Matthai 2:13-15 “Huan a pai nung un, ngai in Toupa’ angel Joseph kiang ah a mang in a kilaak a, “Thou inla; naungek leh a nu pi inla, Aigupta gam ah taipih in, k’on hilh nawn masiah huai ah om gige in; Herod in naungek hihsiat dia zong diing ahih ziak in,” a chi hi. Huchi in, a thou a, a zanzan in naungek leh a nu a pi a, Aigupta gam ah a paita hi. Herod sih mateng huai ah a om gige hi; Toupa’n zawlnei kam a, “Ka tapa Aigupta gam a pan ka samkhia,” chi a a gen a hong tun theihna diing in.”
Thupatna: December kha i luttouh toh kiton in, i lungsim uah Khristmas hong lang chiat diing in ka gingta hi. Khenkhatte bang in November kha apan advance/advent Khristmas program a na zangta a om leng ka lamen mahmah hi. Himahleh a poimohpen Jesu Khrist buaipihkha hetlou a, program zatkhak leng na baihlam mahmah hi.
Naungek nei leh neiloute’n kibatlouhna bangzah hiam nei uhi. Kibang kei mahle uh, naungek neikhaloute’n naungek toh kisai himhim theikha lou chih hituan samlou ahi. Himahleh a kibatlouhna lianpen uh tuh naungek neite’n naungek buaipih ua, a neiloute’n buaipihkha lou uh ahi. Naungek neite’n naungek adia hun a piaklai ua, a neiloute’ aa diing in piak ngai vetlou hi. Huai ban ah naungek neite’n tuh a neihlam uh kichian ua, naungek neiloute’n leng a neihlouhlam uh kichian uhi. Huan ah, naungek nei leh neiloute tuh a hun zatdan uh kibang theilou in, a awlmoh uh leng tuam hi. Amau ut ziak leng hilou in, naungek in a poimoh ziak in, a nasep ngeilouh thilte uh sem in, zil touhtouh diing nei uhi.
Jesu hong pian chiang in, a nu leh pa’n a buaipihpen a hong hi ahi. Amau lemgelna ah Bethlehem a minkhum diing in, a zoh chiang a Galili gam a Nazareth khua a kiknawn diing chih hikha diing hi. Himahleh naungek ziak in amau lemgel leh tupdan in kalsuankha thei nawnlou ua, a ngaihtuahkhak ngeilouh uh Aigupta gam ah naungek taipih diing in angel in hilh hi. Huchi’n azan-azan in taipih ua, Herod sihma tan Aigupta ah khosa uhi. Joseph leh Mari in amau utdan zui hilou in, naungek’ bitna diing in a theihlouh gam uah khosakpih mai uhi. Jesu chavaihpih leng chih theih hi. Naungek ziak in a taan uh tampi om dia, haksatna a phutkhak uh leng om diing hi. Himahleh a kipahhuai mahmah bel Pathian in a gamtat diingdan uh kawkmuh a, a thilhihtheihna in makaih in ompih chih chiang mahmah hi.
Thukhitna: Kum bangzah Khistmas na zangkhata a? A khente a tam deuh, akhente a tawm deuh zang zong om tham diing hi. Huan ah, Jesu na neita hiam? Na neihleh, buaipih lou chih om theilou hi. Na hinkhua ah Jesu buaipih a neikha ngeilou na hihleh na lungtang a piangkha nailou/mun neikha nailou hi diing hi. Jakob leh Mari in nakpitak a buaipih uh, nang leng na neihleh buaipih sam diing na hi. Huaiziak in tu Khristmas hun ah Jesu i lungtang chiat uah hong piangleh chih i kideihsak mahmah uhi. Mari in, “Toupa sikhanu ka hi, na thu bang zel in ka tung ah tung hen,” a chih bang in, Jesu ei ah lal diing leh hondampa a sang diing in thupukna la ni. Toupa’n hon vualzawl chiat hen aw!
