Thumapi:
Khovel omdan, huihkhua bouruak hong kikheng zel a, bang chichi hiam in i na kibawl remtou zel hi. I huchihtheihna teng leng tel in Pathian in i Nu sung ah hon na phankhawm hi.
Tulel a khawvel teng dengsuak Covid 19 in khovel pumpi hon vaulauh leh lungziinsak tuk in, tu khang a omlelte hon huchisak diing, thil mulkimhuai toh i na kimaituah kha ngeikei uhi. A taktak diing leng bang lou hial in khovel hong khawlguih in, khovel i na theihdan pen hong kikhek danglam vek a, huai dungzui in i ngaihtuahnate uh leng hong kikhek danglam hi. Mihingte'n i maituah ngeilouh hiileng lauhhuai, a damdoi(vaccine) diing muhkhiak nailouh ahihzawkmah ziakin, bangtan daih diing ahia chih leng gen theih hilou hi. Theihsiamhuai tak in mi tampite patauhna, thawmhauna leh lauhna nei in om khiukheu uhi.
Mihingte'n Lauhna i maituahdan:
Mihingte lungsim paidan toh kisai a lungsimlam paidan suutsiamte'n a suutdan uh leh mimal a khawngeingai deuhte chetsa khat ahihleh, mabaan diing gentheihlouh, huaile thil hon vaulau a omziak ahih zawkmah chiangin, lauhna nasatak piangsak hi.
Lauhna I chih chiang in i dinmun hoihlou leh thil sia i tuahte dungzui in hong piangkhe sek chih i thei chiat hi. Mihingte lungput (emotion) khat ahihziakin, lauthei a i omleh, mihing ngeina bang a pai I hi chih chetna khat leng ahipah hi. Himahleh, niteng hinkhua ngeina bang a i zat diing hon daal zen a kidek theihlouh lauhna i neih chiang in, mimal buaina hon tun a, mualsuah diingdan ngaihtuah pah poimoh hi.
Psychologist (lungsimlam suutte) te'n agen dan un, lauhna i tuah chiang in, i maituah dan tangpi chithum om hi chi uhi:
1) Dou/Sual (Fight): Lauhna toh iki maituah chiang in, mi khenkhatte'n ana pang ua, dou/sual zel uhi.
2) Taimang (Flight): Mi khenkhat in lauhna atuah chiang un a tai in taimang san uhi.
3) Kongkaw (Freeze): Mi khenkhatte ahihleh, a lauh chiang un kongkaw ua, taang theilou uhi.
Hiaiteng thum daan chauh in lauhna i maituah chiang in omdaan (response) suakkhe chet gige diing chihna omtuan kei mahleh, lauhna in zaw, i gamtat buaisak/chituamsak teitei hi chih i theichian hi.
Lauhna in gitlouh leh huatna pawkhe sek hi:
Lauhna in mihingte hoihlouhna pholhkhe naak sek hi.Khovel pumpi a gam tuamtuam a solkarte'n amau gammite bitna diing in Lockdown ana puangkhia uhi.Huai toh kiton in, khovel pumpi ah domestic violence (innsung a thagumsuahna) hong uang mahmah hi. UN leh WHO te'n numei tung a tahgum suahna chizauhuai zen in pung hulhul chih chiamteh ua, solkarte kiang ah le'ng hiai doudaalna leh a thuakkhate huh leh humna di’a panlaak diing apoimoh dan taaklang uhi.
Ni bangzahhiam paisa a News khawnga I na zaak zel mahbang in, huatna bang leng hong kilaamkhe tam mahmah hi. Racism, chi-le-kuang ziak a kikhentuamna leh muhdahna, hong uang mahmah hi. China gam, Wuhan a natna hiileng hong kipan ahihziakin, China mite melput toh kibangte gimneihna, huatna leh bawlsiatna khovel mun tuamtuam a kipat thu kiza za hi. India gamsung ngei ah leng, suahlammite melpu I hih ziakun, ei singtangmite'n leng, hiai toh kisai in bawlsiatna bangzahhiamte'n i na tuakkha uhi.
Huai banah, doctor-te leh nurse-te natawm gimneihbawl in bawlsiatna chituamtuam leh thagum suahkhumna tampi ana tuak uhi. India gam mun tuamtuam ah leng Lockdown hoihtak a akizatna di’a pan a laakna lam un, Police-te bang leng aliam leh thuakkha tampi om ua, mipi sousang in constable khat a vuaklup thu bang uh ana kiza hi.
Lauhna in lungsim dengdelsak hi:
Lauhna leh lungbuaina i neih chiangin, mihingte zoh kibaihsam mahmah ahihziak in, I melmapa Setan ngei inleng hichibang hun remchang la in, lungsim peibuai a, puukna diing sai in hong kisaan sek hi.
Tu malam deuh in thuthang khat hong om hi. Bible phen le’ng a kikal a samzang om di in, huaite kaikhawm a tuikhup a, atui pen thuumkawm a dawn diing; huchi leh Coronavirus kiveilou di chih ahihziakin, lauhna ziak a lungsim dengdel tampite'n gingta in thumangtak in ana zui pah uhi. Poi kasa khopmai. Bible sung a Pathian Thuhing kigelhte sang a Bible kikal a samzang om thil hihthei di’a gingta zaw chih mawk!
Khristian kichi a, hichibang thute khawng gingta pah a zui pah a i om zel mawk pen uh lamdang mahmah hi. Lauhna, lauhthawnna leh vaulauhnate tungtawn a Setan inle nasatak a nna ana semsem ahihziakin Bible kal a samzang tuikhup dawn, maibi/maiba, suangkaw paak, sasan kii, khausan/khauvom gak chihte khawng sunglai kitangsak lai mahmah hi. Puaknathuai kasa mahmah hi. Bangziak a hichitel a lungsim leh Kha a dengdel tel I hi di uh I chih leh, Pathian thu Kha Siangthou piina toh thei lou a khovel pilna a, a pawlawng kia i theih ziak uh hidi'n ka ngaihtuah hi.
‘Pathian hing bia’ kichi hang a, lah hun haksa leh nuamlou a hong tun chiang a, Pathian leh A’ Thu mitsuan masa lou a, khovel thugousiah leh khovel pilna' thuzuihte a i kikhamuan pahpah zel ua leh, khalam a i kibulphuhna uh i kivelchet uh kuul petmah chihna ahi. Hun nuamlou i tuah chiangin pilvan diak poimoh hi (1 Korinte 3:19; 1 Timothi 4:7).
Setan in le Pathianthu mah zang in I Hondampa ngei leng khem a, ei leng huaidan in hon khem zel hi. Pathian thu hi-awmtak, lah himahmah lou, Khalam khanna diing hilou, Pathian thupina diing leng hilou, nungzui hinkhua adi’a tha hon guan diing hi hetlou thuthang, thugelh WhatsApp khong a kihai thehdalhte lak ah leng pilvan poimoh mahmah hi.
Lauhna i maituahdan apat in, Pathianthu ah i kinga hiam chih hon kitheitel sak hi:
Mihing' sa pu a, mihing' lungsim pu a, hilehleng hiai khang gilou leh khialte lak a vaak khe diing a sapte I hi uhi (Philippite 2:15). Huaiziakin, khovel mite'n lauhna a maituah dan uh leh ei Pathian hing bete'n lauhna i maituahdan uh akibatlouh ngai hi. I Hondampa'n gim-gentheihna chiteng thuak a, huaisetak a sihna gu natawm chiamkha zen a hon tatkhiakte I hihziak un, thil tampi (lauhna leng gentel in) mualsuah thei diing a, Amah tungtawnna a hihtheihna piak a omte I hi uhi (Ephesate 1:3). I muhtheih leh phawk theih lauhnate kizousak lou a, i muhtheih louh ginna kalsuanpih a, Pathian in hon ompih diing a hon thuchiamte gingta a hing diingte i hizaw uhi (2 Korinthte 5:7; Isai 41:10; Matthai 20:28).
Sam 37:5 in, 'Na omdan ding Toupa tung ah nga inla; Amah muang in, Ama'n ahih vek diing' chih pen atheih-a-theihthoh lou in, i hinkhua a zatkhiak diing chihna ahi. Huaiziakin, Lai Siangthou pansan/Lai Siangthou a kibulphuh a lauhna maituah I hihkei leh zaw, I kivelphat poimoh diing hi.
Thil Lauhhuai lak ah Pathian itna mite tungtawn in nasatak in kilangkhe tou zel hi:
Itna Pathian (1 John 4:8) ahihziakin, A’ itna mite tungtawn in hiai hun haksa ah thupitak in hon kilang khe zel hi. Damtheihna lam kepna toh kisai (Healthcare) a sepna neite tungtawn mahmah in leng Pathian itna thupitak in muhtheih in om hi. Amau leng ei dan in mihing hithou mahle uh, hiileng veite kepna leh hiileng doudalna ah, a damna uh leh hinna uh natawm midangte adi'n niteng in lankhia uhi.Innkuanpihte toh leng omkhawm theilou hial in a mihinpihte uh adi'n kipekhia uh hi. A huchihnalam un, tampite'n damlouhpih ua, tampi te'n leng sihpih uhi. I innvengte ei I ki-ittuk a itding chih thupiak (Mark 12:31) Pathian in amaute tungtawn in kilawmtak in semkhia hi. Pathian bangkim tung a vaihawmpa' khut nung hichi khawng a leng mu i hihziak un vualzawl a om I hi chih i phawk thakthak hi. Kipumpiak itna, i Hondampa'n eite tung a Asuah, Asuulnung zui diing apoimoh dan hiaihun haksa ah muhtheih in amaute tungtawn in hong kilangkhia hi. Hichibang a Pathian itna kilatkhiakna gingtute hivek kei mah le uh, Pathian thupiak mihingte'n i theihlouhkal un le'ng Pathian in hon na zuisak tham ahi chih chiantak a muhtheih diing in hong om hi. Toupa Pathian,thupi in lamdang hina tel e!
Police, doctor leh nursete, banker te, nek-le-tak zuakte, damdawi zuakte, niin hon kaihkhawmsak a hon buaksakte leh adangdangte'n agau athuak diing uh lau in, asep diing uh sem lou himai zen le uh khovel buaise gawp diing hi. A kipiakzohnate uh thupi i sa a, amaute tungtawn in Pathian' awlmohna leh hehpihna mu i hihziak in Pathian i phat ahi.
Lauhna hon tuntu haksatna ziakin kipahthu genni:
Hon vaulauthei thil himhim in hon bawm chiangin, mihingte i hoihlouhna uh naaktak in hong kilangkhe sek mahleh, i hoihtheihna uh leng naaktak in ki pholhkhe zel hi. A sete kia en lou in, ase lak a ahoih omte et kisin leng, hampha kihi diing hi.
Bangkim a kipahthu gen di’a phuut a omte I hih ziak un lauhna i tuah chiang un leng kipahthu i gen diing uh ahi (1 Thessalonikate 5:18). "Toupa lauhna nasatak in ka tuak a ka kipaak" chih haksa i sak leh, "Toupa hiai lauhna tungtawn in sinlai thak tampi n’on pia a ka kipaak" i chi thei hi. Thil hoihlou toh kimaituah himahle'ng, huai tungtawn a thil hoih leh mite hoihna tampi muhtheih a hong kilangkhete ziak in Pathian kiang ah kipahthu i gen diing ahi.
Lauhna I chih asia hiveklou hi:
Lauhna tengteng asia vek hilou hi. Thil hoih hih diing a hon tawsawn lauhna pen lauhna hoih ahi.Lauhna i tuah chiangin, 'lau kahi' chih ngam poimoh hi.A huchih leh, lauhna bangziak a hong kipan a, a beina di’a bangchi panlak diing chih gel theih pan hi.Lauhna nei I hihlam i pom theih chiang in Pathian a kingakdan leng kisin thei pan hi.
I Laisiangthou in khovel a suak thilte lauh diing chih gen lou a, Pathian lauhdan sin ding in hon chiil zaw hi. Amah i lauh ziak a Athu i man leh lauhna diktat i chi thei diing hi. Pathian ahihziak a i lauh diing himah leh, ei mihingte'n Amah apat lamet i neih ziak un kilau zaw sek hi. Pathian ahihziak kia in lau hile'ng le, ei hoihna leh punna di ngen hizaw hi.
Pathian i lauh ziak a i tan diing tampi omte lak ah 10 k'on taklang ut hi:
1) Pilna (Paunaakte 1:7)
2) Hinna (Paunaakte 14:27)
3) Pathian zahngaihna (Luke 1:50)
4) Pathian toh kilawmtatna (Sam 25:14)
5) Pathian' hoihna (Sam 31:19)
6) Pathian' vualzawlna (Sam 112:1)
7) Pai diingdan theihna (Sam 25:12)
8) Pathian' Deihsakna (Sam147:11)
9)Taksap neilouhna (34:9)
10) Angelte venna (Sam 34:7)
Thukhitna: Sam gelhtu in 56:3 na ah, Ka lau chiang in, Nangmah k'on muang hi.' chi'n ana gelh hi. Lai Siangthou pen Pathian Thu hing ahihziakin, eite adiing in leng hiai i kalsuanpih poimoh a, I lauh chiang in khovel thil leh mite ah bitna zong zawlou in, i taina diing mah Toupa kiang zuan in Amah muang le'ng, Ama'n ei hi'n ikiim-ikiang hi'n, khovel a hiileng hitaleh, A hih diingdan thei lua hi. Mangbang tongkhong a Amah muang kisin sang in, hun nuam a, ei sia-le-pha theihna leh deihteelna zang in, Toupa muan kisin le'ng, kizaangkhai diing a, vualzawlna tampi kidawng diing hi. I huchihtheihna leng ei panlakna hihetlou a, A’ Kha hon piina mah ana hizomah lai hi. Eilam a suan diing neilou hial I hive!
Meidil i lauhna ziak hiam, natna hiileng leh natna chituamtuam i lauhna ziak hiam, vualzawlna i don louh diing i lauh ziak hiam hizawlou in, Amah Pathian ahihziak a i lauh diing uh ahi. A huchih chiang in khovel in lauhna a hon piakte sangin Amah i lauhna lianzaw di’a, Amah toh mimal in kizopna hoihtak i neita dia, lauhhuai chiteng hong tung mahleh, Amah ah kingak i siamta diing hi. Huchibang a mimal a Pathian toh kizopna hoihtak i neih chiang in, Pathian itna i phawk semsem di ua, huai itna in khovel akipat suakkhia lauhnate a delhkhe vek zel diing hi (1 Johan 4:18).
Toupa Pathian in, i lauh chiang un Amah ah muanna nga thei chiat diing in, I Hondampa Jesu Khrist min in, kiniamkhiak theihna hon pe chiat hen aw, Amen.
[May 4, 2020]
