Naupangte’ Ni kisakholhna masa dan in ni nih – huai tuh, June 8 & 9 – zat ding chih himahleh i saptuam sung a lusunna hong om ziak in Ministerial Committee pha sakpihna toh ni khat zat ding in program kibawllem thak hi.
Huchi in June 9 (Pathianni) kikhopna hun masa leh nihnate suam in special program kizang. Tukum a program a tuamna ahihleh, 'Echoes of Praise: Proclaiming God’s G lo,' chih minvuah in Praise & Worship session nuamtak mai kizang ahi. Hiai special event pen nikum a Teenage Camp follow-up Plan sepsuahnate lak a khat leng hi ngal hi. Ban ah naupangte lak ah kitaitehna tuamtuam, lungluthuai taktak kisai bok.
Session masa 10.00 AM in kipan a, kitaitehna hunpi deuh in kizang. Main sanctuary ah Primary apan Senior Pawlte a ding in Quiz, Bible Recitation leh Creative Art kisai hi. Naupangte’ response hoih mahmah in tampitak tel ua, Quiz leh Bible Recitation ngial participant a tam ziak in Pathianni masa (June 2) in preliminary round a na kisai masa a, finalist teng June 9 a kidemdan uh ahi.
Kisakholhna masa ah Extempore Speech leng sai dia geel himahleh hun kibichilh ziaki n hiai pen kilakhe thak.
Session masa sung mah in basement ah Beginner-te atuam in kitaitehna – Solo, Bible Quiz leh Bible Recitation – nuamtak leh feltak in kisaikhawm hi.
Session masa, main sanctuary a kitaitehnate’ kallak ah band/group-te apan Pathian phatna lasak ngaihkhiakna kinei zel. Music tum hi’n lasak hileh siamthei mahmah mai ua, Pathian in i naupangte talent hoih taktak a piakte i muh nuam in lungsim kipahna lian hi. Nu-le-pa khenkhat ngial in houh a tate uh music tum theihlam a muh patna khawng uh hidan ahi.
Session nihna 2:30 PM vel in kipan nawn. Hiai pen Naupangte’ Ni special program ahih kawmkawm in mipite’ uap ding in kibawl hi. Hiai hun ah leng band/group-te apan phatna lasak kisunzom in, Pastor Dr. Suankhanhau Gualnam apan Naupangte’ Ni Message (thugenna) tom litlet lah manphatak mai ngaihkhiakna om hi. Nute (TBDC) apan in naupangte leh sinsaktute itna thilpiak hoih taktak leng kingah. Kipak!
Tutung Naupangte’ Ni phatna lasa band/group/mimal a kigawm in 11 pha hi. Siamthei mahmah mai ua, a talent uh Pathian’ phatna dia thupi sem a mutkuangsak leh kizatna ding platform bawlsaktouh zel i saptuam’ mohpuakna lian mahmah khat hi a muh ahi.
Hiai bang program manphatak hon zangsak Pathian’ kiang ah thupina tengteng i pia ahi. Nu-le-pate’n naupangte kitaitehna tuamtuam a tel dia pan i na lakpihdante uh phattham leh zahtakhuai hon kisa hi. Ban ah, hiai hun adia poimoh bangkim – neu lua, lian lua chih omlou a – a hunhun a kithuahpihna hon pe ngitnget Media Team, Ushering Team, nek-le-taak hon bawlsaktute leh mimal/saptuam sung a Committee-te, lam tuamtuam a pan a na lakha tengteng tung ah Pathian’ min in sinsaktute’n kipahtu ka hon gen uhi.
(Creative Art kidemna a naupangte’ art work nalh taktakte basement ah ki-display a, saptuam mipite kuapeuh in va et theih ding hi.)
