Naupangte' Nipini Chibai! EBC Saptuam munchih-mualchih a om kuapeuh in hiai nipini Toupa' ompihna toh manphatak a i na zat uh ka lamen hi. Hiai hun poimohtak ah naupangte'n i theih ding thil thum chauh ka hon gelh a, a na limsak ding in i kingen hi.
Hunte a hoihlouh ziak in, ut leh utIouh thu hilou in gaal i nei uh a, huai in i hindan ngeinate hon subuai ahihman in poi i sa mahmah hi. Himahleh hiai bang hun ah Pathian i muang ding uh a, a thutak sung ah i om ding uh ahi. A ziak tuh Ama’n a mi Israel-te Ieng tua bang a gaal ziak a patau leh ling a a omlaitak un, "Laukei unla, huai mipi thupi mahmahte ziak in leng lunglel samkei un; kidouna noute kidouna a hikei a, Pathian kidouna a hizo ngal a," a chi hi (2 Kronikil 20:15). Pathian muanna sung ah om in naupangte'n tuh galdouna sang mah in laisimna ah lungsim tam pezaw lehang a hoih ding hi. A ziak tuh i gam-lenam, innsung leh Saptuam maban ding noute khut ah hong kinga ding ahi.
Khovel in hon pidan dungzui in, naupang tamtakte'n smart phones leh intemet-te zang thei in i om a kipahhuai hi. Himahleh, huaite i zatsiam keileh ei a ding kia hilou in midangte a ding in Ieng siatna tun thei hi. Thuzuau pipi khawng gelh a thehthang thei tampi i om ziak in huai bangte naupangte'n i hih hetlouh ding uh ahi a, thu om peuhpeuh Ieng thudik hi kim veklou ahi chil i theih ding ahi. Naupang i hihlai in tuh Social media khawng zat tamlouh a hoihpen hi. Tua ban ah phone et tam luat, games kimawl tam luat kichi naupang leh a liante a ding natawm a Ieng hoihlou ahihman in pilvan ding ahi. Laisiangthou in, "Pilvang unla, limsak un; na melma uh Diabol, humpinelkai humham bang in a nek theih ding zong in a vialvak hi," (1 PETER 5:8) a chi hi. I lunglut mahmah, nuam i sak mahmahte khawng melma Setan in ei hon suksiatna ding a zang nuam mahmah ahi chih phawk in pilvangtak in i om ding uhi.
Naupangte: Nu-le-pa’ thumang lou i om uhia? Nu-le-pate zahtak lou i om uhia? Huchi bang mite Pathian in awilou ahi. Pathian in naupangte mohpuak poimoh penpen a gen tuh "Nu-le-pa zahtak ding" chih ahi. Tulai khovel ah thil awlmohhuai tampi a om hi: Sum-le-pai zonna, galdouna ah duty ding, khotang vai a sep-le-bawl ding leh a dangdang tampi om hi. Himahleh, naupangte a ding in zaw huaite tengteng sang mah in innsung ah Nu-le-pate thumangtak a i om ding tuh i mohpuak poimoh penpen ahi.
Deihthohtak naupangte aw! Thil tampi na kiang uah gen ut ka nei hi. Himahleh tampite lak ah a poimoh diak teng ka hon gelh hi. Na heutute uh toh pangkhawm in hiai thil thum kigente a na zui teitei un aw!
Ka kipak
