Dotna 1: EBCC Central Delhi, EBCC Delhi (Dwarka) apan inntuan ahih nung kum 10 cingdek mahmahta (April 25). Ebenezer! Hiai hun zatna di'a kisakkholhna pai le om thamta cih na za ung. Hiai tawh kisai tomkim, banah solkar thupuan lockdown in kisakkholhna pai a sukkhak dan saulou n'on gen thei dia'm?
Dawnna: EBCC Central Delhi 25th April 2020 ni in kum 10 chingta ding hi. Hiai hun Toupa’n hon muhsak kilametna toh Saptuam in vaisai ding pawl “10th Anniversary Celebration Sub- Committee” chih kiphuan hi. Amaute’n apoimoh bangbang hon enzui pah in, a lopni ding 25-26th April 2020 ding a geel in, program te bawlfel in, alopna mun ding le biakinn CMC mun mah dawpfel uhi. Hiai lopna hun thupi ding in,Gen. 22:9-18apan telkhia in “ISAK MAITAM”, thugentu dite le dawpfelsa in om hi. Huchi in huai nite a phatna la special number ding, dept tuamtuamte’n le lapawl bang ana zil uhi.
Hiai kisakkholhna pailel lai Covid-19 solkar thupuan lockdown in honlap a, solkar in 14th April banah bangthu hon gen ding ua chih bildoh tak a om in, apolam apan thugentu di’a kichialte hongpaina ding ticket le book louphot in kikhaw-ngai hi.
Dotna 2: Kipak e. Lockdown lah khauh deuhdeuh bang... kawmkal ah... EBCC CD kum 10 cin, bangci banga zat (observe) honghih na gingta a, saulou n'on gen thei dia'm?
Dawnna: Tu dinmun in Covid-19 positive in punlam nawt zel a, khopi tuamtuamte banah Delhi & NCR ah leng lockdown khauh hiaihiai in muh theih hi. Kum 10 chinna lawm di’a, Saptuamte kipunkhawm ding le hong lemtang lou thei dinmun ah kiding hi. Toupa kiang ah i deih leh lunggulhte kitunzel hive’n; hiai hun Toupa hon lemgelsak bangbang, Celebration Committee apan thuchiang zaw hong kisuah pah lamet ahi.
Dotna3: Lockdown om nung, EBCC Central Delhi panlakna, member-te ki-etkolna lam kawkdeuh, gen theih om hiam? EBC HQ leh EBCC Delhi, Dwarka lam panlakna (response) muhtheih omte bangci na sa?
Dawnna: Covid-19 hipi ei khang a i tuahpatna uh ahihziak in kiginkholhna hun omlou in lockdown in kuapeuh hon bingphut hi. Hiai toh kisai ah kichiziatna ziak a chi-le-kuang kideidanna bang, innluahna buai bang, sepna buai nek-le-taak buai bang om theih ahihman in EBCC Central Delhi in area chih a heutute bengvak ding leh hiai bang tuak om leh Saptuam heutute thuzak pah ding in thusuah bawl hi. Mihing hinna tanpha lauthawnghuai thei dinmun a om akihihmanin thumna toh Saptuam in apoimoh bang a panlak touhzel kisawm hi.
Taksa lam a gilkialna omtheite awng-hu ding in solkar leh agency tuamtuam in pan honlak lai in, Saptuam in a dinsan mangilh lou in khalam-an luina EBC Hq apan internet, online leh cable tungtawn in hong om a, mitampite’n i phattuampih uh lamet huai kasa hi. Biakin ah kikhopna om theikei mah leh EBCC Central Delhi inleng Nipini leh ni poimohte ah online tungtawn a Local Pastor’ thugenna, thumsakna, thilpiakte latna leh phatna special number khahkhiatna neizom thei zel hi. Biakinnpi - EBCC Delhi in leng hiai bang hun a memberte itna leh awlmohna toh, salam khalam a poimoh bangbang enkai a pan nana laktheih zel ziak un lungmuanhuai ka sa hi.
Dotna 4: Lockdown, 24/03 zankim apan hong om tungtawn in muhthak-theihthak (laa phuahthak tel in) om di e... Omleh, tomkim in n'on gen thei dia'm?
Dawnna: Covid19 ziak a lockdown in mihingte i thupi louh dan, i hinkhua a dengdel dan leh bangmah i hih louh dan hon kilangsak mahmah hi. Hun paisate ah Delhi khopi, tu hun April kha bang in khua lum mahmahta hi. Himahleh tu kum khualum zoklou a hong kiziat dan khawng Covid19 adi’a kingeih di’a kisa himai lou di hia chih bang hon ngaihtuah sak hi. Thil teng, bangkim siamtu Pathian khut a om ahihdan langsak mahmah hi. Pathian khutsuak leitung in amel kilawmna honpu nawn dek abang a – huih leh tuite siangzaw, thawmgingte tawmzaw a, Pathian in hinkhua kibukkim - balance life hon sinsak nuam ahi diam chih bang lungsim ah honglang hi.
Lockdown in innkuan poimohna taktak hon langsak hi. Kuapeuh innkuan a kingaihtuahna ding leh kibawlphatna ding hun hon bawlsak hi. Nidang a luun mahmah vanlengphualte, lampite, khopite, kongzingte, tuipi-piaute khawng loih a om ka muh chiang in laktouhna hun hong tung ding bang ngaihtuahna ah a changchang in hong lang hi. Hiai tungtawn in Pathian apan laa thak muh neikei mah le’ng, honpiaksa “I vek in kim thei le’ng” chih laa bang ahong lang mun mahmah hi.
Dotna 5: Finally. Simtute, 99% social media tukverh a dakkhe thei kihita.. Social Media zatdan tawh kisai theihhuai/ ciamtehtuak (zuihtuak) na sak omkha di hivaw... Mawl kha in n'on genzek thei dia'm?
Dawnna: Mihingte social being i hihziak un social media in phattuamna tampi nei hi. Covid19 lockdown ziak bang in biakinn kai thei kei mahlehang, Pathian thu i ngaikhawm thei uhi. Nidang in khua sung ah tang-au or tangsam i nei ua, tu in ahihleh social media i zangtheita uhi. Thil himhim ahun om a, aval om hi. Aval a i zat chiang in ahoihlam sang in setan vanzat suak thei hi. Setan thiltup pen gingtute khempuuk leh nuaisiah ding chih hi ngitnget ahihman in social media,setan vanzat suaksak lou ding in gingtu kuapeuh in mohpuakna kinei ahihdan mangngilh kei ni. Setan khut sung a puklou ding in Toupa’n kuapeuh pilna ahunhun in hon guan chiat hen aw. Amen.
