Eimite adiak a Manipur Simlam gam a tengte a ding in khovel a ni poimoh leh kipahhuaipen ni bang hi ding hiam chi in kidong hita lehang May 7 chih hi ding in um ing. Tulai a i gam in i poimoh hi a i theih leh tamveipi Pathian kiang a i na ngettaak uh separate administration i chih mu bang hita lehang zong tua i muh ni, thupina leh poimohna in May 7 khup zoulou ding hi. A ziak bel hiai ni (May 7) tuh Pathian’ itna, Pathian toh kilemna thu, khelh ngaihdamna thu, hotdamna thu tangthupha a hong tun ni ahihman ahi. Hiai ni thupi leh manphatdan tuh sut a zong sut vuallouh ahi. Tua i dinmun leh hihnate khawng bang zong hiai tangthupha ziak vek ahi hi.
Hiai Missionary day kichi e’n i neih theihna’ng in kua hiam in a man a piak ngai hi. Hiai tanchinhoih tuh amah in a pai theikei a, mihing pumpi a hong zat ngai a, tua mah tuh Pathian’ geldan leh sepdan ahi. Tangthupha ei kiang a hong tunna’ng in Watkin Robert kichi mi khat in natna, gimna leh sihna thuak ngap a a hong kipumpiak chiang in, e’n tua thu hoih leh kipahhuai i na zakha thei hi. Sih-le-sih chi a, theih ngeilouh gam hong sik chiang in, e’n a na hamphatpih hi hang. Toupa Jesu’ kipumpiakna dungsun a kal hong suanna in ei leh Pathian kikal ah kilemna hon tun hi.
Pathian’ hehpina ziak in e’n Missionary day 114 veina mel i muh kipahhuai hi. Tua bang a i kipah lai in mohpuakna zong nei i hihlam mangngilh hetlouh ding ahi. E’n 114 vei lawmta, huchih lai a mi missionary day nei nailou tampi om hi. Hiai tangthupha ei tan a bei ding hilou in ma a sawn zel ding chih ahi. Tua bang a tangthupha masawnna’ng in nang leh kei khut a kinga hi. Tua ding in nang bangchibang in pan na la a? Mawk om thei vual kihi lou hi. Hotdamna thangthupa a dalh zelna dia theihtawp suah a i pan ngai hi. Nang panlakdan hun na sa hia, sanggam?
Ahihleh, a gintak louhpi uh bangchi’n a lou ding ua? A thu a zaklouhpi uh bangchi’n a gingta ding ua? Thuhilhmi omlou in bangchi’n a za ding ua? Sawl ahih kei uleh bangchi’n thu a hilh ding ua? “Thil hoih tanchin kipahhuai tunte khe kilawm na tel e!” chih gelh bang in.
(Romte 10:14,15)
