“huchi a Amah leh a thohnawnna thilhihtheihna ka theih a, a thuaknate tanpih a, a sihna a Amah batna ka neih theihna dingin, bangchi chi hiam bek a misi laka kipan thohnawnna ka ngah theih khak leh chiin”…(Phil.3:10-11)
Sahkho dang bete sanga ei Khristiante i hamphat zawkna leh i tungnunna tuh “Thohnawnna” ah ahi. Khovel a sahkhua lianpipi - Hindu, Islam, Buddhist etc. mukhetute a si ua, a thounawn uh chih kithei khalou hi. A sih nung ua ganhing khawng peuh suak maimah ahi uh chih ahi. Eite bel huchibang i hi kei a, i sih nung chianga pumpi thak nei a thupi taka thounawn ding i hih manin a kipahhuai diak hi. Huai lametna neite i hih manin i hampha mahmah hi.
Ei Khristiante adia a kipahhuai khol diakna tuh Jesu a si a, haan a vui in a om chih tan a ana bei hileh bang achi dia, lungkhamhuai mahmah dingin ka um hi. A thounawn ta!! Chiin huai Angel in Mari kiangah ana hilh khinta hi….Halleluijah!!! Praise the Lord!!!
Kum tamsim paita in North East adia mi thupi mahmah khat hong si hi. A sunna hun ah kava telkha a, Sahkho makai tuamtuam, Jainte, Hindute, Islamte banah Khristiante Priest (Roman Catholic) te’n thumsakna nei in a thusam dan uh kibang sim vek hi. “Toupa a kha tawldam sak in, lungmuang in om sak in” chiin a sisa pen a dingin thum vek mawk uhi. Eite adi’n bel i sih chiangin i tunna mun ding gelsa hita a, Pastor/Priest/Swami-te nget sak ah kinga nawnlou hi. I damsung mah a i tunna ding gelsa (decided) hita ahi. Amahtuh a dam laite, a diak in a tanau naite adia khamuanna nget sak tuh poimoh hi.
I Laisiangthou tangteel ah amah thohnawnna thilhihtheihna thei a a sihna a amah batna neihna ziaka bangchi chi hiam a a thohnawnna ngah theih kilamen ahih dan Paul in gen hi. Jesu Khris thohnawnna thilhihtheihna i tan theihna dingin a thuakna leh a sihna koppih ngai masa hi. Huan, Jesu banga i thohnawn theihna dingin pumpi sihna kia hilou in khelhna lam a i sih poimoh hi. Huchi a bangchi chi hiam bek a misi laka kipan thohnawnna ka ngah theih khak leh chih ahi. Thohnawnna a teltheihna dingin a condition ana om mahmah ahih dan leh banghiam eilam apan hih di om ahih dan leh Pathian nnasep thupi ahih dan leng hon theisak hi.
Toupa Jesu Khris thohnawnna tuh Pathian nnasep thupi ahih dan Matthai 28:1-3 ah kichian takin kimu hi “Huan ngai dih, jiin nakpi takin ahong liing a, Toupa Angel van a kipan ahong suk a, suang tuh ahong khukkhia a, a tungah a tuta hi. A mel om dan tuh khophia bang ahi a, a puansilhte tuh vuk bangin a ngou a, amah a kihtak ziak un vengmite tuh a liing ua, misi bangin a hong om ta uh” Matthai 27 tawpna lam ah Jesu thohnawn khak di venna a haansuang lianpi a dal in sepaihte vengbit sak uh ahih dan i mu hi. Himahleh mihingte panlakna Pathian adi’n bangmahlou ahi chih kimu hi. Vengmite tuh lau a liing in misi banga hong om uh ahi chi hilhial hi. Toupa mai ah mi thupi pen leng a ding zou di ki omlou hi.
Thohnawnna tuh Pathian nnasep a hihna Nasepte 2:24 ah i mu nawn hi “Huai mi, Pathian in sihna gaknate a phel sak a, a kaithou ta hi. Amah sihna letdet vual ahihlouh ziakin” Unaute, thohnawnna Pathian nnasep liauliau ahi a, mihingte hihtheih hilou hi. Amah Jesu Khris sihna koppih a ginna tungtawn a amah sangte Pathian in ni tawpni in hon kaithou sam ding hi. Huai lametna neite i hih manin i hampha hi. Pathian in hon kaithou ding ahihmanin kuama’n dal theilou ding a, tua zong siamtang a thou ding ki hi ahi.
