Kei, Pa leh Kha Siangthou tuh Khat ka hi uh. Nisa ah satna (heat) leh vakna (light) a om a, vakna pen tuh satna ahikei a, satna leng vakna ahikei hi, a kilatna uh tuam tuak mahleh khat ahi uhi. Tuabang mah in Kei leh Kha Siangthou in tuh Pa akipan in vakna leh satna khovel ah k’on paw-lut uhi. Mei a baptisna tuh Kha ahi a, huai Kha in tuh khelhna leh mohnate gingtute lungtang ah a halsiang a, niin banglou leh siangthou in abawl hi. Kei tuh vakna diktak ka hi a (Johan 1:9;8:12), mial leh hoihlou lunggulhna teng thengsaktu, a tangtawn inn uh a tun theihna ding ua diktatna lampi a piitu ka hi. Nisa khat (the sun in but one) ahihbang in kou leng thum hilou in Khat ka hi uhi.
Pathian in mihingte thilhihtheihna, pilna leh siamna in a honthuam a, huaite tuh zatkhiat ding ahi, a kizat keileh mangthang thei ahi. Hiaibang in, ginna leng Pathian akipan kiptak ahihkeileh ginlelhna leh khelhna lakah a mangthang thei hi. Kuahiam in "hiai ka buaina (ginlelhna) vensak hileh gingta di’a kiman ka hi" a chih i za sek uhi. Hiai tuh kuahiam kheguh heksak kha in a kheguh bawlhoih sak sawmlou a, a natna pen lakkhiat sak sawm toh kibang ahi. Hiai tuh a haihuai mahmah ahi. Kheguh hek ziaka a natna om ahihman in a kheguh hek pen kibawlhoih leh a natna pen dam ding ahizaw hi. Huaiziakin i khelhna hihte un ei mihing toh Pathian kizopna a hihsia a, khalam haksatna leh ginlelhna buaina a tun hi. Huchi ahihziakin Pathian toh i kizopna uh thaksak gige le hang Pathian om leh omlouh toh kisai a buaina leh khalam buaina tuamtuamte bei ding ahi. Huaichiang in haksatna mun ah khovel in a lakmang theihlouh khamuanna a hongtung ding hi. Tuabangin, hehpihhuai mihing leh Pathian kizopna sesa bawlhoihtu ding leh tawntung a kipak tak a Amah toh vangam a tun theihna ding un huai Kei kichi (Jesu) tuh sa a hongsuak ka hi.
Pathian tuh itna ahi a, thilsiam tengteng tuh a itna toh honthuam a, mihingte ah A itna a kilang diak hi. Eite hon ittu Jesu in hinna leng a honpiak ngal leh a hon itna tuh manpha theipen a i zat ding uh ahi. Toupa Jesu’n a deih tuh a thilsiam tengteng in A itna a theihsiam ding uh ahi a, Ama’n a hon it bang a e’n leng I lungsim tengteng, I kha tengteng leh I hinna tengteng toh Amah I it ding uh ahi. Hiaibang a i it thuk kei uleh angmasial leh mi kisathei i hi ding uhi. Hiai in tuh ei mahmah leh Pathian thilsiamte tung ah buaina leh siatna tungsak ding ahi. Angmasial mi tuh mahni kithat toh kibang ahi ngal a.
"Nang na ki it bang in na innveng te it in” chih leng a kigenta hi. Mihing tengteng ki-innveng i hi chih a genna himahleh i innkiang nai a tengkhawmte ahi biik hi. Gilou sim mahleh ni bangzahhiam sung tuh i innveng toh kinaklouh theih ahi a, himahleh a hun hong sawt dungzui in i dohzohna tuh a bei deuhdeuh a, ei i ki-it bang a amah it ding chu a haksa mahmah hi. Bangteng hileh, hiai haksatna tung a na vualzoh chiang in nang na ki-it bang a midangte na it theihna tuh a lian mahmah ding hi.
Kuahiam in a lungsim tengteng, a kha tengteng leh a hinna tengteng toh Pathian a it theih a, amah a ki-it bang a a innveng a it theih chiang in ginlelhna buaina tuh a omkei di’a, amah ah tuh a bei ngeilou Pathian lalgam tunding ahi di’a, itna meikuang in a hoihloute halsiang leh bawlhoih ahi di’a, Amah bangbang a Siamtu Van a Pa bang mel huai mi'n a honpu ding hi.
*Pau lettu, tulel a EBCC Delhi, BCD Sinsaktute laka khat ahi. Ama’n GBC apan M.Div. na zoukhia a, tu’n SAIACS, Bengaluru ah M.Th. in Pastoral & Counselling course (2 years) sinna di seat mu.Nitak vaihawm apailehtualsung saptuam angvanna tawh tunung sawtlou in hon kuansan diing hi. TOUPA hoih hi.
