- I Khristianna
- Tulai in Form tuamtuam fill-up na ding teng a, Religion__ ? om khakna teng a kisaktheihpih zen a i na gelhsek uh Christianity i chih uh leng mihing pilna a deih kaihdan maimai leh sahkhua khat maimai bang a ngaihna tamta hi. Christianity i chih leh Sahkhua i chih pen i hinkhua a kibatlouhna neisak nawn manglou i batna uh leng om hi.
- Pathian leh mihingte kal a kizopna, huai tuh Pathian leh mihing kal a Fellowship, a tansa zom kik a, lemsak ding a leitung a Jesu hongpai ahi hi. Tua Pathian leh mihing kal a lungtang leh kha a kizopna neihna tak pe'n Gingtu Khristian I hih theihna tak ahi chih theihsiam poimoh mahmah hi.
- Huaiziak in, Khristianna i chih lungtang tawng a Pathian toh kizopna nei a, hinpih a a deihbang a nuntakna ahi a, sahkhua khat maimai dan hilou ahi.
- Huchi ahihlai in, i Khristianna pen khat veivei i kam tan leh i gawl tan a khawl a batna om sek hi. Khristian ka hichi a kipuankhiak a, mite'n Khristian i hihdan hon theih tei na maimai pen uh hunsa tamtak ki-omta hi.
- Biakinn kai I hi chih i inveng-inpam leh lawm leh vualte'n hon thei mai ding uh ahihman in, a honmuh nadan uah, khami e, Pathian phawk e,, chih hong hipah ding a, Khristian (gingtu) ka hi chi a i kipuankhiak theihna khat leng hong suak a, huai tuh hon muhdan uh leng ahi pah ding hi.
- Tuabang ahihlai in, inveng-inpam leh lawm-le-vualte' honna updan a Khami taktak a, Pathian nei taktak mah a hon theihlai un tua (hon muhna)te i lungtang apan mah ahi diam? A takmah I hina uhiam chih kiveelthak poimoh i sa ahi.
- Minhoih deihna maimai, mel hoih sakna leh zi leh pasal zon baihna maimai a, mite muhdan mai etna maimai a kalsuan i hihkhak ding uh lauhuai hi.
- Bible tawi a kikhawm a, a phatna laa sa a, thum a, Kros a hong tatna sang a, gingta a thei mah I hi hia? Jesu ka gingta a ka thei chih tan a hunsa I hi uhia? Huai tan ah dik lua hi.
- Himahleh pilvang a kiveelthak ding a i deihna san pen ahihleh tua mi hon theihna dante leh, i na kalsuannate leh i kam a i na gengente pen i lungtang tawng a hinpih taktak a, Pathian toh kizopna kichiantak nei mah I hi uhiam chih ahi.
- Ahihleh bangziak a kikhawm i hia? I lungtang teng toh tupguhna tel mah hia? Nang na dik, nang na dikkei i kichi thei kei mah…
- Kolosate 3:1-2, 23-24 i sim leh Khrist omna a thil omte zon ding ahihdan, i lungtang' ngatna ding tunglam ahih dingdan leh i hih peuhmah lungtang teng toh Toupa a ding a kilawptak a hih ding ahihdan i mu uhi.
- I kalsuanna sate enkik ni, bawlthak tuak ding om khathei ahi. Khristian i kichih kawmkawm a i zonte a diklouh a, i tup leh i ngimte a dik keileh Pathian kiang ah bangmah tung tuanlou ding ahi.
- 1 Kronikul 28:9 ah Toupa'n i lungtang' ngaihtuah teng a theisuak vek a chi hi.
- Khristian ka hi i kichi a, Biakinn i kai a, i thum ua, laa i sa uh. Bangziak a kikhawm, bangziak a thum a bangziak a laa sa i hia? Pathian in a ziak theivek ding hi. Mihing zaw zekhem zou kha mah ni, himahleh i lungtang ngaihtuahna theisuak Toupa ahihman in kizuausan thei mawng mawnglou ding ahi.
- Lungtang tawng a Pathian neilou i hihleh a thu i sim in gen neilou kha ding hi.
- Lungtang a Pathian i neih keileh bangchi'n Pathian i houpih thei di’a? Bangchi'n Pathian in a hon houpih thei di’a?
- A ziak i thei hia, Pathian thu i lungtang a i neihna tak pen Pathian toh i kizopna tak ahi a, huai mah tuh i kihou theihna tak ahi.
- Mihing in zaw thilhih a mu a, a muhbang a gingta maithei. Himahleh Pathian in zaw i thilhih kia hilou in, i hihna san, i hihna ziak (motive) ngai poimoh mahmah ahi chih thei in.
- Huaiziak in Gingtu Khristian ka hi na kichih lai in, na kalsuanna, Saptuam a na kizatna, nasepna leh na siamsinna a na nuntakdan enpha thak inla, na lungtang tawng apan Pathian mai zong taktak mah na hi hia, ahihkeileh a paw-tham maimai a mihing mai a kilawmna zong na hihiam chih kiveelthak in, Pathian i lungtang ah lungluut ahi.
- Loubawl mi in ginna toh haichi a tuh a, a ginna leh lam et bang in vuahtui hong kia a, gah hoihtak a-at hi. Ginna nasep ahi hi. Gingta napi in vuah zukei khaleh chi in haichi tang tuh kei leh gah piang lou ding mah ahi.
- Huaimah bang in, Khristian i hihna ah ginna tungtawn a i san pen lungtang tawng a hinpih a, gamchiam lam-etna i neih mitsuan a lungtang teng toh Pathian zong a, Amah toh kithuah a i hinkhua a a tawptan dong a Kros puakpih kisam hi.
- Huaiziak in unaute, gingtu i hihna uah, thuk zawsem in kingaihtuah thak ni, hichia ahi di mawng sa a hinkhua mualliam khak sak theih ahi chih theikawm in i khalam enchian in, Laisiangthou sim in, kitehna di’n huaimah zang lehang chih i kideihsak ahi.
- I Hihtheihnate (2 Kumpipate 6:1-7)
- Hiai Laisiangthou sung ah singsatpa in sing a sat a, tuilak a a heitang zatlai a kiatsak thu leh Kamsang Elisha in a topsak thu i mu hi. Hiai apan in i Khristian hinkhua a i hihtheihnate toh kisai sin ding tamlou enle i chi ahi.
Heitang ka khelh ahi:
- Singsatpa'n heitang a khelh ahi. A omzia bel amah aa ahikei chihna ahi a, a neitu a om ahihdan leh a neitu in muang mahmah a a khelhsak chihna ahi.
- Pathian in hihtheihna lam tuamtuam ah honpia a, pilna leh siamna i neihte ei a hilou ahihdan leh, a neitu om ahihdan kiphawk ding ahi.
- A koltu leh a zangtu lel i hi ua, hon khelsakpa' deihdan leh tupdan in i zang khana uhiam chih kiveelthak poimoh hi.
- Laa, lai, thugen, laigelh hi in hihtheihna tuamtuam i neihte hon pepa'n zat ding a A deih bang in i zangna uhiam?
- Ni khat tei, hon pepa kiang a piakkik ngai ding ahihna ah, huai hun chiang in i zatdan bangchi'n i pulaak dia?
- Hon pepa' lung a kimna diam? Toupa'n i hihtheihnate, Ama’ min thupina ding leh deihbang a zang ding a hondeih ahi, Sanggam.
Heitang ka mangsak:
- Mi' heitang khel a mangsak i chih lungsim nuam hetlou ding ahi chih theihsa ahi.
- Heitang mangsak i chih pilvanlouh ziak hipah a, mi pilvang ahihlouh dan muhtheih hi.
- Heitang hiam a, a satna ding tak satkha hileh tuabang in a heitang lengkhe lou ding a, tuitaw ah tummang lou ding hi.
- Tuamah bang in, i gingtu hinkhua ah leng Pathian in hihtheihna tuamtuam honpiakte tathiamlou a, a zatna ding bang tak a i zat louh chiang in heitang bang in kitumpih thei hi.
- Heitang i chih tha khat a mol ahipah kei a, taatlouh a a-om chiang in mol hi. Niteng a taat hiam ngai leng ahi hi.
- I khalam hinkhua mahmah ah leng, a thutak Laisiangthou a kitaat hiamlou a, thumna toh pang a hiamtak a omlou i hihleh maban zaw nungtolhna leh heitang bang a thuukpi a tummangna in hon ngaak ding hilel hi.
Heitang mu nawn:
- Singsatpa'n a heitang' kiakna mun a thei a, Elisha a hilh a, tuitaw apan topsak in om hi.
- I Khristian hinkhua ah khat veivei khial kisalua, hihtheihna i neihte zangkhial kisa a, Pathian mai a chingzou di’a leng kigingta nawnlou a, hotdamna na-ngawn a kimuanlahna toh dim a om khak theih ahi.
- Tuabang hun ah, i puukna bang ahia, koilai ahia, chih thei a, i puukna apan a thoukhia a, Pathian naih a thathak laak kisam hi.
- Mohna toh heitang bang a tuitaw thukpi a tumkha i hita zong in, Pathian naih in Amah kiang tun peuh leng, Ama’n hon zohpihlouh omlou a, heitang bang in hong laamtou ding hi.
- Pathian in topkik utlouh a neikei a, i kiman a i kihon peuhleh Amah amansa ahi hi.
- Leitung in hong hipna sang in Pathian itna in hong hipna sang zaw ahihman in, tuitaw thukpi apan tawp i ut naak leh chimtaak ngeilou in hon ngaak ngitnget ahi.
Toupa vaihawmna mai ah khatvei tei dinsak in i om ngei ding uhi. Tua hunchiang in bang gen ding i nei de aw chih ngaihtuah kawm in mimal chih kiveelthak in, i gingtu hihna, hihtheihna i neihte leh i gammangnate ngaihtuah kawm in kiveelthak leng chih i kideihsak ahi. Huai ding in A’ Khasiangthou theihsiam sakna Toupa'n honpe chiatta hen aw!
….
*Thugelhtu, GAMCHIAM simtu tamzawte theihsiam di’n, Dorcas Hall Mini-Auditorium, Lamka apan online sermon hong kikhahkhe sekte, sim theih di’a na gelhkhe fitfit a, a nung sawtlou a social media tuamtuam a hon koihkhe zel, valnou suanhuai khat ahi. A tung ah lungdam lua hang.
