hia ? Nuih zaizai na mun ding hia ? chihte thei in huai mun leh hun toh kituak houlimna, a kituahpih thumal zang siam lai le’ng nuam mahmah ding, manpha mahmah ding, i biak Pathian zong na kipak ding hi.
Tulai in social media tungtawn in thil tuamtuam gen in, i zak masak i zak nanung kapkhe tawmtawm. A khente’n comment lungtunhuai lou taktak le poisa khollou i bang uhi. Mi tungding thei mi hanthawn thei leh mi hehnem thei lam zang siam in, hehsak thei, lungkesak leh a hoihlou lamte zangkei thei le’ng kitundingna hoihtak, kisukthalopna, manpha tak hong hih ding lamet huai hi. Michih in I poimoh thumal tampite lak a khenkhat saulou lou, hiai anuai a bang in gen le’ng:-
A.HANTHAWNNA THU (words of cheer): Naupangte, nungak-tangvalte, nupi-papi leh pitek-putekte tanpha, hanthawn ngai ngen I hi uhi. I tenna leitung nat-le-satna, lungkham-mangbatna,buaina tuamtuam a dim, gam nelhuailou, melmapa setan lalna leh thuneihna ahihziak ahi.I hun toh kituak in buaina leh lungkhamna, ei sikkhop chiat i nei ua, kuamah kisimmoh sak lou in kihanthawn siam zaw le’ng. Pau.17:22 Lungtang nuamsa in damdawi bang in thilhoih a sem a, himahleh lungtang kitamkham in guhte a keusak hi.
B. KHAMUANNA THU (Words of comfort): Koute’n haksatna khatpeuh thuakte, Pathian in kou a hon khamuanna,huai mah zanga ka khamuan theihna ding un. Ama’n koute ka haksa thuaknate tengteng uah a hon khamuan hi (2Kor.1:4). Ei gingtute gingloute toh I kilamdanna ding tuh hon khamuantu Pathian neite, Ama’n eite a hon khamuanna, huai mah zang a midangte khamuantu a pang ding a lamet I hi uhi. Muanna leh bitna mun ah zaw mipite kiang a ‘khamuang un’ vachih ngai lou, himahleh a poimohna mun a bel khamuanna thugen in mite lungmuang sak tuan lua ahi. Ei mahmah in i tuah leh i thuakte midangte tung a i gen chiang bangin mite’n sang siam tuamse uhi.
C. LAINATNA THU (Words of compassion):A tawppen in, na vek un lungsim mun khat pu in,khat leh khat kilainat tuah in om un, sanggam bang in ki-ittuah unla, lungnel takin bangkim ahkiniamkhiak un (1Pet.3:8). Gingtute dinmun ding, Laisiangthou hon hilhdan hiai bang na hi zaw mawk e.I vek ua I hihkhawm ding uh – 1) Lungsim mun khat put ding, 2) Khat leh khat kilainat tuah in 3) Sangggam bang a ki-it tuah ding 4) Lungnel taka bangkim a kiniamkhiak ding. Kuate hiam in ahih ding hilou in, ke’n nang tung ah, nang kei tung ah I kihihtuah chiat ding uh ahi. Ahon sawltu “LAINATNA” (Compassion).
D.NGAIHDAMNA THU (Forgiveness):Pathian in Khrist a noute a hon ngaihdam bang in, khat lehkhat kihehpih tuah a, kilainat tuah in, kingaidam tuah chiat un (Eph.4:32). Kuamah akhial ngeilou, a moh ngeilou ki-omlou ahihman in, kingaihdamna kipoimoh chiat hi. Ki-it mahmah leh kingai mahmah a kiteng nupa kal ah zong, kingaihdamna ding hong om hun om thei zel hi. Kingaihdam ding dan Laisiangthou in hon sinsak tuh “Pathian in Khrist a a hon ngaihdam bang in khat leh khat kingaidam tuah ding” chih dan ahi.
E. KI-ITTUAHNA(Love one another):Rom 13:8 Ki-ittuahna loungal, kuamah bangmah ba kei un; amau mihinpih itpa’n dan a zui kimta hi. Ki-itna omna ah thu hoih, la hoih, thil hoih a piang a, anop leng a nuam a, tawl leng a dam hi. Kimuhdahna, kihazatna, kihuatna mun ah thu hoih, la hoih leh thil hoih muh ding omlou, gamkeu tui omlou, sing leh louhing muh ding om lou toh kibang, tawlhuai, lungkhamhuai lua hi. Eimah I ki-it bang in innvengte it le’ng Toupa thupiak zui hiding, innveng toh kal lah chidam ding.
A huntak a gen ding tak gen khak amanphatna a let bang in, gen ding tak gen khak louh zong apoina lian mahmah hi. Khristiante I gah ding a Laisiangthou in hon sinsak tuh- itna, kipahna, lemna, thuaktheihna, migitna, hoihna, muanhuaina, nunnemna, kidektheihna khawng ahi. Hiaite ahun leh mun toh kituak in gah suang geihgeih le, nupa kal nuam ding, innsung nuam ding,Saptuam sung nuam ding, khotang hong nuam ding hi. A poimoh hun a hanthawnna thu, Khamuanna thu, Lainatna thu, Ngaihdamna thu, leh Ki-ittuahna thute zangtu hithei chiat ding in Toupa’n hon vualzawl chiat hen!
