I tenna leitung uh pathian in a hamsiat sa ahi a, tua ziak mh in khelhna leh khemna chi tu- amtuam lam chi teng ah om hi. E tuailai hun ah bel pathian in a hn deih a, tua ziak mah in setan in leng hon en lah mah mah hi. Innkuan hoih leh mi lohching hih na diing in pathian neih poimoh pen a, pathian gingta lou mite lohching e sak bg om mah inte himahleh lei tung thil ahi a ei gingtuten e eng louh diing uh ahi. Leitung thil te bel damsung tom kal chik a diing ahi a, pathian bel tangtawn a di- ing ahi chih theih gige di ahi. Saptuam leh khotang hoihna diing in ei tuailai te khut a ki nga lian mahmah a, pathian tel lou in tuailai ten christian innkuan pat ahi thei kei. Delhi e chih chiang in laisiam, mi pil zo te om na chih in innlam a omten koih dan khat nei ua hi- mahleh tua mah bang in gen le sak ding hau veve uh hi.
Tuailai lak ah numei le pasal thangtat na a hoih lou pen ahi, mi nautang in hichi dan lam a om kha, kho lai thu leeng te a gen chiang un mun dg delhi a nuam tal tak a om a chih uh tam ahi. Pasal leh numei nuam tal na pen ei gingtute, christian tuailai te a ding a khemna lian pen ahi. Pathian e theih chian zoh louh man ziak uh a hi a, biakinn kai gige ziak bg, tuailai a e ki hel ziak bg a ki deih khop a path- ian deih louh dan a thil hoih lou hih theih na dia phalna mu dan a e ki koih khak d lauh huai ahi. A dou diing dan bel hotdamna camp ahih louh taak aleh ki et chianna hun fellow- ship kum khat in nih vei bang tuailai te a diing liauliau in nei thei zel leng, tuailai te lak ah pathian nungzuih na a nungtolh vang di ahi. Kha leh thu tak a biakna neih diing, sapum toh biakna leh aw suah a biakna chih te tuailai te lungsim a ut na leh awlmoh na neih sak sawm diing ahi. Pathian naih na a hamphathuai dan tuailai te lak ah khalam ann ki piak zel hoih diing ahi a, pathian toh ki nai mite khamuan na neih dan, lohching na, kipahna leh khovel nop sak na te sal a tang louh a pumpelh theih na lampi om ahi chih muh sak gige diing ahi.
Taksa tung a khelhna hih tuailai te lak ah tam ahi. Ei mihingte, pathian batpih a bawl e hi ua, e pumpi pathian sauliim ahih ziak in ki kep siangthou poimoh ahi. Nek leh muam theih , kikap theih leh hiip theih thil a tam a, ei tuailai te hiai saal a tang khak diing lauh huai lua hi. Ei tuailai hi in khangthak te hi ta leh, gam- dang leh ginglou mite tawndan, ki chei dan bg ki en ton pahpah ahi a, taksa tung a laimal gelh bang ki tam mahmah a hiai te bel path- ian deih louh dan ahi. Taksa kep siang thou ding dan bel pathian leh e nu leh pa deihna zahtak peuh leng ki muangkhial ngeilou ahi. Pathian lauh dan siam poimoh mah mah a, Mi amah deihdan leh ut dan a, a om chiang in lampi hoih lou lam a pial ut ahi chih lung- sim a vom gige diing ahi. Pathian nungzuih na zui maimai chih om theilou a, ki pumpiak na a poimoh a e lungsim leh ngaihtuah na tengteng, pilna leh siamna teng amah a diing a piak diing ahi. E biak pa pathian siangthou ahi a tua mah bang in ei a nungzui ten ki kep siangthou na e ngaih poimoh diing uh ahi.
Duh aam na leh chiil na chih khemna hat mahmah ahi. E niteng hun zat na leh e nek le taak zon na ah diktat tak in e sem hia chih kha ki dot taak lua ahi. E sepna te leh e sum muh na himhim te pathian vualzawlna ahi chih e theih gige a sawm a khat piak di manghilh louh diing ahi. Nna peuh mah pathian min thupi na diing ahi a, e hih peuhma tuh toupa dan phawk kom a hih ding leh thanuam tak a sep di ahi. Pathian in a deih pen ahih leh lungsim leh pumpi amah a diing a piak ahi. It pi pi leh khe lah pi a thilpiak e piak leh bel pathian a min pu a bia e hi chih e theih diing ahi, a ziak bel bang mah pelou a pathian it chih om theilou ahih ziak in. Pathian itna dik in phatna,thupina leh neihle lam piak ngam- na tun ahi. Pathian tung chauh ah hilou in, e mi hing pih te tung ah le it kei ni, midang a dia vualzawl na hih sawm diing ahi. Toupa e it kei a leh khovel it e hi kha diing, amah deih louh dan a om a hauh sak na te delh a e khovel thil te ah e ki piak a leh khovel ki it hi mai ahi, tua ziak in toupa a diing in it neih louh diing ahi. Duh aam na dou na diing in bel e lungsim khauh sak a ngai a, dik leh dik lou theih khen siam na le poimoh ahi, huai ban ah, christian e hih na a e mohpuak te zahtak leng vualzawl na le ki dong diing ahi. E haksat hun, taksap hun chauh ah pathian naih diing hilou ahi a, e nop hun, e lohching chiang a le hn lohching sak tu pathian mah e theih gige a tai san lou a amah deih dan a hinkhua zat dan siam ki sin diing ahi.
Ki deihkhopna bel khemna chi khat ahi a, a diak in ei delhi tuailai te bang hiai khem- na a puk baihsam mahmah diing ahi, a ziak bel, mundang a om te bang in ei delhi te hon mu saang petmah uh ahi a, en huai a hilou lam a laak khak baih sam diing ahih ziak in. Tuailai lak ah dinmun e neih ziak bang ahih kei leh midang te sang a e khosak theih zawk ziak bang a ki deihkhop tak a om, mit sik a mi en leh mu niam tak a om khak diing ki ven ngai lua ahi. Hiai khemna dou diing dan bel ki ngaihniam na hi pen mai ahi. Ki vel chian zel zel bang leng poimoh ahi a, e thumna te bang ah le midang te le phawk zel ding ahi chih manghilh kei leng. Ei sang a upa zo te zahtak na, makai te thuman na, mizawng leh genthei te awlmoh na neih diing ahi. Hiai te e neih kei leh bel ki vel chian kul mah mah ahi. Ei mah ni lungsim thu zoh zouleng ki khial lou pen ding a, pau tam luat, kamtam luat ziak bang a le mi dang te a dia thil ki lawm lou gen khak baih sam mahmah ahi chih phok gige leng hoih diing ahi.
Khelhna tuamtuam chi li a tung ah a ki gelh a, a doudiing dan toh himahleh khelhna himhim a dou na diing a pathian mah poimoh pen ahi chih manghilh louh di ahi. Pathian in amah bat pih a hon bawl ahi e chi khin ta a tua mah bang in amah hih na, siangthou na leh itna hauh na ei christian tuailai te diak diak in e neih tei tei diing uh ahi. Tuailai ni te ah toupa lau dan siam, toupa om pih theih , toupa zat theih leh tuailai hun a toupa a muanna neih diing ahi. Pathian lampi zui lou e hih khak leh bel ki hih khial mah mah diing ahi a, niteng in amah kiang ah thumna tungtawn in ki laan khia in amah kiang ah ki pe khe leng aman e niteng hinkhua ah hn veng bit gige diing ahi chih thei thak thak ni. E saptuam thupi te en kik leng “ Nang vualzawlna hi in “, “ kemtu muanhuai “, “Pathian naih un “, “Pathian limsakna” chih te e zui tak tak na hia ahih kei leh a kum bei chiang a e lungsim a bei sak zel e hi hia chih ki ngaihtuah ngai ahi. Pathian thu puan zak e moh puak ahi a e kiim leh kiang a e teeng pih ginglou miten ei tungtawn a path- ian mel a muh uh tup pi pen a nei leng chih e ki deih sak pen ahi.
