Kizopna (relationship) kichi tu hun ah tasam hiaihiai i hi de aw chih in a om hi, i innvengte ngongoih bang toh le kitheituahlou, kihou ngeilou khong kihi tangpi hi. Lamka a ka inn bawl lai in ka next plot pen a awng hilai hi, Kum bangzah hiam zoh in a plot neipa’n inn lianpi hong lam hi. Ka fencing niam sim ahihmanin inn kinai lua in ki-ettuah khak phutphut in a om hi. Khatvei ka innvengnu kiangah ka fencing kisusang leh ka chih leh hichi’n hon dawng hi “innveng i hihna banga a phattuamna? Pucca fencing khawng in i ki-umbichilh ua, innveng, chikhat namkhat i hihna omzia omloupi’ hon chih leh hi kasa lua a tutan ka hichi koih hi.
Saptuam ah le kizopna chidam (healthy relationship) poimoh mahmah hi. Committee khat a vaihawm khawm i hih lai in ei ngaihdan hon koppih loute ah bang lungput i nei dia aw chih bang ngaihtuah tham kasa hi. Pathian saptuam kepna ah bialbial in i kikhen a, huaite etkaina Bial Upa in kinei hi. I bial sunga saptuam toh kisai asia-aphate a thei masa dia lamet-te ki hi. Himahleh Bial Upate leh mipite kizopna bang achi a? Adiak in tuailaite bang toh ki connect khollou in ka kithei hi. Bialtu Upa bang le poimoh sa khollou or hon zahtak lua a bangmah hon kum ngamlou bang leng himaithei uh maw!! A banglam hileh a kitasam ombel hidi’n ka um hi.
Kum masa lam in biakna family & youth focus group a khen in kinei hi. Bangtan hiam hong pai a kizopna (relationship) hong dengdel hiaihiai in gap lianpi hong om a a kitheih manin kisunzom lou hi. Saptuam khat sungah department tuamtuam ki om hi. Huai department khat-le-khat kizopna a hoih hia? Mimal kizopna, saptuam heutute leh mipite kizopna a chidam hia? Eimah tumtum a i pai chiangin i relationship kitat a saptuam chidam louhna hon tun hi. Kizopna hoih a omtheihna dingin department khat-le-khat bang le i kithuah deuh uh poimoh kha ding ahi.
