Toupa saptuam, A sisan a hon tatte’n i Toupa hon deihdan in Amah nung i zui taktak na uhiam? Luka 9:23 ah Toupa’n hichi’n Ana gen hi, “…Kuapeuh in hon zuih a ut leh, amah kingaihsaklou in, niteng a Kros pua in honzui hen.” Toupa nungzui utte adi’a hiai Toupa kammal kha teeltheih (option) hilou a, zuih di’a thupiak ahi. Mahni-angsung di kia khual a, khovel thilte enlah kawm a Toupa Jesu Khrist nungzuih theih ahikei hi.
May 12, 2020 nitak lai ka simlai in, missionary khat tanchin tomchik a kigelh ka sim kha hi. Huai in ka lungsim hon sukha in, nasatakin hon kingaihtuahsak thak hi. Hiai missionary pa ahihleh Baron Von Veltz, British Guiana a missionary a ana kuan ahi. Ka laisim gelhtupa’n Baron Von Veltz tanchin hiai bangin ana gelh hi — “Kum bangzah hiam paita in, British Guiana a missionary di’a kuan a ut ziakin Baron Von Veltz in Europe gam a a hihna (title), a neih-le-lam leh a sum muhna tengteng nawlkhin in paaikhia a, Missionary hidinga ahihna (title) a koihkhiak lai in hiai a na gelh hi: ‘Khrist a piangthak ka hih nung in khovel a sungkuan thupitak a piang hih kei ding in bang ding ahia? Khrist sikha hih ka ut lai in, toupa (lord) chih hihna (title) kei dingin bang ding ahia? Pathian hehpihna kapoimoh lai a, ‘azahtakhuai’ chi a sap kei ading in bang ding ahia? Hiai thil bangmahloute paaikhia in, Toupa Jesu’ khebul ah ka luikheta hi.”
Thupi hinatel e, Toupa Jesu Khrist adi’a mi kipiakna..! A Kumpi leh a Hondampa adi’a kal a suan ut ziak in Baron Von Veltz in hiai khovel thupina, hauhsakna leh nopsaknate a na koihkhia in, a na nawlkhin hi. Hebrute 11:24-27 ah Pathian a ginna a mihangsan Mosi in leng Aigupta lalna, nopna leh hauhsaknate amah Sampa kipahsak theihna ding in a na nawlkhin hi. Mi’n Pathian a theihna a thukseem a, Toupa Jesu Khrist a it semem leh khovel leh a sung thil omte toh kikhen in, kigamla seemseem ua,mi’n Pathian a theihchian seem leh Pathian adinga a kipiakna thuuk in nasa seemseem hi.
Baron Von Veltz tanchin ka sim khak tomchik himahleh, ka lungsim honsun a, thil saupi hon gelsak hi. Tuni’n ei, Jesu Khrist gingta-a A’ nungzui kichite, Amah a ding in bangtan in i kipekhia ua?Khovel thilte bangtan in i nawlkhin ua le? Nipini teng a biakinn kai, saptuam sunga fel mahmah a kilang, koihiam khat a sahkhua hihna gelhlutna ding omchi’a kisuanglah hetlou a “Khristian” chi’a gelh thei pah. Mite theih a Pathian Thu thei petmah, saptuam leh khotang (society) a kizang mahmah, himahleh, Pathian min a khovel nuse ngamlou ki-om thei a, om leng ki-om him hi. Khovel it/ lenkip kawma Toupa’ nungzuihtheih hilou hi (1 Johan 2: 15-17).
Mi tamtakte’n hiai khovel hun tomchik sunga Toupa Jesu Khrist nung a zuihna uah, khovel thupinate, khovel nopnate leh khovel hauhsaknate a nawlkhin lai un, eilak ah, tampite’n saptuam sung na-ngawn ah hiaite delh in, hiaite ziak mah a kina (quarrel) leh kidou (fight) om sek uhi. Lungsim taktak leh lungsim tengteng a Toupa Jesu Khrist nungzuilou mi tampi ki-om hi. Hiai bang mite theihtheihna tuh, Khovel a khiaklah dan uh, khovel a etlah dan uh leh khovel a itdan ua pan theihtheih hi. Singkung a gah apan bangchibang sing hihiam chih kitheithei hi.
Khovel thuneihnate, dinmun (title/position), sum-le-pai, innmun-loumun leh khovel thil tuamtuamte etlahna leh deihna ziakin innkuan leh i saptuamte uh kihuatna a dim in, khenzaak in a omta hi. Innsung ah nu-le-pa tamtakte’n khovel thil kia en in, hun tomchik sung ading, khovel thilte a huaiham in, lungkimna nei theilou tampi ki-om hi. Innsung a khalam hinkhua ding limsaklou a khovel thilte a lungsim tengteng koih a, ngaikhawk zaw. Tate’n, Jesu Khrist a hinna diktak a neihna ding uh sang a, kam (job) a neihdan ding uh leh khovel a nuamtak a khosak theihdan ding kia uh awlmoh tampi ki-om hi. Pathian thu in, “Min khovel a pum in nei henla, a hinna tan leh amah ading in bang a phatuam dia...?” anachi hi (Matt. 16:26).
Tate, a neulai ua Pathian thu a hoihtak a kemlou a, na kichiil louh ziakun tamtakte segawp in, Jesu Khrist itlou nana tuhkhovel ahbangchibanga hoih leh lian hihna honnei mahle uh Pathian’ deih bang innkuan kipahna leh chidamna tun tuanlou hi. Mi’n, Toupa Jesu Khrist a teela, amasazaw a akoih chiang in, huihsia, vuahsia atun hun inleng Toupa ah kipak gige thei uhi.
Innkuan tamtak ah Pathian in mun laizang tang nawnlou a, huaiziak in khangsawn ding, ta leh nau tamtakte’n Pathian itna leh deihna taktak neizou nawnlou uhi. Hiaite ziak mah in, innkuan kisegawp tam deuhdeuh a,innkuan kisia, Pathian laulou a tam chiang in khotang (society) leng hongse tou hi. Pathian in innkuan tengah mun laizang tang hileh, sualna tuamtuam i tuahte uh — numei-pasal kal a thanghuaina, guktatna, zu-le-sa leh khamtheih tuamtuam a buaina, kithah kimat, nupa kikhen leh a dang tampi i tuahlouh ding uh om ding hi.
Bang im ding a om a? Mihing kal ah im-in-seel (hide) thei mahle, Pathian ma ah i seeltheih ding om tuanlou hi. Saptuam sung ah Toupa it taktak a hing mi bangzah i om ding ua le? Khovel thilte delh a, thuneih kituh, gam kituh, sum-le-pai kituh leh dikzaw hih kituhna a dim gawp i hizaw uh hiam le? Bangchidan a Khrist a piangthak, Pathian tate, Pathian a innkuan khat kichite khovel thilte ziak a kihua/ ki-iplah leh kisia a, khovel thilte ziak a kikhen zengzung mawk I hi ua? Za lak a sawmkua i kikhennate uh khovel thil etlah ziak ahi chi le'ng ka genkhelh ka gingta kei hi.
Toupa nungzuihna ah, saptuam a lamkai hihna nei tuamtuamte’n bang ahia i lamet uh? Lamkai hihna (title) leh thuneihna kia maw? Saptuam lamkai leh heutute’n a nasep lam enkhalou a, hihna (title) leh thuneihna kia enkha i hih ding uh lauhhuai lua ahi. Saptuam sung a belampu khenkhat, khovel thilte kituh a, a buai ziak ua belam amhai tampi om a, kha mangthang tampi mualliamta hi. Saptuamte khovel thil ziak a i ihmut sung ua Setan in nasatak a gam honla ahi. Khovel a muhtheih thilte leh thupinate kia en a, Khrist Saptuamte Tanchinhoih thehdalh i mohpuakna uh ahihlam mangngilh khak ding lauhuai hi. A hikhin i hizaw ta uh hia le?
Khrist a ka saptuampihte, hunhoih i neihlai in khatvei ei-le-ei i ki-etthak uh hun lawta hilou hiam? Hon tanpa, Toupa Jesu Khrist nung na zuihna ah, Amah a dingin bang na pekhia a, bangtan in na kipia a? Pathian naa i sepna uah chihtakna toh, diktattakin i seem uhia? Tua na dinmun, tua na omdan geih a Toupa maituah ding hileteh, na maituah ngam diam? I hihna leh khovel a i thilbawl tengteng kilang ding ahi ngal a. Ei-le-ei kikhemkhem hun hi nawnlou a, Pathian mai leh mahni a chitak leh thutak hun ahita.
Hunhoih na neihlai in, a honsiampa, Toupa Jesu Khrist a dingin na pumpi in kilankhia in. Na neih-le-lam Toupa adi’n it ke’nla, lankhia in; na latkhiat theihlouh hun leh na piak theihlouh hun hongtung mahmah ding ahi. Khovel enlah in, khe-lah het ke’n, khovel leh a sunga thil omte’n lungkhamna leh mangbatna lel hontun ding uh ahi. Avek in lankhia in, Toupa’n tangtawn kipahman setheilou honpeding hi. Leitungah na gou khol kei inla, van ah hun na neihlai in khol meng in. Bangchi’n mi’n khovel lenden kawm in Khrist nung a zui thei di’a? Khovel enlah a, khovel a thilte khelah mi a dingin Khrist nungzuih theih hilou hi. Toupa na it dan, khovel na nawlkhin dan apan kitheithei ding hi.
“Khovel it kei unla, khovel a thil omte leng it sam kei un. Mi kuapeuh in khovel a it leh Pa itna amah ah a omkei hi. Khovel a thil om tengteng, sa utnate, mit utnate, damsung thupina limte Pa a kipan ahi kei a, khovel a kipan ahizaw hi. Khovel, a utnate toh, a mangthang lellel ahi. Pathian deihlam hihmi bel tangtawn in a om gige ding hi.” – 1 Johan 2:15-17
“A tan theihlouh ding a muh theihna di’a a koihden theihlouh ding pekhia mi chu mihai ahikei hi.” – Jim Elliot, missionary to Ecuador
