Corona Om Ma Leh Om Nung

BC - Before Corona, Corona hong omma niteng hinkhua ngeina-a i lungkimlouhna hitheite

1. Office kaai
2. Innkuante sik-le-tang a thupetu, tai lehleh
3. Traffic jam, kiphu nuinui
4. Metro rel gari a mi dim nainai
5. Zingkal thoupah a tate/naupang te skul kai di’a kisasak
6. Biakinn kai
7. Inn lam akipan anteh-louhing hilou, Khawpi a muhte neek ngai

• Gim kisa leh lungbuai in kaltawp khawl hun di I ngaklah
• Bangcikciang in Inn apan ka seem thei mah de aw, ci in
• Huchi’n niteng hinkhua ngeinate kipahhuai ahihna I phawk hetkei uhi.

Tu in:

• Kholak pawtkhiak nawn theihna ding ahihpeuh leh akisam bangbang hih I ngap
• Metro (rel) a kiphut nainai leh traffic jam te I ngaikiik vungvung
• Inn a om-om ninhuaisa in, office nuamtak a om I ut nawnta
• Biakinn kai leh kithuahkhawm zaizaite I ngai vungvung
• Dawr kikhak leh sepna kuankhiak louh ziakin khawpi anteh-louhingte tanpha lei di hong haksata

Aw Toupa, hiai akipan Hon awtkhesak in….

Ngeina dan a hinkhua zatnawn ut ka hi.

Israel te bang in, Aigupta’ anlim, theigah lim leh tui lim omna ah ka kiik nawn ut ung

Aigupta a omlai in, “TOUPA aw, khawlna lunggulh ung” ci in na phunciak ung

Huaiziakin Pasian in maban ciangkuang omlouhna, theihsa bangmah omlouhna gam ah, Amah tung kia-a kipumngak diing in hon tonpih hi…

Tua khit in hinkhua ngeina a hin nawn ut in I kapkhia hi..

Hitamahleh, hinkhua bel ngeina bangngei nawnlou ding ahi. Mihingte’n Tanchinhoih poimawh uh hive aw......

‘Jesu Min Hoih Hinatel e (What a beautiful Name)’ cih laa ah, vual khat in hici’n gen hi, "Kou tel lou in Vangam na ut kei a.... Huaiziakin, Jesu aw, Vangam tuh na hon kumsukpih hi"

Jesu’n poimawh masadan a thil I volh theihna di’n biakinnte I innsung ah hon paw-lut a, Amah tawh I kikal bawllem A ut hi. I ginna tungdingthak nawn di’n le Ahon panpih hi.

Pasian in hiai lockdown tungtawn a eite hon houpih ahi, A’ aw (voice) za di’a I bil dawh in, Isai bangin - Hiai ah om ing, Hon sawl in (Is. 6:8) ci ni hang.

Hinkhua ngeina a hin nawn utna tualkheta ni.

Hinkhaw thak a hing di’n mailam nawt in – Na pumpi kithoihna hing di’n lan in.

Hinkhaw thak I gen, Rom 12:1-2 a kigen pen ahi cih thei gige ni.

Hiai mah I piansan leh damsan ahingal a.

© Ruati Samuel