Amasa in hiai bang thu hoih tak gelh theih na ding hun lem leh manpha hon bawlsak i biak Pathian tung leh BYF Heutute tung ah kipahthu ka gen masa hi.
Tuailai te Kuate ahi ua chih en masa ni.
Ei Evangelical Baptist Convention in te’n Tuailai thumal i zat chiang in numei/pasal kum 18 a pat a tunglam, Saptuam dan siangthou a ji/ pasal nei thei ta te genna in kizang a, Tuailai kum, kum 40 tan in ki bikhiah hi. Senmomnou te’n tuailai hun ngaklah in deihthu bang saam in ka tuailai chiang in huai hih in, ka huchi ding, ka kha chi ding ana chi sek uh. A iit leh hawmthoh huai mahmah, nitumkuan lam hita pi leh pute’n a lungzuanna uh khitkhiak na ding in a tuailai hun mualliamsa suut kik zeel in, a hun paisa tuailai hun zat dan geel kikkik uh hi.
Siamtu Tung Thianmang in amah deih bang a zang dia hon siam leh a lamet lai in, melma pa Setan in leng amah a dia deih in ana enlah mahmah ahih man in khemna lam chi tuamtuam zang in khem nak hi. A iit huai tuailai tampi te mahni deihdan zui in, melmapa lemgeel ahih lam theilou in sang zatamte lampial kha nak uhi.
I laisiangthou Ekl 11:9-10 ah ihmuh bang in, Toupa’n i tuailai hun zat dan a hon vaihawm khum ding ahih man in, pilvangtak a i zat kiphamoh hi.
Delhi Tuailaite leh Hiiptu Khemnate:
Pathian in Khemna i tuak ding hon phal ahih man in kuapeuh khemna tuaklou ki omlou ding a, khem a i omna mun, a san, a ziak a kibang vek kei chih man thu lel ahi. Romte 3:23 a thilhihkhial te leh Pathian thupina tangzoulou te honna chih mah bang in, ei tuailai te’n pilvang tak a hun zat a, thilhihkhial lou ding leh Toupa toh ton gige ding poimoh ahih dan hon chian semsem hi.
Asakminthang Delhi khopi a laitual leng ‘Tuailaite’ hiiptu khemna bangzah hiam te ina ensuk him awle.
- Mahni ki ngai thupi/ mahni chauh dik leh hoih Kisa:
Gal 6:3 a i Laisiangthou in Mahni ki lianbawl, amah leh amah kikhem hilel zaw ana chih mah bang in, ei gingtu tuailai, Jesu khris batpih a nungta ding i hih lai in, ei chauh hoih leh dik ikisak chiang in khris mel liahtu ki suak hi. Phil 2:3 a michih in amah sang in midang hoihsa zaw hen chi a ana gen toh tulai tuailai te ki gamla pi a omkhak theih ahih man in poimahmah hi.
- Thilngaihzamna/ Thilngaihneu na: Christian tuailai khat hih dia kilom hia kilawm lou chih omnawnlou, kiim leh paam a te hiip a om gai. Ka ginna toh kituak hia? Laisiangthou in bang a chi a chih pen om nontalou in, hiai khong maimai, mi hihlouh le hilou pi, chi a poisakna neinawnlou, Christian values, moral leh ethics ngaihzaam na uang mahmah ta hi. 2Tim 4:9 a Dem in khovel iit zaw a Timothy a paisan bang in, ei Delhi tuailaite’n zaw khovel iit zaw in Toupa Jesus paisan kei ni maw.,?
- Zu/Khamtheih/Numei leh pasal kaal thangtatna:
Khovel thupina paallun vang ning bang zou in tuailai tamtak te zu leh sa, khamtheih sal a tang in hun tom nou sung lel a ding geel in noptaal uh a, poi mahmah hi.
Zalenna zang khial ki om sek a, poi mahmah hi. Inn a nu leh pa, sanggamte toh omkhawm lai a mihoih mahmah i chih, khopi a mahni a zalentak a om leh, lampial kha ki om nak khem a, melma pa nasep i chi lou theikei.
Iitna vang hiam aw, ki-etlahna hi zaw hiam aw? Tuailai te lak Kiteng nailou pi a nupa bang hinkhua zat a om na pen ei gingtu tuailai te chin ding dan hilou hi. Khovel dan hi a. Pathian dan hilou hi. Romte 13: 13-14 a ihmuh bang in, sa duhgawlna pichin lou ding a pang teitei dia hanthawn a i om bang in pang teitei ni maw tuailai iit aw.
- Limthanghuai/video thanghuai(pornography):
Thu leh laa hoih te ki khak tuah a, i gadgets te Pathian gamna sepna leh a thupina ding a zattheih ahih lai in, thu leh laa hoih te’n mun nei tawm deuh deuh. Limthanghuai, video thanghuau, Movie leh chiamnuih thanghuai taktak, leh leaked etc i chihte un phone, computer etc a mun lian luah mahmah, poi lawtel chih louh gen ding vang.
- Thadahna:
Tuailai tamtak te Thadahgop in Laisiangthou sim peih nonlou tampi ki omta. Laisiangthou i galvan leh ki thuamna ding i simpeihlouh chiang in thil tampi poi ban sak mahmah hi. [2 Timothi:3:16]Laisiangthou peuhmah Pathian hatkhum a piak ahi a; huaziak in, thuhilhna ding bang, taihilhna ding bang, bawlhoihna ding bang, diktatna lam a kichilna ding bang in a phatuam hi. ana chi a, himahleh tuailai tamtak in i sim peihlouh ziak in Pathian thu a taksapna lianpi om in, a thupina i muh ding bang in kimutheilou hi.
Tuailai tamtak Biakinn kai, biakna, kikhop ki thadah mahmah a, biakinn kai sang a, mahni inn mun a noptak a om maimai, ihmud a tawldam chih te ki chiin kha nak sek a poi mahmah hi.
- Nek leh taak/tep leh muam a kideklouh na:
Khopi a teng i hih na ah nek leh taak chi tuamtuam tampi om hi. Mihing damlouthei, taksa a dia hoihlou thil om thei leh thil teng nek sianglou ahih na ah, i muh leh tuah teng mawk nek a, mahni taksa a dia hoih leh hoih lou geel pha lou a mawk neknek pen chidamhuailou hi. Taksa damtheih na leng ngaipoimoh ni. Talab, khani, raja ,laizial etc te mihing damthei na ding in a hoih mahmah chih ki zangeilou a, himah leh a ne, a tep ki pun beh zawsop hi.
- Sum(Money):
Mihing hinkhua a poimoh mahmah sum hi a, sum tellou in bangmah ki sem/bol theilou ahi chi leng i gen khial lomlom kei ding. Sem ni, zong ni, poimoh hi. Himah leh ‘Pathian ‘ in zang kei ni. Ei leh Pathian kaal hon ki gamlasak tu hikei heen.
- Kicheidan khengvaal:
Pau 3:9 a i Laisiangthou in, na van in Toupa zahtak in, na chi a, gingtu Khristian tuailai te a dia ngaihsut ding tampi hong om hi. I kicheina, i puansilh etc te Khris mel liahtu a hih khak ding uh ei Gingtu tuailai te a dia thil lau huai mahmah leh pilvan tuak mahmah hi.
- Mobile/Gadgets:
Khovel khangtou mahmah ahih na a, mobile hiam gadgets tuamtuam te lou in niteng hinkhua nongkai thei tamtak om ahi chih i haih louh komkom in, hiai te i Toupa toh hon khentu, gamlasak tu ahih khak ding lauh huai mahmah, Kimol, cinema et zongsang ziak a biakinn va kai, Laisiangthou sim ding lai simlouh leh va kikhop louh baih lam mahmah hi.
A Dou zoh ding dante:
Melmapa Setan chalak pil mahmah ahi man in, ei lunggulh lam zawng chiat in hon khem a. Ei mah mihing tha hatna a dou zoh i sawm leh ki hihkhial kha ding hi. Pathian hatna muang in, amah sam in, amah toh dou khawm le. I neih Jesu khris vang in, Zohna ei a hong hi ding hi. Psalm 119 :9 a imuh bang in, Pathian thu tungtawn in ei Tuailai te’n i niteng hinkhua ua i omdan uh ki vengbit thei ding hi.
- Thumna:
Khemna leh ze-etna douzoh na ding in Thumna poimoh petmah hi. [Matthai:26:41] Khemna a na lutlouhna ding un kiging gige in thum un; kha in zaw a ngap a, sa bel a hat kei hi, a chi a. Sa a om lai i hihman in, ei Tuailai te naksem a i Thum ki phamoh. Thumna in thil hihtheih a, thumna pen mit a muh louh i Toupa van aom toh ki hou na hun manpha ahih man in, niteng in a tamtheilam Thumna nei ni. [1 Thessalonikate:5:17] Tawplou in thum un; ana chi a. Ei tuailai te ki thum tawm lawta. Thum tamsem sem in melmapa panlaktheihna din i lungsim ah mun awn non kei ni.
- Laisiangthou:
Laisiangthou sim tam poimoh mahmah hi. Johan 5:39 a i Toupa Jesun, Laisiangthou ka tan chin theihpihna lah ahi ngal a na chi a, ei amah nungzui, amah tanchin theihpih tu tuailai i hih ngal in, isim ding him hilou hiam chih ngaihtuah na lianpi hon piangsak hi. Laisiangthou sung ah, dan tuamtuam, gingtu te hih leh sep ding a kilawm leh mohpuak tampi ana ki gelh a, niteng in sim gige le, a thu a ki khang semsem ding a, Khristian tuailai khat hih ding leh hihlouh ding, nek leh neklouh fing, khoih leh khoih louh ding, et leh etlouh ding, suk khak ding leh sukkhak louh ding ki chiang mahmah di.
- Mahnikithunun leh Hunzat dik:
Ei gingtu tuailaite a dia poimoh mahmah hi. Mahni taksa leh lungsim thu nun peuh le, a hunhun in i sep leh bawl ding te bawl leng, annekhuna ne, lup hun thoh hun, Laisiangthou sim hun bikhiah, thumna hun ding a hun bi nei in bikhiah in, hun zat dan siam in, mahni kithunun peuh le, melma setan in i hinkhua leh i nunna uah mun neilou ding hi.
- Hangsanna leh Tupguhna :
E(No) chih ngaih na mun di leh chih na hun di a chi ngam ni. Lomte/seppihte nial a ngaihna mun leh hun a hangsan leh tupguhtak a nial teitei in, gingtu tuailai khat thil hih dia kilawm lou a pan kitan khe ni.
- Pathian thu leh Phatna laate ngai khe tam sem in:
Thuhoih leh laa hoih tungtawn in tuailai te’n hon hiiptu khemna tuamtuam te ki dou thei, ki douzou ding hi. Ei gingtu tuailai te ‘Mission ‘ lungput nei ding te i hi ua, i omna munmun a tangthupha hinpih leh phuangzak ding a lamet te i hi uh hi.
- Lunglut(Hobby) leh daily practice Khat bek neih teitei ding:
Drawing, painting, music, lasak, laam, Paakkhoi, exercise, lai gelh,laibu hoih tak tak sim, etc khatbek i talent toh kituak zong khia in, huai mah zuun le. Hun awl nei manlou ding hial khop in bang hiam i taksa leh kim leh kiang a ding a phatuam ding in hun zang le, Buai zou peuh le, memla pa in mun neimanlou ding a, khemna tuamtuam akipan ven bit in kiomthei ding hi. Eg, Drawing gelh kom a mi khat gen siasia, laa sa kom a mitoh ki sel ek, exercise laa kom a phone a lim thanghuai or video en kom,, etc Om khollou ding hi.
‘A gen a nuam, a zuih a hak ‘ ina chih sek mah bang un, dik leng ana dik hi. Bang teng gen lele, khemna douzoh na ding a Kalbi poimawh mahmah gel, Thumna leh Laisiangthou ahi. Thum tamsem thei ding in leh Laisiangthou sim mun semsem thei ding in Toupa hiai laigelh sim kha peuh mah hon ompih in hon vualzawl chiat hen. Kakipak.
