Kumteng a I na zat touhtouh, EBC Pawlpi in Ni Poimawh a sehtuam tamloute laka khat, Missionary Day (May 7) ahi. Tutung ‘May 3 a online program’ zang thei di’a I om uh kipahhuai lua. Hiai hun mahni omna ciat a kibukhum (lockdown) kawma zang di’a I kisaklai in ‘Missionary leh Kiguizoppih’ thu saulou kikum in, kha mangthangte veina ziak liauliau a Kha Siangthou tawhthawhna tawh phuah laa 3te leh laate hong piandan veelkhawm le I ci hi.
1na ah, Kamkei Dungsun Thianmang’ Salpha (Rev KT/1983); 2na ah, Aw Nang Karbi-anglong (Rev KKC/1993); leh 3na: Kei Kuankhia Ning (Evan TKS/2007). Laa 3te piaka omna unaute kuadang hilou in imi-isate mahmahhi uh. Thupi; TOUPA ei di’n hoihna e! Hiai laate tawn in TOUPA’N I lak uah, adeuhkhol in pau kitheituah, sisan a A’ leisa, Southern Manipur a kipante lak ah,Thu ana genta-a, ahon genzom zel lai diing cih kinepna lianpi I nei. Ama’n honpi I kipak hi.
Laa 3 leh ahong piandan uh suahkhiak a omte tawn in Kha Siangthou in simtute hong veh/ tokthou in Amah tawh kinaihseem a ton (hinkhua zang), gingtu khat hidi’n hon panpih ciat lai hen!
KAMKEI DUNGSUN THIANMANG' SALPHA
(Phuaktu: Rev. V Khamthawng)
KAMkei dungsun Thianmang' salpha' khakiak simthu lawibang hongthang,
Singgam zanglei vangla pan in guam leh mual thawn e;
Toupa sisan vang a laizomte sinlai hong phawng hi!
Sakkik
Lia leh tangte aw hong thou un simthupha gen ding in,
Toupa' ngalliam mapatna sulnung giabang zun ding in;
Khelhna saltang a mang khate zong ding kuahiam kuan ding?
ZAta'n lel mawng Mang' min a pham lim in dang e lung in geel mawng,
Kulsin sambang na zal kum pal, lai ah na sang e!
Na chin leh tuai ngaihte'n luankhi toh malbang hon kou ung.
THANGvan lam zuan lai na tahkuan khattang zalna laikhun tung ah,
Lung na gel na'm a mang khate leh belamnoute?
Toupa'n hambang huai dia silbang in hong paal ding uhi.
MISSIONARY zatam sawl in Toupa na simthu phuang ding in,
Na von khapham' sakluang tawn in halhna tuangtun in;
Van Laukha Siangthou aw hong leng in lungdeihte' siang ah.
LAA HONG PIANDAN:Hiai laa, Rev. V. Khamthawng in Missionary Kamzathang (March 2, 1952- July 9, 1983), Burma gam a Makuri Nagate' lak a missionary vasem, damlouhna ziak a vasihthu, lungphawnhuai takmai a zak tungtawn a laa hong piangkhia ahi.
Kamzathang' tanchin tomkim (a sanggampa Pumsong Hangshing' gen bang in):
Ka U Thang ahihleh a hong damlouh a ka pa' laphuah khat a a gen, "Thianmang' huai tuam nou aw e" a chih bang in, a neu apan chituamna kong tamtak ah anei a, a lamdanna tamtak gen ding a om. Pianken a mifeltak, polhnuam, midangte awlmohna hau, mi kizentak, taimatak, a sepkhak a sawkphak teng tha-ittak ngen a semzel khat ahi. Inn nna, lou nna, khotang leh biakna thil ah leng hiailam zaw samdeuh, bahdeuh veh aw, chituamna ding omlou ahipen mai. Innsung nna ah leng a pen a suakzel a, amah khom di'n zaw phattak leh phattham hipha peuhmah in ka thei.Kuamah toh ka teh kei a, mi' lak adia sialpha lawdan a ka gen leng ahikei him a, himahleh ama' innsung leh a khosak phakna chiang sapsap di'n, ka chihna ahi.
Niteng in Laisiangthou sim hun pellou in a nei gige a, thumna ngeina tangpi deuhte ban ah fianrial thumna bang a nei zel a, tualsung missions thumkhawmna bang biakinn ah hon patpih a, nipi skul naupangte kaikhawm in nitak annnek khit teng in naupang thumkhwmna khosung inn teng ah hon ban neihpih a, bangzah vei hon neihsuakpih man hiam chih bel ka thei khol kei. Nitak lengla pawtna bang ah la thak deuh bang leh solfate a pawtkhawmpih khak peuh sinpih in a hunte manphatak in a zang zel hi.
Lengla pai chiang in lupna pindang baang a khovel pumpi gamlim (map) a taak enkawm in kipumpiakna hun (meditation) a zang zel a, huai khit chiang in khovel gambung mite adi'n thumna a banban in a neizel hi. Communist gam deuhte bang chiamtehna tuam bawl in thumna hun tuam a bawl zel mihingte' khosakna leh gamsung ki-ukna ah Toupa lunglut ahi chi-in gam kumpi leh vaihawmte adi'n a bawngbawng a khen in thumna a neizel a, saptuam leh nam makaite ading bang, khotang hoih leh chidamna ding bang, sa leh kha a suahtakna kichiantak i neihna ding bang in thumna a neizel.
Naupang lam leh tuilai lamte ahih theih tantan in a makaih a, lapawl heutu bang in a pangzel. Saptuam in ni biik nitan a bawlte ah a hun leh a thu toh kituak hih ding dan lungkhoih theitaktak bang hon pawsuah thei gige mawk hi. Naupangte ni, tuailaite ni, nu-le-pate ni, khrismas leh kumthak hun poimohte ah naupang leh tuailaite toh kituak hih di hon thei pahpah hi.
(Tang bul teng kipatna: *Kam **Za ***Thang ***Missionary)
https://www.youtube.com/results?search_query=KAMKEI+DUNGSUN
========
AW NANG KARBI ANGLONG
(Phuak: Rev. Dr. M Khamkhanchin)
Tung Lunmang aw na Laukha hambang huai louh in,
Nuai zinmang henkol buh bangchi’n ka sut ding ua;
Vualzou a zou zel Pa Na laukha hong sawl aw,
Thumzel pezel semzel din tha hong guan aw.
Sakkik
Aw nang Karbi Anglong na gamlei doh zaanggam,
Sing-le-lou dum diidiai a na zep bang in;
I tung lunmang vanpuan ngou toh hong zem aw.
Aw Khristian tualaite thou in masuan ve ni,
I tung Sianmang simthu taka naubang sang in;
I siikna chiangchiang gam ei ding a piak ahi,
Dialdial leh diamdiam in machiang suan ve ni.
Ngaidih i field gammial in hon sam chiaichiai e,
Na thumlouh ziak in maw itte mangthang zelzel;
Na piak louh ziak in zong a kuan ding zah kuanlou,
Na kuankhiak louh man zong zatam mualliamta.
LAA HONG PIANDAN:'Aw nang Karbi Anglong'hi, 1993 Karbi Anglong Field veina ziaka phuah ahi. Tua hun vel in amau half-naked lai mahmah uhi. A gam pen mi lunglengtheite adi’n lunglenhuai mahmah, sing-le-lou hing dipdip, dum diidiai in, gam selawzen omlou hi. Buh-le-bal, siing (ginger) bang hoih mahmah, gah suang chitchitte’n lungsim honla mahmah hi. Tua ziakin laphuaktu'n ‘Sing-le-lou dum diidiai a na na kizep bang in, i tung Lunmang’n vanpuan ngou toh hong kizem aw..'. ' sing-le-lou dum diidiai gahtam suang bang Thianmang salpha zatam gah honsuang ve maw' chi'n thumna, laa in hon sakhia hi. Amen.
Toupa'n a satu leh ngaikhetute, A mangthang dingte vei thei chiat ding in A’ aw hon zasakta hen aw!~Rev. M.Khamkhanchin
https://www.youtube.com/watch?v=tspHGjFDaQQ
KEI KUANKHIA NING
(Phuak: Evan H. Thangkhansiam)
N’on itna n’on khotuahna lunglai a ka gelgel chiang,
Lamdang lua e tehpih ding muzou keiveng;
Haksa mahleh n’on deihna munpeuh ah kalsuan zel ning,
Ka batphu seemzou ding in hatna hon pia'n.
Sakkik
Tun-le-zua mubang ngai ing kholhpih vual leh laizom teng,
Inn-le-lou tuangnung siah ding zaitha neem e;
Hizong hon Siampa' deihna nial a nung hei vual hilou,
Kap kawm a buhchi pua in kei kuankhia ning.
Khelhna gal ah hongnai in Sihna limguam ah hei zong,
A haksatna munpeuh a honlen gige’n;
Nam lungmawl leh liangvaite di’n silbang hongpal sak aw,
Hongleng in Toupa nang ah muanna k’on nga.
Hongleng in Toupa k’on ngai honlen in Naban hat in,
Ka taksa tawl in ka laukha lungzuang lua;
Lungdon khitui toh k’on ngai, Toupa aw hon ompih in,
Bangchi’n simthu ka lel dia’m Nang tellou in!
Na gam vang ka gentheihna haksa in tawlhuai zong leh,
Malam zuan in pai zel ning Na nungzuiin;
Sihna limguam galkai a Na gamnuam ka hong tun chiang,
Pahna khitui toh Manglukhu khuta ning.
LAA HONG PIANDAN:"Kap kawm a buhchi pua in kei kuankhia ning". Music sinna nei kei mahle’ng Pathian in talent honpiak khat hi a thei in Amah ading a zang ding in kana lan a, tua dungzui in ka omna Dorcas veng Saptuam a lapu a pang kawm in EBC Central Choir ah ka na kihel a, Dove trio min toh heutute nung zui zel in, hihtheih khomkhom leh tha-it tak in Pathian phat in hun kana zang hi.
Tua banga ka tuailaipih lawm-le-vualtetoh Pathian phatna a hun nuamtak a ka zat lai in, a zazaw leh gamlazaw a kizang ding in sapna aw hong ging a, puanlom zial a May 19, 2007 a Arunachal mission field a kuan khe ding in sawl in ka om hi.
May 18, 2007 zan daai leh siptak nuai ah kongzing a ui hamte loungal thawmdang zak ding omlou a, khua-le-tui in honsuun bangmai a thei in, lungleeng leh ngaihtuahna tawl in suangtuahna apaisau mahmah mai hi. Taikhua hongvak leh a haat nawnlou nu-le-pa, ka khankhiakna inn-le-lou, ka ngaih mahmah lawm-le-vual leh laizom teng nusia a theihngeilouh gam zuan a kuankhiak neelneel ding ka ngaihtuah in lungsim ah thawmhauna leh dipkuatna in hontuam a, kap kawmkawm a Pathian buan mai louhngal hih ding dang ka theikei hi.
Missionary ding a laak a ka om tung in hunbit a A’ nna seemthei ding chi in kipak mahle’ng hiai hun in zaw, gam kuan khe sese lou a innmun a sep ding leh hih ding omte hong lang dundun mai hi. Ahihhang in lah hon Siampa'n tua ding a kei hon sawl hilou a gamkuan ding a hondeih a, honsawl ahihman in hon deihna nial a nunghei vual ahihlouh dan hon musak in, Sam 126na tungtawn a hon hihhat in – Kap kawma buhchi kuankhiakpih ding leh kipak a buhphalte pua a hon kiksak ding ahihdan honhuau siausiau a, A’ gam vang a haksatna leh gentheihnate tununga kipahna manglukhu a hon khusak ding ahihdan honhilh hi.
Tua ahihmanin hiai laa pen Missionary a ka kuankhiak ding zan a Pathian kiang a ka thumna laa leh ahon lamlahna ahihman in, thupina tengteng Ama’n tang henla, siamtak ahon saksak leh a zakha, a ngaikha tengteng, A’ gam nasepna a hatsem leh za zawsem a pangthei ding in hon vualzawl hen chih ka thumna ahi.~Evan H. Thangkhansiam
