I gam ua Gospel meivak I muh uh kum 100 val bang ahita. Tuipi leh gamtampi kantana Tanchinhoih hong puaktute’ khekhap kilawm hinatel e! Eite’n hiai Meivak I na muhkhak zenzen uh teltuamte I hi uh I chilou theikei. Ek-lei pa’n hong zongkhia a, hon domsang Pathian kia ahi. Min letna tengteng Amah kia I pia.
Pu-Pa’ Thugousiah: I pi-pute uh gammialtaka khosa, dawi-le-kau bia, singbul-suangbul peuh ana bia a, zu-le-sa toh ana kithoihte ahi uh chih kuapeuhin I theihsa uh ahi. Sahkhawlam kialou ah leng tawndan, paidan leh kivaipuakdan ah tuantual mah le’ng, zuihtumta ana nei uhi. Tuni chiangchiang in leng, I pu-pa’ ua kipan tawndan I na kipiaksawnte uh khangsawnsawn ah kepbit tumin, atamzaw zuihtheih dandan in kizuiden lai hi.
Gingtu Masate: Atomlama gen in, I gama Gospel meivak honglut chiangin, gingtu masate’n achiindanluite uh nusia in kipumkhekna toh hinkhawthak ah hong hing uhi. Nidanga sa-aih gal-aih, singbul-suangbul biakna, kithoihna leh dawi-le-kau biaknate tengteng taisan in Pathian Hing biakna hon pan uhi. Khovel et-in siamna-pilna sangtak neikei mah le uh, Pathiana aginna uh akip ziakin khangsawnsawnte’n a zalzou in lamtampi ah agah I lou uhi.
Khangkhelhna Ahi Diam?Laisiangthou ah Thukhunlui hun in Pathianin Israelte akipan ana ngiat kithoihna bangzah hiamte’ lakah Khelh Kithoihna ana ngaipoimoh mahmah hi. Laisiangthou a Levitikas bung 1-7 kikala I muhtheih mah bang in, Pathianin kithoihdan ding Mosi kiangah ana gen hi. Hiai Khelh Kithoihna ah bawng hiam, belam hiam, vakhu/vasa hiam genbaanglou halmang thillata siampu in maitaama alat tuh dan apiak ahi.Hiai in Pathian alungkimsak a, A mite’ khelhna a theigige kei, chih ahi. Khelhnaman tuh gan sisan a dit angai chihna suak hi.
I pi-pu ua kipan I na laksawn uh tawndan tampite’ laka khenkhat genlang nuam I hi. Huaite tuh Hiamkhaam, Kigapna leh Thuphatawinathilpiakte a I zat taangpi uh ganta/ ganhing ahi. Hiamkhaam in khat-le-khat (mimal hi’n pawl hitaleh) kala kimelmakna tawpsak tupna a hiam-hei zangnawnlou di’a kithukimna thukhun bawlna gen hi. Kigap pen ahihleh kuahiamin tupmawng/ tupmawng hilou in midangkhat tungah khutkhialkha taleh, akhutkhelhmana kiliausakna kawk ahi. Thuphatawina/ Ngaihdamngetna pen Kigap toh hong kizawitawna, khutkhialkha khat in a khelhkhaknate’ tunga kiniamkhiaka ngaihdam ngetna toh innluta athilhih ahi. I tawndan toh kituaka et-in, atunga I gente ah apiilpi a I pomtheih leh I zat taangpi uh tuh ganhing (khe-li nei) ahi. Hiai a thilpiaka kipia ganta pen, khelhna zil in azah ding bang kibikhiah khumte I hilaitel uhi. Huai kialou in sum-le-pai leh puanza (nam puan) khawng leng heltelin I zang uh. Tua I genlat utpen uh ahihleh, hihkhelhna/ hihkhelhkhakna leh ganhing kikhektuahsaka mohmaisakna a I pomzel uh tungtang ahi.
Tuni in, Khristiante’ adingin hiai I tawndan uh etkikding omkha ding ahi. Khelhnaman ganta sisan I chihchih utoh Thukhunthak Gospel hong kituakthei nawnlou ding ahi.I pi-pu te’n leng Tanchinhoih Meivak amuh ua kipan Khrist nungzuihna hinkhua toh kituaklou chiindan leh khosakdan tampi ana koihkhia uh hilou hiam. Tuni chiangin Gospel I muh nung kum 100 val hialta, Khrist a I khansem uh kul leh poimoh pen hita ahi. Huai dingin khelhman sisan hilou in “Kingaihdamna”, huaimah I Toupa Jesu’n Krosa hong siha A’ Thumna, I hinpih ding tuh Ama’ lama kalsuanna khat hong hizaw ding ahi.
Thukhunlui hunlai a kithoihnate tuhun adi’a pomtheih ahihnawnlouh mah bang in, I pi-pute’ hunlai apat I na chiindan uleh tawndan uh - Kigap leh Thuphatawi thilpiak, I chihte uh Kingaihdamna a I khekkhiak ding uh ei gingtute’ mohpuak ahita. Gingtu masate’n taisan ding leh paihding ana neih bang un, ei khang inleng Khrist a I khantouh dungzui un, Amah toh kibatna hinkhua taktaka I hintheihna dingun I paihkhiakbeh ding uh omlai ahi.
Pu-pa khanggui I zopna/zunna hi e... I chikha maithei uh.Khrist toh I kizopna di’a hon lamdaltu ahih intuh, I khanggui zopdan leh puahdante uh mihing deihdan tanlel ahikha di’a, I Khristian hinkhua khanna ding hon daaltu liantak hong hihkhak ding thillauhuaitak ahi. Khenkhatin valh haksa leng I sakha ding uh, I na valhzohngeilouh ziak mah ua I Khristianna ua kikhekna omtheilou/omlou ahi diam?
I Gam a Gospel meivak hong lutma in eimah khawbing chiatah I kibinkhawm chit-tet ua, pawlam khovel toh kikawmtuahlou in eimah dan-le-dunte zuiin I om uhi. Hun hong paizelin I gamleng hong khangtou in pawlam khovel toh lamtuamtuam ah kisawkkha in I hong om uhi. Ahuchihchiangin, khovel dan tuamtuamte’n hon uapkhadiak un, huai khovel thukhennate eilak mahmah ah leng zat ahong hita uhi. Khovel mita et-in hiai kivaipuakna dan-le-dunte’n kikhekna ziaka tungthei thil - khelhna ngaihnepna leh huham gamtat poisaklouhna I lak uah uangsem leh maingal zawsem theidinmun tuh anadaal veve ding ahi. Banah, ei kikhekna ah leng lamtampi ah hon panpihkha suak ahimai hi. Tawndan ngaihnepna ziaka gen ahikei a, tawndan khenkhat bang le’ng khovel khantouhdan zila I heklem theih uh omsam ahi. Azangtute Khristian ngen I hihzawkmah chiangun Khristian hindan toh kituaka heklem ding omte heklem luat ding hizawlou ding maw? Hithamtham e, Khrist nungzuihna a masawnna ding ahih ngialleh, chithei chiatle chi a kichial I hi.
Sumtawng biakna leh kithoihnate koihkhia a, bangziaktaka huaitana koihkhiak dingte tawpsakgeih I hi ding ua le? Aziak omsun tuh mihing etna danin I na en ua, mihing buukna danin I na buuk ua, mihing adi’a kilawmtan geih ah I tawpsak khanak ua ahi. Pathian akipan akiningching ngaihdamna I tan bang un, eilak ah leng kingaihdamtuahna I mihinzia ah suahkhete hi in ahinpihte hilaile’ng, A’ ngaihdam nawnsawnna l tangngei ding uh.
Khangkhelhna I chih Pathian in a chiamteh gige a, huaite mangngilh mawklou in khang hong omsawnlai dingte tanpha daih di’a chiamteh ahi (Exodus 20:5 & Nambars 14:18). Pathian kianga thupha I tawi a, hiai Khangkhelhna ziaka A’ ngaihdamna I nget ua, “Kingaidamtuah” hinkhua zangchiat le’ng, Khrist batpihna neite I hi thei ding uh.
Thukhitna: Pu-pa’ tawndan hoih I Khristian hinkhua toh kituak tampi I neih uh a-om, huaite tawisangzaw sem ni. Ahihhangin, Khrist nungzuihna toh kituaklou khekding omte khekngamna I neih ua, I nutsiat ding omte nutsiatngam ngai ahi.Tawndan I zuih uh tampite’ lakah khenkhat bang leng tulai hun toh kituaka I heklem(adjust) tawm uh ommah ahi. Huaite bel eimah kisiamtanin, ‘ I tulai khovel khantouhdan leh ahun toh kituaka thilhih ahi,’ I chithei thepthup uh. Huaibang geihin, I Khalam hinkhua toh kituaklou omte leng Khristianna toh kituak di’a bawllem ahita, I chih ngamding uh ahi.I sahkhua zuih ulah Khristian sahkhua chi ngal, lah I tawndan khenkhatte toh Khrist nungzuihna ‘ki-kelki’ zel chih omtheilou ahi. Khangthakte aw, I paidan uh Khrist nungzuihna toh kituaklou leh a system dikloute choungam dingin Khrist a kibulphuhna kip nei chiat ding in I kichial hi.
Unau, Khrist nung I zuihna uah kalbi haksatak maituah ding tampi aomngeiding. Eimah lemgelna ah kingalou in, I zuih Toupa Jesu Khrist makaihna toh Khalam a hangsanna’ Kha I vek ua tungah hongtu chiatta hen aw!
