“Huaiziak in mi’n na tung ua thil bangpeuh hih ding a na deih bang uh, mi’ tung ah leng hih sam un; huai daan leh zawlneite thu ahi him hi.” Matt. 7:12
Thu Patna: Mihingte a malmal a khosa ding a siam kihi lou in, a honpi a khosakhawm ding leh tengkhawm ding a siam kihi hi. Mihingte i bukimlouhna leh kiningchinlouhna tuh, khat-le-khat i kipoimohtuahna kilatna ahi. Khristiante tuh i khosakkhawmpihte toh kituak leh kilemtak a i om ding, thilhoih a pokhetute i hih ding uh ahi.
Mi toh tengkhawm, khosakhawm i hihman un, veng-le-pam toh kituaktak a om ding chih khotang in a poimohngaih mahmah hi. Huaiziak in daan-le-dun zuih ding vengsung/khosung kivaipuakna ding in kibawl hi. Himahleh tua daan-le-dunte’n kipumkhatna hon lenkipsak zou den samlou in, kihou theilou, kingeih hetlou a tengkhawm chih leng om thei hi.
Laisiangthou ah, Pathian in veng-le-pam toh hinkhawm dingdan hon sinsak hi. Atung a i taang teel tuh “Golden rule” chih a om ahi. Hiai lungput mi khempeuh in, neih ding a hoih ahi. Adiak in Khristian-te’n i zuih ua, i hinkhiakpih ngeingei ding uh ahi. Innkuan, khotang chihte leng kipawlkhawmna (institution) hi a, hoihtak a a pai theihna ding in kizopna chidam poimoh hi. Kizopna a chidam louh chiang in, kikhenna piang a, kipawlkhawmna sesak hi.
Mihingte khelhna in naktak in hon susia a, kipawlkhawmna ah kilemna sang in kilemlouhna om pahpah hi. Innkuan sung nasan kidouna phual thupitak suak maimah hi. Mika 7:6 “Tapa in pa’ min a hihsia a, tanu in a nu a dou a, mou in a pi a dou ngal a, mihing melma zaw ama’ innkote mah ahi uh,” na chi hi. Himahleh Khristian-te a kisukkhakpih mite uh toh kilemtak a a om theihna ding un, Jesu’n sinsakna poimohtak pia hi. Huai tuh eima’ tung a om dia i deihlouh, midangte’ tung a hihlouh ding ahi. Etdan dang in en le’ng, eimah i kingaihpoimoh bang a midangte ngaihpoimoh ding chihna ahi. Midangte toh kituak theiloute tuh amau’ a ding kia en a, midangte awlmohna neiloute ahi uhi. Tua ahihman in, veng-le-pamte toh kipumkhatna a om theihna ding in Jesu sinsakna Matt. 7:12 “Golden rule” letkip a, zuih chiat poimoh hi.
Thu Khitna: Bangchibang mi i hi hiam? Mi toh tonkhawm theilou, khotang a khosa hinapi a, eima’ tumtum a gamtang i hikha hiam? Ahihlouhleh midang sang a kikoihlianzokha bang i hi hiam? Romete 12:9-12 sung ah veng-le-pam toh kipumkhattak a i om theihna dingdan chiangtak in kimu a, eima’ lemtan hun a hoihtak a sim ding leh suut ding in ka hon ngen hi.
