“Ngen un, piak in na om ding uhi; zong un, na mu ding uh; kiu un, hon honsak ding uh. Kuapeuh a ngen in a ngah a; kuapeuh a zong in a mu a; a kiu peuhmah honsak in a om ding hi. Ahihleh noute kuapeuh na tapa un tanghou ngen taleh, kua’n suang pe ding na hi ua? Ahihkeileh ngasa ngen taleh, kua’n gul pe ding na hi ua? Huchi hileh nou migilou in bawn, na tate uh thil hoih piakdan na theih un, na Pa uh van a om in a ngente thil hoih pezo semlou ding hia?” (Matt. 7:7-11).
Thu Patna: Pate a pil uhleh a siam ziak uh hilou; hat leh hatlouh thu leng hilou, hauhsak leh zawn thu hilou in, a tate’ a ding in manpha vek uhi. Pate’ manphatna gen kim zoh ngei ding in ka koihkei hi. Pate leng mihing ahihman un, a hoihlouhna uh i muh leh gen ding omkha thei hi, himahleh tate tung ah a hoihna uh gen ding tamzo thamtham ding hi. Jesu’n nungzuite “thuum dia thuhilhna” sinsakna a piaklai in pate’ hihna manpha mahmah, genkhak in nei hi. Huan leitung a pate tuh van Pathian’ hihna i muh leh theihchetna ding in poimoh mahmah uhi.
I. Lametna toh ngetna ding, kiuhna ding, zonna ding mun tuh Pate kiang ahi (vv. 7, 8): Mihing khatpeuh amah a bukim hiam, kiningching hiam omlou hi. Tua ahihman in pate i poimohna uh lian mahmah chiat hi. I taksap chiang a i ngetna ding, i buai chiang a i kalsuanna ding, sinsakna hoih leh lametna i muhna ding tuh pate kiang ahi.
Mi khatpeuh kiang ah lamentak a thil va kikum theilou hi. Mundang teng ah lametna omlouh hun in leng pate kiang ah lametna om hi. A ziak bel ei’ a ding in pate’n thil hoih hon deihsak gige a, hon panpih nuam gige uhi.
II. Tate ngetna thil hoih toh thuk nuam gige pate ahi (vv. 9, 10): Pate’n thil hoih a deihsakdan uh, Jesu’n genchiang mahmah hi. Tate’n thil hoih a deih leh a lunggulh uh, pate’n hamsiatna/hoihlouhna toh thukkik mawklou ding uhi. Tua ahihman in, tate’n tanghou ngenleh kua’n suang pe ding; ngasa ngenleh aikam pe ding hiam chi in dotna bawl hi.
Thil hoih tate’ tung a piak theihna ding in, pate’n tuh lungsim leh ngaihtuahna tampi a sen ban uah nna naktak in sem ua, amau nopsakna (comfort) tate’ a ding in luikhia (sacrifice) uhi. I deih bangbang, i lunggulh bangbang pate’n hon piak zohlouh hang un, ei’ a ding a thil hoih hon pe nuam gige ua, a hoihlou piak ding lungsim ah pate’n neilou uhi.
III. I leitung pate sang a, van a Pa in a tate khualzo lai hi (v. 11). “Nou migilou in bawn” Leitung pate sang in van a Pa tuh a hoihzo thamtham a, thil hoih leng pezo thamtham ding hi. Hiai hih thu kipahhuai mahmah ahi. Leitung pate sang in van a Pa in a tate khualzo lou hileh, naungek hiam naupan lai a, pa in a sihsante’ a ding in lametna omlou ding hi. Leitung ah ‘pa’ chih ding i neih nawnlouh hang in Pathian om ahihman in lametna leh lungmuanna kinei hi. Leitung pate’n thil hoih a hon deihsak mahmah hang un, a hihtheihna un phakchiam nei mahmah a, a hih theih uh tam hetlou hi. Himahleh van a Pa bel, a thilhihtheihna in phakchiam a neikei a, hih theihlouh leng a neikei hi. Amah kiang a tai khempeuh zahlak in a koihkei a, a humbit zel a, thil hoih in a vuk zel hi.
Thu Khitna: Tuni ni poimohtak, pate’ ni ahi. Jesu’n, leitung pate’n hon kepna leh khotuahnate pansan in Pathian’ hon itna leh hon khotuahna sinsak hi. Tua ahihman in Jesu’n leitung pate’ hinkhua thupi sa kawmkawm in, a thupizaw hon sinsak nuam hi. Tua ahihman in i pate chiat uh thupi i sak ua, amaute i zahtak chiat ding uh tate tengteng’ mohpuak ahi. Huai ban ah Pathian’ hon itna thupidan ngaihtuah thak ni, “Hiai ah itna a om, eite’n Pathian i it uh ka chi a hikei, ama’n hon it a, i khelhna thuphatawina ding in, a Tapa a hon sawl ka chizaw hi.” Pate’ ni zat nuam!
