Huchiin, Adam in gan tengteng, tunga leng vasa tengteng gamsa chiteng a min uh a phuahsak chiat hi: ahihhangin Adam adingin panpih a kithuahpih di’a kilawm a om kei hi. Huchi’n, Toupa Pathianin nuamtakin Adam a ihmu saka, huchiin a ihmuta-a; huan, a nakguh khat a laa, ataang dingin sa a pang dimsak hi. Toupa Pathianin, Adam akipana a lak nakguh numei dingin a bawla, Adam kiangah a honpita hi. Adamin, hiai hial zaw ka guh bang guh neia, ka sa bang sa nei ngei ahi; pasal akipana laakkhiak ahih ziakin, Numei, chih ding ahi ding, a chi hi.(Genesis 2:20-23)
Amasain, NUTE’ NI Chibai! Pathian in hun hoih hon musak nawn in, tukum a ding a nipoimoh mahmah NUTE’ NI hon muhsak man in Pathian kiang ah kipahthu I gen uhi. Tuni in I Lai Siangthou tangtel pansan in Nute bang ding a siam a om I hiam chih saulou in I ensuk ding uhi.
Hiai a Lai Siangthou apan in Pathian in numei a siamna ziak chiangtak in kimu thei hi. Pathian in leitung A siam tuung in hoih asa mahmah hi. Himahleh, Pasal amah kia a om amuh in hoih asakei a, Pasal kithuahpih ding in Pasal apan in Numei a bawl hi. Numeite I hih uhleh, hiai mun a I muh mah bang in, Pasal panpihtu ding, kithuahpih ding a bawl I hihlam uh I theihsa uh himahleh tuni in athak in phawkthak le hang deihhuai mahmah hi.
Tulai in numei tamtakte, hiai bang siam a I omna san uh manggilh kha hile’ng kilawm tampi muhtheih ding I om uhi. Pasal panpihtu ding hih nak sang a Pasal tung a thuneih ut a kipei a, innkuan ei ut dandan a pei tampi omta a poi mahmah hi. Hiai bang ei Khristian, Lai Siangthou sinsakna zuite, a ding in thil hih ding a hoihlou kia hilou in I hih hetlouh ding uhi ahi. Pasalte ngaihsaklou a, panpih naksanga pasal aa ding a puakgik kia leng hilou in, (nang)ji a ahon neih khak kisiik tuntun a aomkhak ding uh lauhuai mahmah hi.
Pasalte panpih ngai uh ahihdan I theih ding uh ahi. Ei Numeite I hihleh pasal tellou in leng I khosa thei ua, himahleh pasalte bel numei/ ji tellou in bangmah hilou uhi. Hiai in panpih angaihdan uh ahon theisak mahmah hi. Khatvei vei chiang in pasalte’n hon duat le uh chih bang I lunggulh mahmah uhi. Huai bang a I ngaihtuahlai in I theih ding uh ahihleh Pasal a duat zouzou minu (ji) mi hampha hizaw hi. Na pasal na duat leh ama’n leng hong duat ding ahi. Huchiloupi a nang duat lou tak a na kep leh na tate’n leng na pasal (apa uh) simmawh ding uhi. Tuni in, nang na pasal na tawisang leh mite’n leng hon tawisang pih ding uhi. Huai hilou a mi pasalte phat a nang pasal gensia na hihleh mihehpihhuaipen nahiding hi. Aziak ahihleh na muhsit mahmah tawh damsung khawsa khawm ding na hih ziak in. Huaiziakin na pasal tawisang in limsak in lechin na pasal bangmah hikei leh leng khawvel a mi enhuaipen innkuan na hi ding uhi.
Lai Siangthou in pasalte mai a jite kiniamkhiak ding in hon gen hi (Eph. 5:22-33). Numeite bangtan Pasalte nuai a kiniamkhiak ding? Numei tamtakte’n Pa pen innkuan a thunei pen chi a khalam vai a innkuan hoih nang thei napi Pa kisakkhiak ding ngaakngaak pawl ki-om hi. Pasalte nuai a kiniamkhiak a thunuailut a a’ thu uh ngaihkhiak ding ahihlai in innkuan kikepna ah eite’n leng pan I lakpih poimoh mahmah hi. Hiai ahi Lai Siangtou in Pasal panpihtu ding a ahong bawlna. Innkuan kikepna ah kipanpiha I om uh poimoh petmah hi. Pa pen mohsa den a omlou in a hatlouhna ah I panpih ding uh ahi. Gentehna ding in, innkuan kikhopna pasal pat ding i ngaak leh kipankhe zou khollou ding hi. Huai hilou in ei mahmah in leng I patpih uh poimoh mahmah hi.
Tuni in, NUTE’ NI I zat na hun ah athak in nute’n innsung ah I mohpuakna phawkthak ni. Pasal te ahoihlouhna/afellouhna te uh liahkhuhtu, panpihtu, leh tawisangtu hi ding in pan lathak ding in I kingen uhi. Sum-le-pai kia buaipih a innsung enkol manlou a khawsa I hihleh, Pathian in hon siam nasan seem khalou a hinkhua zangkha ding I hi. Khosakna ding in sum-le-pai poimoh mahmah ahih lai in innsung ah lohsam leng leitung ah nopna ding omlou ding hi. Innsung a poimoh masa I hihdan phawkthak a, Jesu Khrist thilhihtheihna tawh panthak la chiat di’n, Nute I kichial uhi. Simtute, TOUPA thupha!
