“Lau kei unla, lunglel sam kei un; hat tak leh hangsan takin om un.” (Joshua 10:25)
Hangsanna tellou in lohchinna leh masawnna mihing in kingah zoulou hi. Mimal hinkhua lohching leh lamzang ahihtheihna ding in hangsanna leh tup tintenna poimoh hi. Hangsanna tuh lauh neilou chihna hilou in, lauhhuai leh huphulh huaite tung a vualzohna ahi zaw hi. Ahitak a gen in, lauhneiloute mihai ahi ua, huan lauhna in a thuzohte mi dawilok/lauthawngte ahi uh. Mi lohching hihna dingin hangsan suah a pan teitei akulmoh gige hi. Anop hun teng seem a, banghiam lauhhuai leh nopsak louhna om chiang in tawpsan mai chihte mi kuhkal leh hangsante omdan ahikei hi.Mosi in a sih ding kuan in Israelte makaitu ding Joshua kiang ah hangsan leh kuhtaka om dingin thuhilh hi (Deut 31:6). Huchi’n, Joshua in makaihna honlak a, Pathian in Joshua kiangah hangsan taka om ding leh lau lou ding in A thuhilh hi(Joshua 1:6-7).
Joshua in leng Israel mipite hangsan taka om ding in a thuhilh hi (Joshua 10:25). Hiai Laisiangthou apan hinkhua lohching, gahsuah leh manpha neih theihna ding in kuhkalna leh hangsan kulmoh ahihdan kilang hi. Nekzonna leh siamsinna vai ah leng a kuhkal leh hangsan, midangte taisiat hun a leng pangngam mite mah lohching uhi. Hiai Coronavirus pandemic (hiipi) ziak in khovel pumpi sumdawnna, nektakzonna (Economics) naaktak in hong kikheng kha ding hi. Khenkhat in, hiai hipii ziakin hun khenna BC (before Covid-19 era) leh AC (after Covid-19 era) hongpiang ding ahi chi hial uhi. Bangteng hileh hangsan leh tup tiltelna toh hinkhua zang lehang lamzang leh mavang ding hihang. Ahihleh hangsanna I chih bang hihiam, chih I enzual ding uh.
Khatna ah, mihangsan in lauhhuai leh haksatna a phutkhak hun in leng lungkia mai louin atup-le-ngimte mualsuah ding in pan ala hi. “Courage is not absence of fear, but triumph over it” -Nelson Mandela.
Nihna, lungtang a tuptiltelna nei mi’n huai mah seemsuah ding in hangsan a suah ahi. Tup tiltelna leh huai seemsuah ding a thanopna leh lunggulhna (passion) nei mi tuh mi hangsan ahi. Daniel in kumpi nek-le-dawnte a kihih-thanghuai lou dingin a tum tiltel hi (Daniel 1:8). Buaina leh haksatna phutkhakzek chiang a dual leh lunglel a om pahpahte hiai passion neiloute ahi uh.
Athumna ah, mihangsan in daltu leh haksatna a tuahte zoh vuallouh ding in a ngaihtuah ngeikei hi. Huai naksang in, hiaibang thilte apan kibawlhoihna ding sinlai ala zaw hi.
Alina ah, mihangsante tuh lungtang a gintakna kichiantak leh theihtelna neite ahi uh. Lungke baih leh lauthawng mi tuh lungtang a ginna leh muanngamna kichiantak neilou mite ahi zaw uhi.
Angana ah, hangsanna ding in tuailai lungput akulmoh hi. Tuailai I chih chiang in akum dan a sim hilou in, lungputdan ah ahi zaw. Hiaibang mite’n muhkholhna leh kimuanngamna a nei uhi. Anuam lam kia enmai lou a, a haksa leng maituah ngam tuh tuailai lungput ahi. Na hansanna zahzah in hinkhua ah kal nasuan thei ding hi.
Hangsanna tuh lungput ahi a, na hihna (character) leng ahi. Mi hangsan in mailam hun ding muhkholhna a neia, hunhaksa a tuah hun inleng kuhkal takin apang teitei.
“courage is not the roaring proclamation of victory, it is the little voice at the end of the day that says, I will try again”- APJ Abdul Kalam, former President of India
Unau, athak in hangsan I suah ding uh. Toupa’n hon vualzawl hen aw!
