DOTNA 1. Heutupa “Missionary Day' week, 2020” a ding himawk hang ei. 'Missionary Day' cih kammal zak cia'n na lungsim ah bang a hong om sek a?
DAWNNA: Southern Manipur a Tanchin Hoih honglut ni, Missionary Day 110 champha hon musak khamangthangte it Vanglian Pathian min phat hang. Hallelujah! EBCC Delhi saptuam member tengteng leh DEW simtute na vek un MISSIONARY DAY CHIBAI! TOUPA’N HON VUALZAWL CHIAT HEN AW!
Missionary Day’ kammal kazak chiang in Tanchin Hoih manphatna leh thilhihtheihna ka lungsim ah hong suak thak zel in, hiai bang Tanchin Hoih hon tunte ziak in, Jehova Pathian kiang ah kipahthu ka gen sek hi. Huan, Sawltaklian Paul in “Tanchin Hoih kipahhuai tunte khe kilawm hina tel e!” (Romte 10:15b) a chih, a dikna a hon phawk thaksak zel hi.
DOTNA 2. Saptuam a seemtu, mission field leh local/ division le tawnkha, Karbi Anglong (K.A.) honghih ciang banga tuh hunbit a TOUPA nasep na patna leh kum tampi nunga Field Superintendent (FS) a na vapaina hidan in na za ung. Dik mah maw? Adikleh K.A. field a sep masak lai leh FS a painawn hun kikal ah kum bangzah a kia… Thil na kikheng/ kilamdang hon kipaksak, khasesak leh dahsak om ngei di. Tuate n'on gen thei dia'm?
DAWNNA: Dik mah e. A Gam Nna sepna a kihel ding lunggulhna si theilou Toupa’n honpiak pansan in, EBC pawlpi tungtawn in 1993 apan Karbi Anglong ah A Gam nasem ding in kana lut hi. Tua hun in ka taksa kum 23 ahi.
Pathian in A’ Saptuamte tungtawn a FS mohpuakna len di’a honsawl 2019 ahi a, ka lut masak leh tua ka lut nawn kikal ah kum 26 geih a kia hi.
Thil kikheng/kilamdang hon kipaksakte:
a) School naupang ka laihilhte khenkhat Pastor, Evangelist, Bible sin leh laisiam/sepna nei mit mahmah a ka muhte.
b) Office leh vanzat hoih leh kiningchingtak, sum-le-pai a kitoudelh thei a na om.
c) Biakinn leh semtute tenna hoih leh kilawm taktak kilam thak tampi na omte leh, gingtu leh semtu kipumpiak leh muanhuai taktak muhte.
d) Nidang a cycle nasan kizang pah zoulou, awl a kinei zou hamham ahihlai a, semtute motor cycle khawng a tai leh, khosakna nuamzaw leh damtheihna hoihzaw a omte.
e) Tanchinhoih nasatak a doudal a omna, Field a ka posting na nanungpen Dengaon mun a Biakinn kitung ding leh gingtu inn 15 apan milip 90 veel omte banah, kei pawtsan nung a Saptuam 2 leh Fellowship 5 ding thakte.
Hon khasesak leh dahsakte:
a) Seppih it leh ngaih mahmah, thupina gam a na paita Pastor Sing Taro, Evan. Sarthe Rongpi banah, Saptuam member bangzahhiam hon ngaina leh deihsak mahmahte’n hon lunglengsak in hon nehnousak mahmah.
b) Seppih khenkhat, melma khemna a puk a semzom thei nawnloute leh, gingtu khenkhat ginna puksan a na omte’n hon dahsak in khasesak petmah.
c) Gingtu/Heutu/Semtu hingal gingloute bang a gamtatna om zelzelte’n hon dahsak lua.
DOTNA 3. Kipak e. Ahihleh, K.A. a field saptuamte inntuan program(Jan 2020), kisakkholhna banga pai theilou cih thu le om. Hiai hun a thiltung leh inntuan program, heutute hon zatpihdan tomkim na hon-gen thei dia'm?
DAWNNA: EBC Saptuam in Mission Field tawh kisai a Indigenization Policy a neih pansan a, Karbi Field inntuanna KAEBC CONFERENCE 2020 Program January 29 & 30, 2020 zat di’a kigeel pen, Pathian in Amah program tawh hon zangkhawm sak hi.
Huai tuh bangmah dang hilou in Rev. T. Kamzakham, Karbi Anglong a na semsate lak a khat in January 29, 2020 zingkal dak 6 veel a tuahsiatna (Bus in na hih kha), hon mualliam san thu ahi. EBCC Diphu in inntekna la in, Field sung a heutu feltaktakte panlakna tawh Pa Kham vai hihfel ahi.
Khawmpi zang di’a hongpai General Secretary leh Director of Ministries makaih in Field Sub-Office ah DS 7, FS 4, CMSC Chairman, Co-ordinator Missions, Co-ordinator Youth, banah Field level a heutute January 29 sun a kihoukhawm in, seppih luangdamsa nitaklam a puakkhiak ding. Program a tan nei, alou theilou teng om a, a dangte’n siluang zuih ding. Huaima a Field-te Inntuanna program (program a hun nanungpen a zat di’a kigeel pen), zat ding kichi hi. Program, Pathian ompihna tawh manphatak in kizangkhawm hi. General Secretary in Pathian thutak manphatak genna nei hi. Tuazoh in FS panpihna or kithuahpihna KAEBC heutu thak dingte GS in Nna Gotna leh thumsakna nei a, huchi’n Inntuanna hun zat ngal ahi. Lai hoihtak (Transfer of Power Agreement) bawl in tua ah EBC apan Director of Missions leh Chairman CMSC in suaikai in, KAEBC lam ah Executive Secretary leh Chairman, Executive Committee in kai ua, General Secretary in theihpihna suaikai hi. Hiai program zat zoh in heutute a tamzaw tham in seppih it tak Pa Kham’ luangdamsa zui in Lamka hon zotsan uhi.
January 30, 2020 in program kigeel bangbang in hun 3 kizang a, ama ni a, hun 3 adi’a special no. teng leng guangtou in, EBC Central Choir apan lapawl leh solo, EBCC Rongali apan lapawl, Field leh Bial saptuamte apan solo chihte ngaihkhiak ahi. Thutakgenna Director of Ministries in zang a, greetings leh hasotna Chairman CMSC leh Co-ordinator (Missions) te’n nei uhi. Heutu (FS luite & Chairman luite) leh semtu masate tawh kithuahkhawmna hun leng kizang hi. Khawmpi in hunzangte tengteng memento leh gift pe chiat hi.
DOTNA 4. K.A. saptuam inntuan - tualsung saptuam zah & milip zah n'on gen thei dia'm? Saptuam goih seemtute la, bang status in na om uh...Inntuan nung kha 3 bang hong cingnawn man ahihleh, tualsung saptuamte na muhdan (Field adi'a thumtu leh thilpiak petute genkhiak louh dotna hithei). Tuban kum 10 nung saptuamte om didan (kivaipuak didan) na galmuhdan le aw...
DAWNNA: Tulel in Karbi Anglong EBC (KAEBC) te Saptuam Piching 10 leh Fellowship 6 apan milip 1500 pha lou deuh ahi uh. Semtu EBC HQ in a lak mi 7te loh 2029 tan piak touh hiding uhi. Huchilou amau a poimawh bang un, amau loh piak ding semtu la ding uhi. HQ in pension fund ding in Rs. 50,00,000/= pia in Field HQ a vanzat hoih leh manpha teng Field in a zat Bolero gari tel in pevek hi. Tuaban ah amau lam apan ngetna om dungzui in Evangelist 3 December 31, 2020 tan amau panpih di’a koih lai ahi.
KAEBC a Tualsung Saptuamte kei omtung lai tawh teh in salam leh khosakna ah nasatak in khangtou uhi. Tulel in amau goih semtu 13te loh hoihtak in pe zou uhi. Khristian mimal te’n sawm-a-khat tel in thilpiak dangdangte awlmoh tak in pe siausiau le uh sum-le-pai lam ah patauh huai het lou ding hi. Tuabang a a pankhawm siausiau thei na’ng un thumpih poimawh lua hi. Tuaban ah sum-le-pai tawh kisai a ginomna leh diktatna hoihtak a neih na’ng un thumpih tuak kasa hi. Tuban kum 10 bang hongpai leh tulel a GBC a Laisiangthou sinlel mi 14te’n hon zouta ding ua, tulel a khangthak a semsate hon nungthuap in, amau mahmah in leng plan& strategya bawl bang un, amau tuam a Mission Field nih beek hon neih zoh uh ka lamen. Tuaban ah, leitung pilna-siamna leh khosak-khoheina ah Pathian a a dopsang ngei ka gingta hi. Tua heutu thakte phatuamngaihna leh kipiakzohnate’n gah a suah ngei ka lamen a, EBC in amaute tungtawn a TUSAWN mel I muh uh ka lamen tinten hi. Tuabang hong hih na’ng un nang leh kei in taguan I nei; THUMPIHNA AHI. THUM IN!
DOTNA 5. EBC Saptuam in thupiak gol (Matt 28:18-20) sepkhiakna a pan samna a neih tawh kisai na muhdan tangpi - Hoihsak & kipahpih, banah hici zaw-lai leh kigahsuah seem thei di hivaw na cih. Omleh.
DAWNNA: EBC Saptuam in Thupiak Gol sepkhiakna a pan hon na lakpih a hiai tan hontun Pathian leh heutu masapen apan tutan a dinmun lente, zahna leh pahtawina ka pia hi. Thilpiak, thumna leh thapiakna lam tuamtuam a pangte leng phathuai sa in Jesu Khrist min in amaute kiang ah kipahthu ka gen hi. I nasep dan uh hoih in manpha lua hi!
Ahi a, tuhun tawh kituak nasepna, a message hilou; sep dan leh geel dan tuh et touh ding khovel khantouhna leh masawnna tawh kituak in om ngei ding hi. Toupa’n a hunhun in heutu muanhuai leh hithei dingte hon pezel a, kipah huai I sa mahmah hi. Hoihtak a suichet/etchet masak, I lut ma a gelkholh theih liai teng; sep dingdan, om ding tan, chihte tanpha geel masa detdet a lut a sep poimawh kasa. Salam sepaihte’n mission khat a neih uleh, thil bangkim enchian, suichian a kisakkholhna hoihtak tawh a lut bang un, Khalam gal douna ah leng poimawh lua hi. Melma I maituah ding pa smart mahmah ahihziak in.
DOTNA 6. Isai 60: 12 Thu, tulai ei dinmun tawh bulhtuah a genna om zeuhzeuh hi. Hiai LST Thu, ei context a relevant na sakdan, a.k.l. na saklouh dan saulou in aw...
DAWNNA: Lai Siangthou, adiak in Thukhun Lui, Israel a.k.l Judate tawh kisai biik a gelh ahi. Adiak in Jawlnei Lian leh Neute diakdiak. Huaiziak in a context chiat gen ding chile hang ei a ding tawm mahmah ding hi. Himahleh, hiai a Pathian thutak kigelhte ei mimal, innkuan leh gam adi’a life application i hon bawl theih chiang in kihamphatpih or vualzawlna kidong hilou hiam, kachi hi. Hebru laikhak gelhtu’n “Pathian thu a hing a, thil ahihthei a, namsau hiamtuah bangchi bang sang in leng a hiam a, hinna leh kha, guhlawi leh guhngek tuamkhen hilhel khawp in a sun thei a, lungtang a ngaihtuah leh tupte a thei pah ngal thei ahi.” (Hebrute 4:12) a chih chiamteh thamching kasa hi.
DOTNA 7. Finally. Missionary thumal bangci'n na hilhcian (define) di'a? Gammial mission strategy kinei, local mission strategy (belamte etkolna) lam kinei (gina)lou deuh ahi, aci bang om. Hiai tawh kisai na muhdan...
DAWNNA: Missionary thumal tomchik a hilhchian ding hile’ng… TANGTAWN HINNA LEH VUALZAWLNA THUPAWTU (MESSENGER OF ETERNAL LIFE & BLESSINGS) kachi ding.
Kei mimal muhdan in Pathian Gam Nna sepna, ei Local kikepna leh Gammial nasepna i khensawm in hon buaisak hi’n ka mu. Pathian Saptuamte i kikep kawmkawm a a za nailoute kiang Tanchin Hoih tut ding i mohpuakna uh ahi. Hichi’n hon gen leng; Gammial nasepna gam gua hi ningneng lou in, i louma ahi. I inn Local Saptuam ahi. Inn i khosakna mun ahi a, lou i nekmuhna mun ahi. Huaiziak in khalam louma a i pan leh pan louh in, i khosakna hoih leh hoihlouh ding gen baan ahi. Kuamah mi piching, inn ah a om gige kei a, lou ah leng a om den sam kei. Huainak sang in inn leh lou a nih in a enkol khawm a, sepgim gah lak hun in leng a zahlak kei a, kipaktak leh maitai tak in a om zaw hi. I innkuan, I Local Saptuamte theihtawp suah in kem ni. Huchih kawmkawm in lou kuan ding leng mangngilh sam kei ni. Pawltak chiang a I zahlak louh na ding un.@
#Rev N TUANG LANG in EBCC Delhi ah saptuam kemtu Pastor hihna kum 2016-2019 sung lenkha hi. A tanchin kimzaw link kipia ah theihtheih di: https://ebccdelhi.org/who-are-we/meet-the-pastor.html
