Khrist a u-le-naute na vekun Jesu min manpha toh Chibai!
1. Ni 54 sung vingveng Covid-19 hiipi ziakin I omna mun chiat ah vakkhe theilou a kikulkhum(lockdown) in I omta. Sepna neite kuankhe theilou, sinlaite’n maban sunzom theilou in kidinkhawl maimah hi. Lockdown bangchik chiang a beiding? Bangchik chiang a sinna/sepna maban sunzom thei ding? chih tuh lungsim a lianpen a suak mai hi. Huan, hiai natna in hon matkhak ding lau in khat-le-khat kimullit tuah in ki-om a, itna leh deihsakna nasan kiamzou abang hial hi. Khovel a ding in, hiai Covid-19 pandemic leh lockdown kihon leh kihon louh ah maban ding thilteng kinga abang mai hi. Ahia, ei gingtute’n bel Lockdown leh Covid-19 pandemic khenlam pekah Pathian hehpihna ziak leh Jesu Khrist thohnawnna tungtawn in LAMETNA HING (1 Peter1:3) I nei uhi. Hallelujah! Huaiziakin, hiai haksatnate I tuah in leng khovel mite banga kingaisia leh lungkia in om kei ni hang. Thil bangkim Pathian akipan ahi a, Amah aa vek ahi(Roman 11:38). Huaiziakin, lau keini hang. Family a omte dingin innkuan maitam doh theihna hun ahihban ah khovel leh social thil toh kisai kisinsakna leh khat-le-khat kipanpihtuahna hun lemchang hon bawlsak ahizaw hi. Huan, mahni innkuante toh omkhawm khaloute a ding in leng Pathian toh kithuahna hun lemchang leh innkuante ziaka kipahthu-genna leh amau adi’a thumsakna hun manpha tak a I zat chiat uh lamethuai hi. Akipahhuai nawn khat ahihleh, hiai hiipi apan kivenna dingin mask(muktuamna) poimoh a, mit kituamlou hi. Huai ban ah, internet leh power supply kiningchingtak I nei uhi. Huaiziakin laisimna leh maban adi’a kisakkholhna hun manpha a I zat chiat ding uh leng kideihsak hang.
2. ‘Biakinn kai, Biakinn chihte ngainawnlou, nidanglai hihdan ahi, sermon leh thil bangkim online ah om…’ chih ngaihdan neih khak ding pilvanhuai kasa hi. Ahitakin, biakna limsak leh Pathian thute ahihna banga sinsak biakinn leh tuabang saptuam tulai khovel in a poimohpen ahizaw hi. Pathian thupiak bang a kingaihniamna lungsim toh gingtu khat-le-khat kipanpihtuah leh kihasuan tuah a Khrist nungzui (Phillippi 2:1-11a kigelh bang) saptuam leh biakinn tuh eite aa dinga a lunggulh huaipen leh tuhun a ding a akulmohpen ahizaw hi. Huaiziakin, kikhopkhawmna leh biakna I neih zelte limsak chiat ni (Heb. 10:25).
Simtute Toupa’n hon ompihin hon vualzawl chiat hen aw!
