“Sawl ahih kei uleh bangchi in thu a hilh ding ua? ‘Thil hoih tanchin kipahhuai tunte khe kilawm hi na tel e!’ chih gelh bang in.” (Rom. 10:15)
Thu patna: Khe kilawm kichi “bang ahia?” chi in kidong le’ng dawnna tuamtuam tampi om ding in ka gingta hi. Pianzia a khe kilawm leh nalh tampi om hi. Huai ban ah tulai khovel a Lionel Messi, C. Ronaldo leh midang football kimawlsiamte khe khawng mah kilawmpen in manphapen mailou ding hiam chih theihna chiang om hi. Himahleh tuate i gen-ot nuampen ahi kei a, pianzia a kilawm lou leh football kimawl siamte bang a nek-le-taak, sum-le-paai muhsuahna dia kizang theilou hinapi a Pathian’ mitmuh a, khe kilawm tampi om hi.
Pathian’ muh a kilawm leh mihing’ muh a kilawm kichi in kibatlouhna tampi nei hi. A ziak bel etdan, muhdan, leh manpha sakdan kibang lou lua ahi. Pathian in “thil hoih tanchin kipahhuai tunte khe kilawm hi na tel e!” chi hi. Paul in mihing chitlouhna a suutna ah “a khete uh sisan suah ding in a kinsuan uhi” (Rom. 3:15) chi in suut hi. Mihing pianzia a lampi i totte tuh khelhna lampite ahi uhi. Tanchinhoih kipahhuai tunte khe bel, sisan suah dia kalsuanna hilou in, mi kuahiam in hinna neihna ding ua kalsuanna ahihman in kilawm hi. Tanchinhoih in mi khek a, Pathian toh kal kizomsak, a za mite a ding a damna thu ahihman in manpha mahmah hi.
Thu khitna: I saptuam a thu kipahhuai mahmah tuh, tanchinhoih gen ding a tuailaite i sawlkhiak uh ahi. Saptuam in i hih hoih mahmahte lak ua khat ahihman in, nak sem a panla a, tamsem i sawlkhiak uh poimoh hi. Saptuam in tanchinhoih gen ding a, sawlkhiak ding mi i neihlouh hun leh i sawlkhiak louh hun hong tun ding, thil lauhhuai mahmah ahi. Huan ah hiai tanchinhoih kalsuanpih dia Tuailaite Toupa’n hon piak leng kipahhuai mahmah ahi. Adiak in, Toupa’ min a kalsuan dia kipia tuailai thathou leh hattakte‘n EBCC Delhi hon tawn a, sharing hong gente uh manpha mahmah a, saptuam Toupa’n hong vehlai ahi chih kilatna bang in ngaihtuah theih hi. Huaiziak in, Missions nasepna lam ah eimah hihtheihna lam chiat ah nak sem a panla ding in kisa chiat ni!
