Natna Hii-Leng Thak: Sinlai Poimoh

[Sepna ziakin “Lockdown” ahihsung sepna munah, innkuante toh kikhen in, ki-omkha hi. Hiai hun a hinkhua adi’a sinlai tampi petmah muhsuah in om a, huaite’ lak a khat kikum le’ng chi I hi]

Huan, Pathian itte, Ama'n Aseh banga A sapte adi'n, ahoihna ding un bangkim in A sepsak chiat chih i thei hi (Rome-te 8:28).

Sinlai : Natna hii-leng thak hong om akipan munchih-mualchih a chiindan thak leh aloutheilou paidan hong hita tuh etchetna / ki-etchetna(screening)pai ahi. Sepaih lak ah thupiak himhim akhauhthei bangpen a sepsuah a, hihbuchin teitei tuh tup-le-ngim golpen ahi. Covid-19 thu theih ahihphet in, omna huangsung khakbit pah ahingal hi. Lut-le-pawt dingte khaam bikbek ahi ua, apoimoh leh aloutheilou a lut leh pawt ngaite van neih bang bang toh hoihtak in ki-enchian masa gige hi.

Ataangpi a et in natna hik kilatkhiak na dia ni 14 khawng hunla ahihmawkziak in, pawlam akipan honglut, adiak in suty pai hong kikte koihtuamna ding akidaihzai (stage tuamtuama koihna ding) pindan tuamtuam bangzah hiam mansa in kikoihpah lian hi.

Hongtungthakte etkol theihdan omsun tuh omna huangsung honglut uh toh kiton in koihtuam ahi ua, khat-khit-khat in IR Thermometer gun toh atal uh ana ban kapsak ziahziah ahimai hi. Akhenchiangin abukimsakna lel abatna om. Aziak, khosik nei in neikei taleh, hongtungthak peuhmah ni 14 sung khumtuam leh kep tuam hi veve uhi. Kivensiam kaana hoihzaw omlou, chih thupi kipaipih ahideuhpen mai.

Ni 14 sung midang kuamah toh kimutuahlou di’n kep leh dontuam in om ua, pindan 14 te ah ani ni in pindan khat akipan pindan dang ah kisuantoutou uhi. Skul kailai a kumkhat a pawl khatvei suanzel dandeuha, amau fast forward a skul kai mah abang zezen uhi

Ani 15 ni’n damtheihnalam a bangmah kisoiselna aneihkei ua leh doctor akipan “graduation certificate” vala in, midangte’ omna a omthei ding in phalna ngah uhi.

Suty a omte’ kianga hong kiktheih matan hunsung a ahih teitei ding ua vaikhah poimoh tuh – daily log book (niteng hunzat dan leh kimuhpih kuapeuh min gelhlutnabu) ahi. Hiai in natna hik veikha bang hita zenzen le uh alohsawntheih dingte suina dia zattheih ding, chihna ahi.

Sinkhiakte:

• Apua akipante asunga omsa mite’ kianga aomsam theihna ding ua test, ni 14 kikhumtuam leh doctor phalna lai aneih uh a ngai.

= Mihingte nasan in hiai banga kikhiitsiangna I uangbawl untuh, Pathian in I khelhna niinpi toh hon pomlou lawtel ding mah hitah e.

• Ni 14 sung etkoltuam ahihlai un, midangte toh kimutuah theilou di’a koih in om uh.
  = Pathian toh mihingte’ kal a honna khentu khelhna beisak ahihma Pathian toh kizopna neitheilou leh Ama’ kiang naih vualloute I na hi.
• Ahikpua chih theihchet leng hilou, ni 14 sung keptuam leh etchet a om uh.

= Dondamtheih natna (a-veiteng si hingal lou natna) nangawn chet ahihma mullit mihingte I hih ua leh, sihna (tangtawn sihna) khop-hial khelhna paai keihkuihte Pathian in bangchituk in hon mullit di’a?

• Natna hik pen mihing khat apan khat a kaitheih ahi a, I lau un khat-le-khat kal bang kigamlat ding chih ahi.

= Khelhna (niteng khelhna) in ei hongzuan ahikei a, sia-le-pha theihna chiimtak nei ei(mihing)te’n I vanaih uh ahizaw. Natna I lauh bang un khelhna leng va sukkhak leh hihkhak ding lau le, hoihna tel in chi’a.

• A damdawi ding muhkhiak ahih nailouh ziak tak in, kaailouh teiteina di’n PPE tuamtuamte Ingaikhawk un poimoh I sa mahmah uh.

= Salam sihna I lauh ua PPE I ngaih poimoh bang un Khalam sihna ngaikhawk in khemna a piilut I hihlouhna ding un Khalam PPE – Thumna leh Bible ah kinga le’ng.

• Ni 15 ni in, damtheihnalama bangmah kisoiselna a neih keileh, doctor in phalna lai pia in huchi’n asiang a simtel ahipan phet uh.

= Mihingte’ adi’a Doctor Jesu Khrist kia loungal I khelhna leh mohnate akipan hon tankhia leh sutkhezou ding adang kuamah omlou. Jesu Khrist sisan in I mohnate maisak thei lel a, Pa kiang zot theihna lampi hon sialsak.

• Natna ziaka niteng log book bawl a, kim sipsip a hunzatdan leh kimuhpihkhak mite gelhlut ding.

= Natna ziak kia a hun zatdan sim ding ahi kei; hiai’ dawnna muhna Sam90:12 ahi: “Ka damsung nite uh simdan honhilh in, pilna lungtang ka neihloh hialna ding un.”

Vaikhah :Simtute tengteng, hiai hun dengdel tak ah Pathian houpihna’ Aw zathei chiat ding in lungsima kihonna toh Amah ngak ni hang.