Mihinpihte Kemtu Muanhuai

Thumapi:Kahl.3:28-38, 40.Haksa i tuah chiang in kuhkal tak a daidide a tu in i ngak dia; kipumpiak in i kuun ding ahi, lametna omlai maithei ahihziakin. Vuak leh salh in om mahle’ng, i pomsiam vek ding ahi. Toupa, mi hehpihthei ahi a, hon nial paisuak kei ding hi. Hon lungkham sak kha mahleh A’ itna a muanhuai in a kip tawntung hi. Dahna leh natna hon thuaksak chianga Amah leng kipak tuanlou ahi. Suangkulsung (tan-inn) a lungkham tak a i omlai Toupa’n A thei. Itan ding ua honpiak pen a i om louh lai leh,vaihawmna pisa a thudik a vai a kihawm louh lai a thei. Pathian’ deihlam mah ahi sep khiak a om tawntung, Toupa A’ ut keileh kuama’n bangmah hih theilou ahi. A hoih leh hoih lou, A thupiak a tung ahilel uhi. I omdante uh i enchian ding ua Toupa kiang ah i kik ding uh.

Tukum 2020 a i Saptuam thupi "Kemtu muanhuai" chih a khennenna April 2020 a ding "Mihinpihte kemtu muanhuai" chih tulai khovel dinmun toh bang hong kituak law-tel a manpha I sa mahmah hi.Thupi toh kisai hichidan in kikum le’ng chi’n k’ong kisa hi:-

Mihinpih Kepngaite Leh A Kep Dingdan:

1. Gamdangmite (Lev.19:33-34). Gamdangmi na gam ua teeng sam om leh – (a)Na hihsiat louh ding uh, (b)Na gammi bang ahi ding ua, (c)Nangmah na ki-it bang in amah na it ding ahi. Nou leng Aigupta gam ah gamdangmi na hi-ngeita uhi. ILP khawng leng exclusive mahmah ve’n, Toupa bel Inclusive ahi.
2. Pa neilou leh Meithaite (Diu.24:17). Gamdangmi leh pa neiloute (a)Diklou tak a na gen sak ding ahikei. (b) Meithaipuan leng khamna di’n na laaksak ding ahikei.
3. Hatlou,Tasam Leh Chimohte (Mt.25:35-40). Gilkialte- nek ding pia in, dangtaakte- dawn ding pia, mikhualte - zindou ding, vuaktangte - puan paih di, china/damlou leh suangkul taangte - veh ding.
4. Tuahsia Tuakte Kepna Ah(Lk.10:30-37) Kuahiam Jerusalem khua akipan Jeriko khua ah a hoh suk a, suam hatte a tuak hi. Amau(i) Apuan asuahsak vek ua, (ii) Avua ua, (iii) Sidektak in (iv) Apaisanta uhi. Suamhat tuak a liam thuakpa mi thum in a tuak uhi.

4.1 Siampu: Siampu kuahiam lampi ah a vapai suk a, a muh tak in lamsiik lehlam ah a pel maimah hi.

4.2 Levi: Levi chi mi khat leng hiai lampi ah avapai suk a, a muh tak in lampi siik lehlam ah a pel maimah hi.

4.3 Samarimi: Himahleh,Samaria gam apan mi kuahiam khualzin pailai a omna a hongtung hi. Amuh tak in:-(a) A lainat mahmah a, (b) Akiang ah avahoh a, (c) Aliamnate thau leh ua-in a buak a, (d) Atuam a, (e) Ama gan’ tung ah a tuang sak a, (f) Khualbukah a paipih a, (g) Akemta hi. (h) Azing in makhai nih a suahkhia a, khualbuk kempa kiang ah a pia a, “Amahna kem inla, hiai ban a na zat teng ka hong kiknawn chiang in ka hon din ding,” a chi hi. Hiai tuahsia tuak ading in Siampute, Levite sang in Samaria gam mi theih ngei leng hilou tuh panpihtu leh kemtu muanhuai a hong hizaw hi. Vangam zuan a i khual zinna lampi ah suamhat tuak, mahni a kikem dam zoulou ding, melmapa soisak mi bangzah i tuakta a… lam tuam a pel maimah a don sak lou khawng I hi uhia ? Ei leng liam thuaktu a zong pan theih ahi. Akhoitu leh kemtu a pan theih lai hamphathuai lua ahi.

Puakgik Akidawn Dingte Ihi (Gal.6:2, 9,10): Napuakgikte uh kidawn chiat un, huchi’n Khrist danthu na zui uh ahi ding. Thil hoih hih chimtak kei ni, I lungkiak keileh ahun tak ah i at ngei ding uhi. Lemtanghun i neih dan bang zel in mi tengteng tung ah thil hoih hih ni, ginna a innkuanpihte lak ah hi kholdiak hen!