Covid-19 ziak in khovel pumpi ah taksa a kizopna, kikawmtuahna leh kipawlkhawmnate khaktan in om a, michih i kithuahkhawmna leh kipawlkhawmna omsun, banah i hunzatna pipen tuh Social media tungtawn leh Television tungtawn ahi hi.
Huchi ahihlai in Covid-19 natna hiileng ziak in, adiakin naupangte lak ah Chimna nasatak om ahi chih haih vuallouh a muh in om hi.
School lah kai theilou a, inn a om top ahihna uah a naupang hunbi uh et in pichingte sang mah in naupangte'n thuak haksa sa zaw ding uhi. A ziakbel naupang i chih om maimai theilou a diangdiang utte ahi ua, thathou a lawm pawl a kimawl mawlte ahi uhi.
Huaiziak in, a diak in inn a kikhum a chimtak a om a hihlai un, hiai hunpen amaute i zatkhelh sakleh Covid-19 sang a lauhuai zaw natna kimaituah thei ahi chih ngaihsutna ah thei lehang deihhuai mahmah hi.
● Skul vai a heutute'n, inn a hih ding a piakte uh etzuipih ahoih a, himahleh huaitan a i beisak louh deihhuai hi.
● Inn a a-om sung un tamtakte adi'a a et pipen ding uh tuh TV ahihkeileh Mobile phone ahi kha ding hi.
● TV tungtawn leh Mobile tungtawn a leng bang en a, bang kimawl uh ahia chih ngaihtuah a etzuipih poimoh hi.
● A hunteng uh Mobile game leh a tuamtuam a a zat gige khak ua leh a taksa kia uh hilou in a lungsim ngaihtuahna mahmah uh leng suse thei gige ahihna ah hiai hunsung a hih di'a hoih a lompi deuh in bangzah hiam enle i chi ahi.
● Tate' lunglutna, hobby i chihte theihpih a, zonkhiakpih a hiai lockdown hunsung a sinsiamsak poimoh ahi.
● Etsakna: Pakbawl dan, inn hah dan, innphiat dan, kuangsil dan, ahihkeileh khutsiamna toh kisai a thil tuamtuam bawl, laigelh, milim gelh leh tangthu khawng simsak.
● Khalam vai ah thumdan, Laisiangthou sim dingdan, lasak dan leh adangdang..
● Ahihpeuhmah uh a taksa uh leh lungsim ading a hoih thei ding leh khantouh vai dingte ahina hiam chih nu leh pate'n etzui ding a poimoh mahmah ahi.
● A hun zatdan uh khak chip ding chihna hipahlou in, hun a piakdan uh etkaipih a, hun bikhiah neitak a a lunglutnate uh etzui poimoh ahi.
● Amau ut tantan leh nopsak tantan chi mailou a, a huntan bikhiah ding nu leh pate mohpuak ahi hi.
● Khenkhatte'n hunlem chi in hun neihteng in Mobile games tuamtuam kimawl den uh a, a kimawl mawl sang un chi in nu leh pa tamtak in poisa lou uhi.
●Naupang i chih taksa hiangte tangtang ding a a om hunlai uh ahi a, a ngaihtuahna uh leng a paihat lai ahi hi. Huaiziak in khutpi kia tang a, a mit leh ngaihtuahnate un khutpek sungtan lel a etet mawkpen uh a taksa kia uh hilou in, a lungsim ngaihtuahna ua ding tanpha a hoihlou ahi chih phawk ding ahi.
● Social media hiam, internet hiam a hunzang a hihtak ua leh leng, huai tungtawn a salam leh lungsim a khantouh huai bang et ding leh sim ding a om a chih etzuipih ding ahi.
● Lockdown sung a a hun zatdan uh, i hihsakte leh i etkol dan bangbang uh Lockdown zoh chiang a hon ngeina seh thei uh ahi.
● Tunglam lah en phalou, lei lah mu phalou, kim leh pam leng mu phalou ding khop a TV leh Mobile phone in a mai uh leh lungsim uh liahliah kha hikha thei ahi.
● Pathian apan vualzawlna Goumanpha ahihna uh thei kawm a, a khonung a i kisiklouhna ding a tu ahunlai ahi chi nuam i hi a, i gente kialou leng ei mah ah i theih tampi a om ding hi.
● Hun paisate a kol manlou, enzui manlou i hihleh tua manta ding i hi ua, paulam ding om theilou hi.
● A chim uh hehpih luat ziak a ut dandan a i om sakleh i hehpihna gah uh khum gigelou thei hi.
● Maban sautak enkawm a, huaite sinpih a, bawlhoih leh chiilna ding a hun manpha ahi chi a panlaak poimoh mahmah ahi chih thei leng i deih ahi.
● Hundang a na makaih khalou, na sinsak khalou i hihkhak leh tu a hunlai ahi, kisathak ni. Tate i kepdan leh hun i zatsakdan enpha thakthak nihang.
● Innsung apan a sinkhiak sang a huihkhua leh TV tungtawn a thilsia tamtak hong sinkhak ding uh lauhuai mahmah ahi chih phawk in, nu leh pa i hihna ah i dinmun pen zatdan siam ni.
● Tate van di leisak a, nek ding pia a School kaisak maimai ding a nu leh pa hilou i hi ua, Pathian deihdan a tate kem a, a paina ding lampi a chiil ding a mohpuakna neite i hi uhi.
Hiai dan omthei ahi chihna a kigelh ahi a, kimtak a gelh ahikei hi. A thu omdan bongpi kigen ahihna ah, aban teng mahni ngaihsutna ah suangtuah theih ding hi. Huai bang omthei mah ahi, khovel khantouhna leh buaina lak ah tate etzui ngai eive maw chi a panla thak ding in i kideihsak uh ahi.
A hunlai a etzui ahihkei ualeh maban kum bangzahhiam nungchiang in kikhel khathei a, innsung leh khotang mahmah a ding in natna lauhuaipi suakkha thei uhi.
