I gamsung siatdan bang ahihkeileh ei mimalmalte; i siatgawpdan uh, i thumanlouhdan uh chihte i gen sek uhi. Tulai in Missions Tuailai 2020 saina a online sermon om zelte ah i siatdan uh hong kigen hi. Pathian thugente bang leng i khelhna thu uh ahi bangbang gen diing ahih chiang in kisuanglah deuh uh bang ka sak ton a om hi.
17.4.2020 ni khawng apan in i siatna leh khelhna thu uh ahihi mah Evan. Lianding Guite in hon genkha fuh ka sa hi. Tuzan in Rev. Kamchinkhup in hon genkha nawn a, kipahhuai ka sa hi.
Laisiangthou a i muh Jawlnei Isai, Jeremiah, adangdangte'n hangsantak a Israel mite siatdan a gen toihtoihdan un ei gam a Pathian thugente'n leng i siatdan uh a gen chiang un kisuanglah lou in hangsantak hon gen zel lai le uh chi mahmah ing.
I gam a se lua i chi uh. Hih leng a himah hi. Himahleh Pathian thugente zahna liantak zaw omlai saam hi. Tulai hun in i gam uah khelhna thugen Pathian sikhate vuakliam hiam Pathian thu ziak a thah a omkha om nailou un ka thei hi. Program khat omleh thumna nei diing bang in Pathian nasemte kisam in kichial sek hi.
Hiai in hon etsak tuh Pathian deihdan zuizou kei mah le Amah launa kinei lai a, A vualzawlna zaw kideih chiat tadih lai hi. Pathian thugente'n a gen diing dawl un hangsantak in thuak hial a kuulleh leng hon gen toihtoih ngam uh kipoimoh hikha diing hi.
I gam siatdan i gen chiang un uang lua chih omlou khop a khelhna a kibual i hita i chi uh. Himahleh sualna hihtute maitang a maituah (confront) Pastor, Upa, addg. kigen zak diing a omta hia? I siatnate uh toh kikhom a, guh dawk zen a gen diing mihangsan, thutak mai a taise lou Lamka khopi in kisam himaithei hi. Kisuanglah hetlou in gentou zel le chihhuai lua hi.
I pastor, evangelist, addg. khelhna thu gen dia hong kipante moral support pia, dinpih, gum leh hasot diing gingtute'n i mohpuak uh hi in ka ngaihtuah hi. Hangsantak a hon genkhete i na dinpih louh chiang un amau a di'n pangpathuai thei diing hi. Tua ziak in a gen uh hoih i sak chiang in khut a na beeng a, i tosawn a, kipahpih i hihdan i na latsak zel pen A min a thutak gen ngamte tuisik nou khat i piakna bang in ka ngaihtuah hi.
Pathian thugente'n a gen chiang un Laisiangthou ah kiik ni, Laisiangthou i damna ahi chih tan a gen sek uhi. Ka gen diing bang ua genzou lou ka hi uh, chia mahni mohpuakna genna bel kinei banlou sek hi. Ka gen diing bangtak un ka genkha kei ua, leng ka genzou kei ua ahi chihdante zak diing om khollou. A ngaikhetute khelhna kia zaakzaak dia om sek. A ngaikhetute tuh a khial leh chinlou mah kihi. Huchihlai in a gentute lam apan mohpuak zohlouhna ki-admit na tawm deuh a diam ka chi sek. Tuzan in Rev. Kamchinkhup in thugentute mohna leng a hon genkaikha cheuh a, hoih ka sa hi.
Hitler in Judate mihing nuai guk a thah i mohsak chiat uh ka gingta hi. Hilehle a teacher-pa kua'n a mohsa ngei a? Ke'n chu Hitler' sinsaktupa leng mohkha in ka ngaihtuah! I tate a siat uhleh nu-le-pate kihul thei diing hiam? Ka gingta kei.
Lamka mipite siatna ah sahkho makaite siang thei diing mah uhia? Ke'n chu amau leng mohsakhuai ka sa hi. A ziak bel siampu Eli' tate gitlouhna ah Pathian in siampu Eli ngei leng a tai-ek hi. Pastor-te, thugentute i mohsa ngei kholkei ua; a zu nenete, a gutate, tualthattute, poppy chiingte, chingpi kaapte, addg. i mohsa sek uh. Himahleh amaute tanchinhoih a keemtu leh vaaktu Pathian belampute i mohsa ngeikei uh! Kimohsatuah ni chihna lam hilou in hansan i suahthak poimoh ahi chi ut i hizaw hi.
Taihilhtu dia mohpuakna nei mite toh kisai in Romte:12:8 ah, 'Taihilhmi'n leng taihilh geihgeih heh...,' chi'n kigelh hi. Toupa'n gingtute hih dia hon deih leh mohpuakna hon piak a tuamtuam om chiat hive'n, A hon deihna leh lametna tan semsuah thei diing in Toupa'n i vek un hon ompih chiat hen aw!
.….
*Thugelhtu, tulel a Leader, Content Writer (Media Team), EBCC Delhi hihna len ahi. Lungdam lua hang.
