SIMLEI NUNNA
Phuaktu: Theihlouh
Key C
Simlei nunna, nopni omlou
Mualkuam luitui khang lel bang hi
Nopni om zong mual ah liam zel
Deih zatam tawh len kum veita
Sakkik:
Aw lei genthei gam
Chik chiang ka nusia dia’m
Salem vangkhua tuang ka tun chiang
Na min phat in naubang nui ning
2. Khapsa gam zuan ka zin lai in
Mosi bang in lung nehnou ing
Kanan gam nuam gal in don ing
Lungtup tun louh za in tam e!
3. Anbang itna Thianmang simthu
Zatam lai ah i leel zong a
Zinmang simthu’n lambang khaak e
Elija bang om chim zel ing.
4. Phelbang na muan Samson bangin
Suah kol taangin ka om zel hi
TungThianmang aw gal hatsak aw
Vualtung vabang hong tuangsak aw!
Laa hong piandan tomkim: Kitheilou
Laa thu genchetna: (T/ Upa T Thangson)
Tang 1na
Vual 1na & 2na: Leitung hinkhua a kipahna a tomdan a gen nopna in, tha-khat a luitui hong khangguih a kang nawn pah tawh tehkhin hi.
(Singtang ah vuah hongzuk chiangin hawktui tha-khat a hongtam, mual kikal a luita guama tui hongtam, vuah hongtheu chianga tui teng luang bei-in kangpah hi).
Vual 3na & 4na: I it leh ngaih, duh leh deihte, i nopsak lai nite aam mah le’ng, sap kiik theihlouh di’a hon nuse mai ahihdan genna di'n ni tum leh kum bei tawh tehkhin hi.
Sakkik:
Vual 1na & 2na: Haksatna a dim leitung nutsiat kal ngaklahhuai sa.
Vual 3na& 4na: Van khopi tunkal ngaklah a hihdan leh huaimun a Pathian phata nuamtaka om ding ahihdan gen.
Tang 2na
Leitung hinkhua pen Van Kanan zuana zinna bang hi a, a haksatdan leh tup-le-ngim hih zohlouh tampi omte poi salua ahihdan genna dingin Gamchiam tunglou-a a gal-a en kha hamham lel Mosi tawh kitehkhin hi.
Tang 3na
Awlmoh taka Pathian itna mite hilh mahleh, setan in mite lungsim ah, Pathian itna sang lou di’a thuzawh teitei a hihmanin, lohsam kisa-a a’ puaknatdan leh a’ thuak dan a genna di'n Elija tawh kitehkhin hi.
Tang 4na
A’ Khalam hinkhua bah zel, puk khazel a hihdan leh vualzou hinkhua lunggulh a hihdan a genna di'n Samson hinkhua tawh hong kitehkhin in vualzou hinkhua ngenin Pathian kiang’h thum hi.
(Hat in muanhuai mahleh Samson in vuallelhna chiamkha a, a hun nanungin, Pathian in a thumna dawngin, vualzohna pia hi)
Thumal Genchetna:
Simlei: Leitung genna ahi
Mualkuam: Mual leh mual kikala kuak/guam genna ahi
Khapsa gam:Gamchiam genna ahi
Zinmang: Mial thuneitu/setan genna ahi
Lambang khak: Nang/dal chihna ahi
Phel: Thangpeu genna ahi. Sakhi thang (trap) a kikam chiangin thang phel/peu i muan mahmah sing kizang zel hi
Gualtung vabang tuang: Vualzou genna ahi
Salem vangkhua: Vangam genna ahi.
