Ni 40 bang Covid-19 pandemic ziakin mahni inn chiat ah kikulkhum (lockdown) in i omta hi. Sep leh bawl di tampite sem theilou a dinkhawl angai maimah hi. Hitheileh kum 2020 pumpi cancel phot di’a hoih abang hial hi. Ahia, thoveng taka maban sawn hile tup-le-ngimte lohching vek di hiam chih kithei tuanlou hi. Tuni a I gennop tuh bangziaka hinkhua-a tup-le-ngim I neihte lohchinglou khanak I hia chih ahi.
Khatna ah, Genesis 11:3-9 ah mihingte’n tuichim apan kivenbitna dingin Babel innsang lam ana sawm ua, himahleh a lohching kei. Leitung mihingte laka kikhenna tuntu a suakzaw hi. Bangziak hiam chih I et leh mihingte’n amau hihtheihna, vanzat hoih a neihte uleh amau min omdetna ding deih ziakin Babel innsang lam ana sawm uhi. Tuni a tup-le-ngim, pawlpi hi’n mimal hita lehang I neihte enthak ni hang. Mahni min kilat ding, vanzat hoih I neih ziaka tup-le-ngim nei I hihleh Toupa bangkim hihthei in hon lohchingsak lou ding hi.
Nihna ah, kisaktheihna leh ki-otsakna toh tup-le-ngim bawl I hihleh tuate Pathian in dou/ dal ding hi (Sam 101:5). Mihing kisaktheihna hihtangtunna ding a tup-le-ngim kibawlte Pathian in a lohchingsak kei ding hi (Proverb 16:5).
Tup leh ngim I neihte Pathian’ deihdan ahihiam chih Amah (Pathian) kianga latkhiak gige ding ahi (Jakob 4:13-15). Pathian thiltupte bang chibang douna leh daltu om mahleh alohching dinga, himahleh mihing’ thiltup, Pathian deihna bang ahihkeileh lohchinglou ding hi. Huaiziakin, hinkhua a tup-le-ngim I neihte alohchinna dingin, Pathian deihna bang keiah sepsuah hihen I chihtheih chiat uh kiphamoh hi (Luke 1:38). Tua chi thei ding in simtute, TOUPA’N hon vualzawl hen!
