Nu Aw, na tungah ka kipak. Pathian in hon vualzawl henla, na damsung nite kipahna, lungmuanna leh khamuanna toh paikhawmin hon sausak hen aw. Nute’ Ni Special I chih hangin, nute/ numeite kia lou, kuapeuhmah adi’a poimoh lampite Ruth Laibu pansana I kikokmuhtheih hiaite bang ahi.
1. “...Bethlehem-Juda a mi khat Moab gam a om di'n ...” 1:1
Israel namte laka Juda suan Elimelek, a zi leh tapa nihte toh Pathian’ sehsa gama salam kialna tuah ziakin melmakgam leh pathian dangte be gam ah kiningchin zawk ding tupna toh pemkhia uhi.
I saduhgawlnate’ ziakin mihingte’n Pathian I kiheimangsan un, eimah lemgelna lampite I zui nak uhi. Tua in, Pathian gamchiam tunna dinga Ahon kawkmuh lampite pialsan in, leitung I hin sunga nopsakna ding leh gilvahna dingtan lel I na enzaw nak uhi. Khalam hinkhua ah leng sa-a hinglai I hihman un, phut ding leh dou ding atam di’a, akhen chiangin kialna leh dangtakna tampi tuah ding a om. Huai hun diakdiakte ah ginna a I dinkip poimoh sem hi. Huai nak sanga, Pathian deihdan lampite pialsana salam punna I delh chiangin maban mulkimhuai takin honna ngak zaw zel hi. Elimelek leh a tapate leng a maban uah sihna leh manthatna in ana ngaak maimah hi.
2. “ .... huchi'n huai numei tuh a tate nih leh a pasal in a sihsanta uhi.” 1:5
Bethlehem-Juda khua a innkuan bubit leh nuamsa a omlai, sawtlou kal haksatnate thuak ngaplouh ziakin Moab gam, Pathian theilou gamah hong pem un innsunga pasal teng in sihna tanpha tuak uhi.
Eimah hoihsak leh lampite Pathian geldan toh a kituahlouh chiangin muingillou leh vualzawlna hilou hi. Bangkima Pathian deihdan apipena koiha Amah kipisak ding ahihlai in, Elimelek in salam kiningchinna ding kia ana enkha hi. A zi Noami toh thupukna a lakkhelh uh a tate’n leng thuak uh. Khelhna hawi mawkmawk lou Pathian ahi a, pate’ gitlouhna tate’ tunga thuk ahihdan Laisiangthou ah kimu hi (Exo 20:5 & Nam 14:18). A tate’n suan-le-pak nei manlou a si tuak uh ahihzawkmah chia’n, khangsimna a khangmang/ khangmong ding dinmun ah ding uh. Eimah kikhutdot a mahni lemgelna kia-a kinga lou a bangkima Pathian lungtuak hih I tup lianpen uh ahihgige ding ahi. Eimah damsung ading kia lel di’a hing loua khang sawnsawnte’ adi’a vualzawlna tuntu I hihtheihna di’n Pathian’ deihdan pialsanlou a belh chinten ding ahi.
3. “.... Moab gam a kipan kiknawn ding in a kisa ua, Toupa'n nek ding pia in a mite a vehdan khawng Moab gam akipan a na zak ziak in.” 1:6
Naomi hinkhua a thiltungte’ ziak le hithou in, leh a paikhiaknasa gam Toupa’n avehdan hon theih chiangin hong lunglengin Pathian sehsa gama kik ding honsawm hi. Naomi adi’n lam-etna kong omsun tuh ama’ gam mahmaha kiknawn chihlouh amaban ding mialtak ahi. Ahi a, a lungsima kikhekna nei in a gamlama kiknawn tuh hon taksuah hi.
Pathian’ deihdan lampite I pialsan lai inleng chiklaipeuha kiktheihna ding kong tampi leh zapi Pathian in hon honsak gige hi. Huai sepsuahna dingin deihtelna tuh eimah ah a om. Huai dingin I zuihlel lampite taisana kihei a kikheka, Ahonpitu’ deihdan lampi zot tuh ei mimal thupukna liauliau ah akinga. Mihing etdan in Naomi adi’n maban lam-etna om hetlou abatlai in, a deihtelna zangdik in Pathian kawkmuh lampi zui thei dingin, ahun laitakin a-omna akipan thoukhia in kal suankhia hi. Eite’n leng lungkhamna bangzong teng I tuah hun in leng I omna theichianga, huai akipan Pathian lam zuan di’a kal I suan ding ahi. I mihinglui pen nungngatsana Pathian hon theihsak lampi thak zuih tuh I damna ding ahi.
4. “....na Pathian ka Pathian ahi ding.... Toupa'n a hihhih in hon hih mai hen la, huai sa'ng a thupi zaw in leng,...” 1:16 & 17
Moab mi, Ruth in Naomi’ ta Malon pasala ahon neihchiangin, athilbangkim taisan in apasal’a hidingin avekpiin kipia hi. Jentel numei gingloumi ahihhangin, akhovellui taisanin Israel Pathian Hing tuh a poma (proselytes) apasal’ sihnung lam-etna omnawnlouhnung tanpha in anu’ tungah aginomna langsakin dingkip den hi.
Eite’n leng I mihinglui taisana Jesu Khrist toh khalam kitenna I neihni akipan siamthak I hi ua, Amah aa liauliau I hi uh. I pumpi, I hinna leh I bangkim Amahaa ahita. Sa-a I hinsungin haksatna leh mangbatna tampi tuakzel mahle’ng I kipiakna a I dinkipa I zuausanlouh tuh tangtawn hinna ngahna di’a Amah toh I kizopna guipi liantak ahi. Ruth banglou in, eite tuh Khristian innkuana piangte I hi uh. Aminpu Khristianna tanah I hunsak ua, I hinkhua mahmah ah Amah batpihna leh A thu theihpihtu hihna langsaklou I hikha ding. Ruth in, “...na paina peuh ah ka pai ding a; na giahna peuh ah ka giak ding a; na chite ka chite ahi ding ua, na Pathian ka Pathian ahi ding. Na sihna peuh ah ka si ding a...” chiin akipiakna apomkip chinten hi. Khrist toh khalam kitenna I neihnung huai kitenna lenkip chintena, muanhuaina a dingkip dingte hi hang.
5. “...Bethlehem a tun un a khua in a ling ua, numeite'n, Hiai tua Naomi ahi maw? a chi ua.” 1:19 & 20
Apaikhiaknasa khomite’n ana theilou uh ahikei. Kikhekna amuh ziakua lamdangsa ahizaw uh. Huai hunlai kum 10 vel paita in innkuanbubit leh kiningching kisakna toh kisatheitakin apaikhia uh. Himahleh, huai khovel thilte’n sawtdaihlou ahihdan hongkiknawnna in alangchiansak mahmah. Khovel et-in bubittakin apawtkhia ua, ahawmpi toh ahongkiknawn maimah hi. Amahmah in amin Noami chia samloua Mara chia sap atelzawkna in genchiang mahmah. Naomi, ngaihbaang leh hoihna/ kipahna chihna ahi a, Mara ahihlebel khaatna/ lunggimna chihna ahi.
Khovel thil I suanmahmahte’n tangtawn daihloua, kipahnakim honpetheilou hi. Khovel thilte’n I lungsim aluahdim chiangin Pathian adi’n mun-awnglou hi. Ahihhangin, kingainiama mihingte bangmahlou I hihdan I kimuhcheta, I hihna bangbang toh Pathian I naihchiangin Amah adi’n mun-awntheiphet kihi ahi. Pathian Khasiangthou in hongluah theihna di’n I khovel thilvomte I sunbuaksipsip kulmasa hi. Kikhekna taktak hinkhua ah, I mihinglui akipan mihingthak I suahna I mihinpihte’n haihlou hial ding uhi.
6. “.... lou lam ah ka hoh di’a, mi lou ah hon hehpihmi peuh buhsang ka va zong ding aw,...” 2:2
Ruth adi’n theihngeilouh gama pasal sihsansa leh anu, meithai mah vuak toh khosak ding tuh thilhaksa mahmah ding dinmun ahi. Maizum leh kingaisia a kibukhumtheih dinmun ahi. Ahihkeileh, semgimlou leh baihlamtaka nekding muhtheihna tuh ama’ adi’n teelhuai zaw-leh kilawm dinmun ah ading. Meithai tuak khosa ahihna uah, ahihna uh paulap anei in mite’ hehpihna zonga khutvadoh maituh ama’ adi’n baihsam mahmah thei dinmun ahi. Ahihhangin, apasal sikhinta mahleh kikemsiangthouin adamlaia aginom bangin huai ginomna tuh alenkip denlai hi. Innsungkepna leh mohpuakna ama’ liangkou a kinga tuh kitheihmohbawl mailou in nekzonna ah adiklampite haksa in tawlhuai mahleh athamahmaha zongin lohkhia hi.
Bible in “... nasemmi tuh loh mutak ahi..” (Luka 10:7), ana chi hi. I nekmuhnate leh muhdante bangchibanga muh hi hiam chih kivelthak kul hi. Pathian’ deihdan toh kituak na hiam? chih mimal ki-et a kidotthak tuak mahmah. Pathian deihdan toh kituaklou abaihsam leh anoplamte kia a nekmuhsawmte I hikha ding uh. Seplouhnatunga agah muhnate, tawmchik tunga apung tampi laaksawmna leh, tuhlouhna-a gah lohsawmnate’n Pathian’ mit sipsak hi. Lai Siangthou in zaw hiai na chi hi: ‘Khitui ke kawm a tuhte'n nuamsa tak in a at ding uhi. Kap kawm in buhchi kuan khiakpih mahle uh, a buhphalte uh tawi in nuamsa in a hong pai nawn ding uhi’. (Sam 126:5 & 6)
Huaiziakin, Ruth bangin ginomna lenchinten kawmin nasep ah thanuam, kuhkal leh chihtakna toh sempeuh le’ng I sepgah khumzawsem mu ding hi hang. I sep bangbang lohmuhna ah lungkimna bukim om a, vualzawlhuai semlai hi. Huaimahtuh Pathian deihdan lampi zuihna leng ahi.
7. “....nang lou lah kuamah a tan mi di’a kilawm a om ngal kei ua; huan, nang zom in kei ka hi
chih nang hon theihsak kiphamoh in ka thei, a chi a. Huan, ama'n, ka tan ding...” 4:4
Kitanauna lamah Naomi adi’n Boazi sangin mikhat tanau bulzaw om hi. Huai tanaubul tuh, gam’luahthei atanau uh omsun ahi. Hiai tanaubul banah Boazi hong hipanphet hi. Boazi in khovel dan lamah danpalsat mailou in, Elimelek gou leh khang manlouhna ding in Ruth kitenpih dingin tanaubul kiangah amohpuakna subuching dingin ngen. Ahihhanga, theihpihtu upate’ mai a nial ahihziakin, tanaubul bana mohpuakna tuh Boazi tungtu hi. Huai mohpuakna tuh Boazi in semkhia in Ruth lakah Obed hong piang hi. Huaimah tuh David khanggui kipatna hong hi a, Jesu Khrist khanggui zomtu Jentel numei hontotkhakna leng ahi hi.
Boazi adi’n baihlamtaka Ruth kitenpih theihna hun piak in aom. Pathian lama Boazi’ ginomna chetna leng ahikhading. Huai ginomna leh muanhuaina tuh lenkipin ama’ mimal l emgelna ah kingalou in, angakzou zaw hi. Huaibanah, huailamthu ah kipawngnoh mawklou in, agam dan leh Pathian dan piakte (Diu 25:5 & 9) bohselou in lenkipzaw hi. Eite’n leng khovel I khualzinna ah Pathian dan leh gamsung dan-le-dunte palsatloua ngakzohna toh dan zuihkim I mohpuak uh ahi. Hunlem masa leh kilawm banga kilangte leng Pathian lemgel hiveklou thei ahi chih lungsima theikawma thilbangkima Pathian dongkawma kalsuan tuh vualzawlhuai ahi.
Pathian lemgel avuaksuak ngeikei chih Ruth tungthu ah hihlat in omsemsem. Jesu Khrist khangthu kisutna (Matt 1:1-17) ah Jentel numei nih genlatkhakte’ laka khat in pangkha hi. Pathian’ taangchinna Ruth a hihlat ahihtheihna dingin, asiangthou hinkhua Ruth in anazang hi. Ginomna leh chihtakna toh abelh Pathian leh anu ana taisanlou in amuanhuaina langsak behlapzaw hi. Huaite’n Pathian alungkimsaka vualzawlna thupitaka vukin avanglian Jesu Khrist khangthu a heltel in omsak hi.
Eite’n leng Jesu Khrist nung I zuihna ah muanhuaina, ginomna, chihtakna leh asiangthou hinkhua hihlangte hile’ng A’ van-gou luahpih di’a minkhumna laibu a gelhtel khakte I hi ngeingei ding uh.
Vaikhah : Nute’ Ni I zatna uah, Naomi banga taisan leh khekkhiak ding I mihingluite nunglama koih in gingtu hinkhua a Pathian honsehsakgam zuana I khualzinna ah Ahonsehsak lampi Khrist tuh I pialsanlouh ding uh ahi. Leitung hinkhua ah I pialkhak hun aomtak lezong, I pialna san theichiana kisiika Amah I zot in zaw avuiching khang hi dingin Ahon vualzawl ngei ding hi.
Ruth banga I khovel pathiante taisan leh nungngatsan in, Pathian Hing leh Siangthou toh khalama kiteenga huaimah tawisanga siangthou, ginom leh muanhuai tawntung dingin I kichial hi. Huai hileh, A’ van-gouluahpih dinga chiamtehte I hi ding uh. Jentel numei, namniam leh theihphaklouh ahihlai nangawnin Toupa’n domsangin leitunga mihinga A Tapa hong pianna dia khanggui zomtu poimohtak suaksak hi.
Boazi banga diktat leh khalama muanhuaiin, thilbangkima Pathian dong leh ngaakzou hile’ng A van vualzawlna eite aa hi ding hi. Pathian tung leh a innkuan-tanau tunga amohpuakna Pathian’ deihdana ahihbuchinna in Jesu Khrist khangthu ah chiamteh phak in omsak hi.
- Hiai thugelh, ka pianna Nu ka ap/laan ahi –
Toupa’n simtute tengteng A’Khanuaiah bittakin hon sel chiat hen aw!
