Khenkhatin a hun inle pawkhe kei na e tulai lai in Khristmas messsage khawng a gen deka, hun-bii thei a gamtat kilawm om ahi, I chikha maithei uh. Adik, hun-bii theihchiangluat ziaka Khristmas message hon gen ut ka hi.
Tulai thugelh hi in laagelh hitaleh, Novel Coronavirus a.k.a COVID-19 thumal tellou in thugelh bukimlou abang hial zezenta hi. Aning kha vanglakte’ adi’n zaw zak ninghuai khop hial leng hita inteh. Awle, a tung ah hiai natna min I gen khata ua huailam thu huai tanah hiphot henla. I gen-utpen thulu ah I lutta uh aw le....
A kumbang hong beidek phot henla, phalbi khovot-huih bang hong nung hiauhiau phot henla, nisa lum bang ki-awi henla, ahihkeileh, meiphu khawng awi kawm in lenkhawm laa bang kingaikhe leh Khristmas muut (mood) omdeuh ding hi a, I chimaithei. Ahihhangin, huaite zaw I neu ua pat I na paidan uh ahi a, huaite tung seselou a Khristmas tungsak I hihna ah, khovel kidang gawpta ahihdan hon muhsakna leng hipahmai ahi. Tuhun mahmah in Khristmas hu-zaap in hon zaap khak bang in I lungsim kongkhakte uh Bethlehem lam ah ana hong chiat le chi in I kingen ahi.
Khovel pumlum in a buaipih – Hiipi ziakin, mihingte’n I hinkhua a I poimohngaih diakte leh I buaipih chiatte uh chiangtak in hong langkhia hi. I buainate uh akibangkim vek kei, akhente natna hii kaai khak ziaka buai, akhente nek-le-tak a buai, akhente sum-le-pai a buai, akhen dangte lah innlum-loulum zuan theiloua sepna muna khumbichilh a omkhak ziaka buai leh adg dg thil tampi in I buai vengvung uhi. Khalam a dangtaak tak a om I hihdan kimusuah a, kisiik a Pathian sapna leh Pathian muhthakna a ana zanghampha leng tampi I om uh. Huchihlai in, khenkhatte lah angei-a-ngei leh khovel patauhhuai thu leng vengvungte’n leng lawngkha mahmah lou a mahni buut-buut-a-bu pawl leng I om uh.
Lungsima hong kilang mahmah tuh, Jesu Khrist mihing a Bethlehem a ahong pian hunlai inleng, kumdang banglou in kisimpi neihlai ahi. Hiai min khumna tuh Kaisar Augusta hunlai adi’a min khumna masapen ahi [Luka 2:1-3]. Buai chihtakin mihingte abuai ua, mahni poimoh ngaihlam chiat sai in aphe- vengvung uh. Huchi a, buai veng vung himahle uh, Jesu hong pianna thu theihlouhvual dinga aguk-agal a hongtung ahi kei. Vansawltakte’n athei ua, suahlam mipilte’n ana thei ua, kumpi Herod in ana thei a, belamchingte’n leng ana thei uhi. Huai hunlaitakin, mahni poimohngaih thilte’ a buai vengvung lou hile uh, mipi dang tampi’n leng a theikha ngei ngei ding uh. Belamchingmite’ thugen za peuhmahte’n lamdang asa mahmah uh, chih tan chiang lel akimu [Luka 2:18].
Ahihhangin, kisimpi kut leh khovel thilte ah mahni poimohte a awlmohzaw un abuaipih zaw ua, Kumpi thak piang tuh thudonlou in mahni kia akibuaipih kha maimah uhi. Huaitan lel ah a beikei lai, khophawk lou a a om vengvung lai un, a maban ua sihna mulkimhuaitak, kumpi Herod thusuak – naupang pasal kumnih chiang nuailam tengteng thah di’a thupiak om ana himaimah hi [Matt 2:16]. A khente’n zaw a mulkimhuai tualthahna alak ua a tuntan inleng aziak-asan atheikei lai ding uh. Himahleh, aziak atheihlouh hang un a ta-ngeklaite uh hawisak ahituan samkei. Pathian mizatte’ aw (voice) zaban dinga om hile uh, A nu-le-pa’n Jesu a galtaipih bang un, amau leng a ta-ngekte uh bangtan hiam ah a humbit kha ngeingei ding uh. Ahihhangin, ahuchikei ua amau buaipih ana tuamluat ziak in atate un a thuakloh uhi.
Unau, tuni’n Pathian in A misiangthoute’ tungtawn in Athu hon zasak lai, hampha hinatel hang e! Amau’ thuhilhnate ngaikhe nuamlou lailai a I om un zaw, mihing ngaihtuahna a leng I gelbat louh amulkimhuai maban tuak ding hi hang. I buaipihte a mangpah thei thilte leltak ahih lailai leh zaw, kikhel ni hong om ding ahi. Na sa a ding na buaipih zahzah bek in na Kha a ding buaipih le-teh na kisiik kei zaw ding. Huailai a mihingte’n Khristmas ana lopdan uh a mulkimhuai tel. Eite’n leng A hon sapna, hii-lengte leh khovel thuthang tuamtuamte ngeingaihlou a khovel thilte kia buaipih a I omlai lai un zaw mangthang ding I hi uh. Jesu’n mipi sangnga a vak zoh in, Amah zong mipite a taihilhna ah, “An mang thei phet zong in phiaphia kei un, khantawn a hin pha a om gige ding an, Mihing Tapa in a honpiak ding zong in phe zaw un; Pa Pathian in amah a chiamtehta ngal a, a chi a,...”[Johan 6:27].
Natna hii-leeng akipan suakta ding na himaithei, na damsunga gaihzohlouh ding kholkhawmta na himaithei, na suante khang tampi daih ding kaikhawm khin na himaithei, hiaite tengteng nei inla, na kha manthatna ah pailiam leh bang aphatuam di’a?[Matt.16:26]. Khrist Jesu nang mahmah sunga na piansak ni-ni nanga dingin Khristmas ahi. Huai ding in Khrist alou-theilou ahi. Tamtakte’n niteng huntenga Khristmas a loplai un, nangmah lampi tuam khovel thil a ana buaiden na hihkhak le zaw, na Kha a mangthang dinga, sihna mulkimhuai na maban ahi. Kisimpi lai in ta-ngek chikchikte’n a thuakloh bang un, khovel thil a na buai ziakin nang kia hilou na tu na ta’n leng sihna mulkimhuai a tuakkha ding uh, lauhpih in! Nang leh amaute na bitna ding un, na galtai theihna omsun Jesu Khrist kiang kia ah ahi. Amaute’ lampi ding leng gelphatpih in.
Amasa ding na-nun theih ahi. Khovel I khualzinna lel ahi a, hiai a I taamsung pen huntomchik petmah ahi. Sa a I omsung daihlel ahi. Hiai huntomchik sung I omna a I taksa adi’a poimohte I lungsim teng leh thahatna teng suah a I kaihkhawm peih bang un, I khantawn hinna adi’a kiphamoh I Kha a ding poimohngaih in I lungtang tengteng toh, I hatna tengteng leh I bangkim tengteng toh I zon hun hita lou hiam?
Thukhitna :
1. Khrist alou-theilou a I taksap lianpen ahih angaita.
2. Khrist in alou-theilou a mun poimohpen aluah akulta.
3. Khrist kianga alou-theilou a I kituklut uh angaita.
4. Khrist in I hinkhua a alou-theilou a vaihawmna Lal tutphah aluah angaita.
5. Khrist alou-theilou a I niteng-hunteng a hongtel angaita.
6. Khrist in alou-theilou a I lungtang tengteng, I ngaihtuahna tengteng leh I hinna tengteng hong thuzoh angaita.
7. Khrist kianga alou-theilou a khelh kiphawk a ngaihdam nget akulta.
8. Khrist kianga alou-theilou a thuphatawi a I kipuankhiakvek akulta.
9. Khrist sihna a alou-theilou a I khelhnate I sihsak angaita.
10. Khrist banga alou-theilou a khelhna tunga vualzou a I thohkik nawn uh angaita.
11. Khrist batpihna nei a I hin uh alou-theilou ahi.
12. Khrist tuak dia alou-theilou a mansa a I om uh akulta.
