Pathian zahngaihna ziakin hih manthat a om lou in 2023 kumtawp ah i ding uhi. Hun paisa a biik-takin 2023 kum enkik mah dih. I khang a dinga mulkimhuai leh gentheihna tawpkhawk i tuah kum uh ade aw chih theih ding bang hi. May 03, 2023 in Manipur simgtang mite kipumkhatna min in ‘Solidarity March’ All Tribal Students’ Union Manipur (ATSUM) makaihna in i nei uhi. Hiai in singtang mi leh phaizang mite kal ah kitheihsiam louhna tun in buaina hong piang hi. A khasiathuai mahmah ahihleh, kipumkhatna vai hon saipih heutute buaina i tuah takin muh ding omlou in hon taimangsan uhi. Huai hun leh ni akipan tuni tan dongin buaina leh haksatna in hon nuse lou hi.
It-le-ngaih tampite mulkimhuai leh huham taka thah in om uhi. Inn-le-lou hih siatsak leh haltum sak a i om kia hilou in, i tenna State khopi apan “hongpai kik nawn kei un” chih huatna kampau toh nohkhiak in i om uhi. Numei naupang tunga tatsiatna genzoh vuallouh i tuak uhi. I hihna (identity), sahkhua (chik mah in biakna mun hiai zahzah hih siatna khangthu ah ana om nailou hi) ziaka huat leh deihlouh in i om uhi. I pu-le-pa apan i luah gamte apan pawtkhe dia vau in i om ua, India gam khua-le-tui hihna (citizenship) neiloute, khamtheih damdawi zuak a sumdawngte hi a ngoh in tuni tan dong i om lai uhi. Hiai bang hun haksa tak mai a i om lai in heutu leh makai ei adia hon gensaktu ding leh hon pauhial ding kuamah i nei kei uhi. Ei, buaina tuakte mah ei-le-ei kibuaipih liingliing in i om uhi. Mihing lam/khovel etdan in tuh lungkiakhuai leh zahlakhuai petmah dinmun ahi mai hi. I khangthu a om ngeilou salpha (martyr) siluang 87 ni khat thu a vuikhiak in om hi.
Hiai bang lungkiakhuai leh mangbatna tawpkhawk in ahon tuam kim vel lai in ei gingtu Pathian tate’ Bangkim hihthei, Jehovah Pathian i naih semsem hun uh ahi chih phawk in ki-enchian thak lehang, Pathian in A deihdan lampi tawn a pai dinga hon sapna ana hi khathei hi. Huaizakin, lungkia leh lametna bei a, ki-ngaisia leh midangte mohsa in om mai kei ni hang. Pathian in ei a dinga a hoihzaw hon gelsak om ding hi, tua mah lunggulh pen in nei leng i chi hi. Sahkhua heutu minthang mahmah Deshmond Tutu in lametna bang hi hiam chih hichi’n ana hilhchian hi “being able to see that there is a light despite all the darkness”.
Kum 2023 sunga buaina leh haksatna i tuahte tungtawn in michih kivelthak chiat leng mailam hun ah lametna i nei thei ding uh. Politician-te, pawlpi makaite, sahkhua heutute hi’n mimal malte hita lehang lohsam (failed) i hihdan tutung buaina tungtawn in kilang a, i ki-et kik a, i kivel thak poimoh mahmah hi.
Huaiziakin, ei gingtute kuate i hi uh hiam, chih kidong thak in, 2023 i kizat dan enkik ni hang! I hihkhelhte tawpsan in, thilhoih Pathian deihna bang i hihkhakte a tamsem sem sunzom dingin lametna toh kuhkal takin pang ni hang. Ephesa 2:19-22 ah ‘Pathian innkuante i hi, a kibulphuhna Laisiangthou thutak ahia, Jesu Kris a ning a Suangphum ahih dan leh mimal malte khasiangthou tenna dia lamkhawm’ i hih dan uh phawk thak ni. Kum thak 2024 ah Pathian innkuante gamtat dan in gamta in, midang kuamah hilou Jesu Kris en in, leh khasiangthou tenna mimal malte i hih dan phawkkawm in, om dan, kampau leh gamtat ah langsak chiat lehang, Bangkim hihthei Van Pathian in, bangchi chi hiam in, damna ei dingin hon bawlsak ding hi. Thumna toh pan la thak chiat dingin i ki chial uhi. Damtak in Kumthak 2024 ah kimu nawn ni.
